महराले आज चिनियाँ विदेशमन्त्री भेट्ने
![महराले आज चिनियाँ विदेशमन्त्री भेट्ने](https://annapurnapost.prixacdn.net/media/albums/Krishna-Bahadur-Mahara--57b26777b00f62.48068070_1UVnJR6SG4.jpg)
काठमाडौंः चीन भ्रमणमा रहेका सरकारका विशेषदूत उपप्रधानमन्त्री कृष्णबहादुर महराले मंगलबार चिनियाँ विदेशमन्त्री वाङ यीसँग भेट्ने भएका छन् ।
उपप्रधानमन्त्री महरा र विदेशमन्त्री वाङबीच बेइजिङस्थित चिनियाँ विदेश मन्त्रालयमा भेटवार्ता तय भएको छ । ‘अन्य कुन तहका चिनियाँ अधिकारीसँग भेट हुन्छ तय भइसकेको छैन', बेइजिङस्थित कार्यवाहक नेपाली राजदूत हरीश्चन्द्र घिमिरेले अन्नपूर्णसँग भने ।
चीनको छेङ्दु हुँदै मन्त्री महरा सोमबार साँझ बेइजिङ पुगेका हुन् । बेइजिङ विमानस्थलमा मन्त्री महरालाई चिनियाँ विदेश मन्त्रालयका उच्च अधिकारी र कार्यवाहक राजदूत घिमिरेले स्वागत गरेका थिए । अर्थमन्त्री महरा दुई दिनसम्म बेइजिङमा रहनेछन् । महराका साथमा परराष्ट्र मन्त्रालयका सहसचिव झविन्द्र अर्याल छन् ।
चिनियाँ समाचार संस्था सिन्ह्वासँगको कुराकानीमा मन्त्री महराले चीनसँगको सम्बन्धलाई अझ विस्तार गरी नयाँ उचाइमा पुर्याउन नेपाल सरकार इच्छुक रहेको प्रतिक्रिया दिएका छन् ।
‘पूर्ववर्ती ओली सरकारका कार्यकालमा भएका पारवहन सम्झौतालगायत अन्य सबै महत्वपूर्ण सम्झौता कार्यान्वयन गर्न नेपाल सरकार प्रतिबद्ध रहेको जानकारी गराउन चीन भ्रमणमा छु', मन्त्री महराले भनेका छन् ।
मन्त्री महराले चिनियाँ राष्ट्रपति सी जिनपिङको नेपाल भ्रमण होस् भन्ने सरकारको चाहना रहेकोसमेत बताए । ‘चिनियाँ अधिकारीसमक्ष राष्ट्रपति सीको भ्रमणका लागि निमन्त्रणापत्र हस्तान्तरण गर्नेछु', उनले भने ।
चीनले आफू रेल, सडक सञ्जाल र समुद्री मार्गबाट अन्य मुलुकसँग जोडिनका लागि अघि सारेको ‘वान बेल्ट वान रोड' अवधारणामा नेपाल सहभागी हुने मन्त्री महराले सिन्ह्वालाई बताएका छन् ।
नेपालमा नयाँ सरकार बनेपछिको अवस्था, संविधान कार्यान्वयनमा चीनको सहयोगलगायतका विषयमा भ्रमणमा कुरा हुने उनले बताए । चीनसँगको ऐतिहासिक सम्बन्ध नयाँ उचाइमा पु¥याउन आफूहरूले चाहेको महराले बताए ।
‘चीन र भारतसँग सन्तुलित सम्बन्ध राखेर उनीहरूले गरेका आर्थिक विकासबाट लाभ लिन चाहन्छौं', उनले भने । सरकारले एक साताअघि महरालाई चीन र अर्का उपप्रधानमन्त्री विमलेन्द्र निधिलाई भारतका लागि विशेषदूतका रूपमा पठाउने निर्णय लिएको थियो ।
मन्त्री निधि सम्भवतः बिहीबार भारत जानेछन् । भारतीय स्वतन्त्रता दिवस सोमबार परेका कारण भ्रमण केही ढिला भएको भारतीय राजदूत रञ्जित रेले बताए । निधिको भारत भ्रमणपछि प्रधानमन्त्री पुष्पकमल दाहालको भारत भ्रमणको मिति तय हुने भारतीय राजदूत रेले अन्नपूर्णलाई बताए ।
‘नेपालका राष्ट्रपति भारत जाने र हाम्रा राष्ट्रपति नेपाल आउने विषयमा समेत भ्रमणमा कुराकानी हुनेछ', उनले भने । भारतीय राष्ट्रपति प्रणव मुखर्जीलाई नयाँ संविधान जारी भएको वार्षिकी अर्थात् असोज ३ का अवसरमा नेपाल भ्रमण गराउने पक्षमा नेपाल सरकार देखिएको छ ।
‘नेपालको नयाँ संविधानमा गम्भीर रिजर्भेसन राख्दै नाकाबन्दी लगाएको भारतले संविधान जारी भएको वर्ष दिनको अवसर पारेर उच्चस्तरीय भ्रमण गराउन राजी होला भनिहाल्न मुस्किल छ । तर प्रयास भइरहेको छ', एक अधिकारीले भने ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)