संसद्‌मा खाजा खर्चःसांसदभन्दा कर्मचारीलाई डेढ गुणा बढी

काठमाडौंः खाजा र खानाका लागि दिइने कुपनमा व्यापक अनियमितता भेटिएपछि संसद् सचिवालयले भदौ १ गतेदेखि ‘कुपन सिस्टम’ बन्द गर्ने निर्णय गरेको छ । समितिका बैठकमा चियामात्र खुवाउने र कुपनको सट्टा सांसदलाई खाजा र खानाबापत दैनिक चार सय रुपैयाँ दिने निर्णय सचिवालयले गरेको छ ।

समितिको बैठक बस्दा एकजना नेताको पछाडि दर्जनौं सुरक्षाकर्मी, सहयोगी र ड्राइभरलाई पनि कुपन दिनुपर्ने, कर्मचारीलाई छुट्टै खाजा खर्च दिइए पनि कुपनबाटै खाजा र खाना खाने गरेको तथा कुपनको व्यापक दुरुपयोग हुने गरेको भन्दै कुपन सिस्टम बन्द गर्नुपरेको सभामुख ओनसरी घर्तीमगरको सचिवालयले जनाएको छ । सभामुख घर्तीले आर्थिक मितव्ययिता अपनाउन आफूले यस्तो निर्णय गरेको विभिन्न दलका सचेतकहरूसँगको छलफलमा बताएकी छन् । संसद् सचिवालयका एक कर्मचारीले एक दिनमा तीन हजार पाँच सयसम्म कुपन बाँडिएको र कुपनमा ठूलो रकम खर्च भइरहेको बताए ।

सचिवालयले सांसदलाई खाजा र खानाबापत नगद दिने निर्णय गरे पनि संसद्का कर्मचारीले पाइरहेको भन्दा निकै कम छ । संसद्का सबै तहका कर्मचारीले दैनिक ६ सय रुपैयाँ खाजा खर्च पाउँछन् भने बिदाको दिन एक सय ५० रुपैयाँ थप पाउँछन् ।

 एक दिनमा तीन हजार पाँच सयसम्म खाना कुपन बाँडेर व्यापक दुरुपयोग भएको पाइएपछि सचिवालयले सांसदलाई खाजा र खानाबापत नगदै दिने निर्णय गरेको छ।

तर सांसदले भने समिति बैठक बसेमा चार सयमात्र पाउनेछन् । ‘बिहान बैठक बसे सांसदलाई चार सय र साँझ ७ बजेपछि बैठक बसे थप चार सय रुपैयाँ खाना र खाजा खर्चबापत दिने निर्णय भएको हो’, सभामुखका प्रेस सल्लाहकार बबिन शर्माले भने । बिहान र साँझ बैठक बस्यो भने सांसदले आठ सय पाउनेछन् ।

सभामुख घर्तीले आर्थिक मितव्ययिता, समितिको कार्यक्षेत्रलगायत विषयमा मंगलबार समितिका सभापतिहरूसँग छलफल गरेकी छन् । छलफलमा केही सभापतिले समिति बैठकमा चियासँग बिस्कुट पनि व्यवस्था गर्न माग गरेको स्रोतले बतायो । यस्तै केही सभापतिले समितिको बैठक कक्ष निकै साँघुरो रहेको भन्दै सभामुखसँग गुनासो पोखेका थिए ।

‘कुन समितिको कुन बैठक कक्ष भन्ने छैन । भएका बैठक कक्ष पनि व्यवस्थित छैनन् भन्ने कुरा राख्यौं’, सुशासन समितिका सभापति मोहनसिंह राठोरले भने । त्यस क्रममा एउटै विषयमा विभिन्न समितिले हात हाल्ने गरेको भन्दै जुन समितिको कार्यक्षेत्र हो, त्यसले मात्र हेर्नुपर्ने भन्दै केही सभापतिले गुनासो पोखेका थिए । समितिका बैठकमा शीर्ष नेताहरू नआउने गरेको भन्दै प्रमुख सचेतकमार्फत शीर्ष नेताहरू आउने वातावरण मिलाइदिन पनि केही सभापतिहरूले सभामुखसँग आग्रह गरेका थिए ।

फेरि ककसको तयारी

विगत संविधानसभामा निकै विवादमा परेको महिला सभासद्हरूको समूह (ककस) फेरि ब्युँताउने पहल भएको छ । विभिन्न दलका महिला सांसदहरूले सभामुख घर्तीसँग भेट गरी ककस गठनका लागि सहयोग गर्न आग्रह गरिरहेको संसद् सचिवालय स्रोतले बतायो ।

कांग्रेसकी ईश्वरी न्यौपाने, सीता गुरुङ, एमालेकी अष्टलक्ष्मी शाक्य, एमाओवादीकी सीता नेपालीलगायतले ककस गठनका लागि पहल गरिरहेको स्रोतले बतायो । उनीहरूले यस सम्बन्धमा मंगलबार ककस गठनको तयारी गरे पनि सभामुखसँग भेट नभएको उनको सचिवालयले जनाएको छ ।

एमाले प्रमुख सचेतक भानुभक्त ढकालले पार्टीसँग व्यापक छलफल गरेर मात्र ककसका विषयमा अघि बढ्न उपाध्यक्ष अष्टलक्ष्मी शाक्यलाई आग्रह गरेको स्रोतले बतायो । विघटित संविधानसभामा गठन भएको महिला ककसले एक अन्तर्राष्ट्रिय संस्थाबाट पैसा लिएर संविधान निर्माणमा लबिङ गरेको थियो । ककसको उक्त कार्यको महिला सभासद्हरूले नै विरोध जनाएपछि उक्त रकम सम्बन्धित संस्थालाई नै फिर्ता गरिएको थियो ।