आयोजक ब्राजिल सेमिफाइनलमा 

रियो दी जेनेरियोः आयोजक ब्राजिल रियो ओलम्पिकअन्तर्गत फुटबलको महिला र पुरुष दुवै स्पर्धाको सेमिफाइनल पुगेको छ । पुरुष स्पर्धाको आइतबार राति भएको क्वार्टरफाइनल खेलमा ब्राजिलले कोलम्बियालाई २-० गोलले हरायो ।

ब्राजिलको जितमा नेमार र लुवानले एकएक गोल गरे । नेमारले प्रतियोगितामा व्यक्तिगत रूपमा पहिलो गोल गरेका हुन् । कप्तानसमेत रहेका नेमारले १२ औं मिनेटमा घरेलु टोलीलाई अग्रता दिलाएका थिए । नेमारले २५ यार्ड टाढाबाट फ्रिकिकमा गोल गरेका हुन् । नेमारकै पासमा लुवानले ८३ औं मिनेटमा गोल गर्दै ब्राजिलको अग्रता दोब्बर बनाएका थिए ।

ब्राजिल लगातार तेस्रो पटक ओलम्पिक फुटबलको सेमिफाइनल पुगेको हो । ओलम्पिक खेलाउनकै लागि ब्राजिलले नेमारलाई कोपा अमेरिकामा टोलीमा समावेश गरेको थिएन । सानै उमेरमा चर्चाको शिखरमा पुगेका नेमारबाट ब्राजिलको ठूलो अपेक्षा गरेको छ ।

नेमारले हालसम्म सिनियर राष्ट्रिय टोलीका लागि पनि उपाधि जित्न सकेका छैनन् । नेमार क्वार्टरफाइनलमा गम्भीर घाइते भएपछि गत सिनियर विश्वकपका अघिल्ला खेलमा उनको साथ नपाएको ब्राजिल सेमिफाइनलमा जर्मनीसँग ७-१ गोलले पराजित भएको थियो । सिनियर विश्वकपमा सर्वाधिक ६ पटकको विजेता ब्राजिलले ओलम्पिक फुटबलमा भने हालसम्म स्वर्ण पदक जित्न सकेको छैन ।

ओलम्पिक फुटबलमा ब्राजिलले हालसम्म तीन पटक रजत र दुई पटक कांस्य जितेको छ । लन्डन ओलम्पिकमा ब्राजिल उपविजेतामै सीमित भएको थियो । त्यतिबेला नेमारले निकै चर्चा कमाए पनि फाइनलमा जम्न सकेनन् । यस पटक ओलम्पिकमा ब्राजिलको सुरुवात राम्रो हुन सकेको थिएन ।

समूगहत चरणको अघिल्ला दुई खेलमा बराबरीमा सीमित भएको घरेलु टोली समूहगत चरणको अन्तिम खेलमा डेनमार्कलाई ४-० गोलले हराएर अन्तिम आठमा पुगेको हो । ब्राजिलले सेमिफाइनलमा होन्डुरसको सामना गर्नेछ । होन्डुरसले क्वार्टरफाइनलमा दक्षिण कोरियालाई १-० गोलले हरायो । होन्डुरसको जितमा अलबर्थ एलिसले ५९ औं मिनेटमा निर्णायक गोल गरे । होन्डुरस ओलम्पिक फुटबलमा पहिलो पटक सेमिफाइनल पुगेको हो ।

यसैगरी विश्वकप विजेता जर्मनी र अफ्रिकी टोली नाइजेरिया पनि अन्तिम चारमा पुगेका छन् । जर्मनीले युरोपियन च्याम्पियन पोर्चुगललाई ४-० गोलले हरायो । डेनमार्कविरुद्धको खेलमा नाइजेरिया २-० गोलले विजयी भयो । जर्मनीको जितमा सर्ज जिनाब्री, म्याथियस गिन्टर, डेभी सेल्क र फिलिप म्याक्सले एकएक गोल गरे । पहिलो हाफको इन्जुरी समयमा पहिलो गोल गरेको जर्मनीले मध्यान्तरपछि तीन गोल थपेको हो । ओलम्पिक फुटबलमा जर्मनी हालसम्म फाइनलसम्म पनि पुग्न सकेको छैन ।

जर्मनीले सेमिफाइनलमा नाइजेरियाको सामना गर्नेछ । डेनमार्कविरुद्ध नाइजेरियालाई जिताउन जोन ओबी मिकेल र अमिनु उमारले एकएक गोल गरे । २९ वर्षीय अनुभवी खेलाडी मिकेलले १६ औं मिनेटमा टोलीलाई अग्रता दिलाएका थिए । मिकेलकै पासमा उमारले ५९ औं मिनेटमा टोलीको अग्रता दोब्बर बनाए । नाइजेरियाले सन् १९९६ को एट्लान्टा ओलम्पिकमा स्वर्ण र सन् २००८ को बेइजिङ संस्करणमा रजत पदक जितेको थियो ।

महिलातर्फको क्वार्टरफाइनलमा ब्राजिलले अस्ट्रेलियालाई सडन डेथमा पराजित गर्‍यो । निर्धारित र अतिरिक्त समयको खेल गोलरहित बराबरीमा सकिएको थियो । टाइब्रेकरमा दुवै टोलीले सुरुका चार प्रहारमा गोल गरे पनि पाँचौं प्रहार असफल भयो । त्यसपछि दुवै टोलीले लगातार दुई प्रहारमा गोल गरे । आठौं प्रहारमा ब्राजिलले गोल गरे पनि अस्ट्रेलिया असफल बन्यो । अस्ट्रेलियाका अलान्ना केन्नेडीको प्रहार गोल हुन सकेन ।

ओलम्पिक महिला फुटबलमा पनि ब्राजिलले हालसम्म स्वर्ण पदक जित्न सकेको छैन । सन् २००४ र सन् २००८ को संस्करणमा फाइनलसम्म पुगे पनि ब्राजिल रजत पदकमै सीमित भएको थियो । ब्राजिलले सेमिफाइनलमा स्विडेनको सामना गर्नेछ । अर्को सेमिफाइनलमा जर्मनीले क्यानडाको सामना गर्नेछ । अर्को खेलमा क्याडनाले फ्रान्सलाई १-० गोलले हरायो । क्यानडाकी सोफी स्मिटले ५६ औं मिनेटमा गरेको गोल निर्णायक बन्यो । क्यानडाले अघिल्लो ओलम्पिकमा जितेको कांस्य पदक नै महिला फुटबलको हालसम्मकै ठूलो सफलता हो ।