रेडियोको भवन भत्काउने विषयमा पाँच घन्टा तनाव
![रेडियोको भवन भत्काउने विषयमा पाँच घन्टा तनाव](https://annapurnapost.prixacdn.net/media/albums/radio-dhading-57b12fdf79a5b5.72143676_JJYoafhxUz.jpg)
धादिङः जिल्ला वन कार्यलय धादिङले धादिङबाट प्रशारण भइरहेको रेडियो धादिङको भवन भत्काउने प्रयास गरेपछि सदरमुकाममा आइतबार पाँच घन्टा तनाव भएको छ ।
पछिल्लो समय सामुदायिक वन अतिक्रमण गरेर बनाइएका संरचना भत्काउने अभियान चलाएको जिल्ला वन कार्यलयले रेडियो धादिङले पनि सामुदायिक वन अतिक्रमण गरेर भवन बनाएको भन्दै भवन भत्काउन लागेको परेको हो । रेडियो धादिङले भने सामुदायिक वनको जग्गा भए पनि सबै कानुनी प्रक्रिया पूरा गरेर भवन बनाएको दाबी गरेको छ ।
सार्वजनिक सम्पत्तिको दुरुपयोग कसैले पनि गर्न नपाउने र दुरुपयोग गरेको पाइएमा स्थानीय प्रशासनले जुनसुकै बेलामा पनि भत्काउन पाउने भन्दै डोजर र सशस्त्र प्रहरीको डफ्फासहितको टोलीले भवन भत्काउने अधिकतम प्रयास गरे पनि स्थानीयको तीव्र विरोध भएपछि जिल्ला वन कार्यलयको टोली फर्किएको थियो । भवन भत्काउन जिल्ला वन कार्यलयको टोलीले प्रहरी नै परिचालन गरेपछि दिनभर जिल्ला सदरमुकाम तनावग्रस्त बन्यो ।
जिल्ला वनले भवन खाली गर्न यसअघि नै सात दिने म्याद जारी गरेको थियो । सात दिने म्याद सकिएकै दिन प्रहरीले प्रशारण भइरहेको स्टुडियोसहितको भवन भत्काउन प्रहरी परिचालन गरेपछि तनाव उत्पन्न भएको थियो ।
समुदायका स्थानीयको लगानीमा सञ्चालित भवन पनि समुदायकै सम्पत्ति भएकाले प्रहरीको हस्तक्षेपमा भत्काउन लागिएको भन्दै स्थानीयले विरोध जनाएपछि दोहोरो झडपको स्थिति सिर्जना भएको थियो । भवन भत्काउन प्रहरीले बल प्रयोग गरेपछि भएको झडपमा डोजरको सिसा फुटेको छ भने प्रहरीले दुईजनालाई पक्राउ गरेको छ । पक्राउ पर्नेमा रेडियो धादिङ सञ्चालक समिति सदस्य ठाकुर बुर्लाकोटी र युवा नेता हरि थापा रहेका छन् ।
आफूहरूले वन अतिक्रमण गरेको नभई वन उपभोक्ताकै सहमति र सबै कानुनी प्रक्रिया पूरा गरेर मात्रै रेडियोको भवन बनाएको रेडियो सञ्चालक समिति सदस्य नवराज छत्कुलीले बताए ।उनले भने, ‘सामुदायिक रेडियो पनि समुदायकै सम्पत्ति भएकोले वन उपभोक्ताको सहमति र कानुनी प्रक्रिया पूरा गरेपश्चात् मात्रै भवन बनाइएको हो, वन अतिक्रमण गरेको भन्ने आरोप निराधार छ । हामी कुनै पनि हालतमा रेडियोको भवन भत्काउन दिँदैनौं ।'
जिल्ला वन कार्यालय धादिङका प्रमुख इमानाथ पौडेलले भने नीलकण्ठ नगरपालिकाको वडा नं ८ मा रहेको अमरावती सामुदायिक वनको जग्गा अतिक्रमण भइरहेको भन्ने उजुरीका आधारमा आफूहरू अतिक्रमण गरेर बनाइएका भौतिक संरचना भत्काउन लागिपरेको बताएका छन् ।
अमरावती सामुदायिक बनभित्र अहिले गैरसरकारी संस्था सहयात्री समाजले हिंसामा परेका महिलालाई उद्धार गरेर राख्ने स्थल ‘सेफ हाउस' सञ्चालन गरिरहेको छ भने वन क्षेत्रकै स्थानीयले किरियापुत्री भवन, धार्मिक सम्पदा पनि निर्माण गरेका छन् ।
जिल्ला वन कार्यलयले यसअघि राजमार्गका सामुदायिक वन अतिक्रमण गरेर बनाइएका पक्की घर र भौतिक संरचना पनि डोजर लगाएर भत्काउँदै आएको छ ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)