नेविसंघ चुनावमा दुई पक्षीय प्रतिस्पर्धा

काठमाडौंः झन्डै ढेड सातादेखि विवादका कारण अवरोध हुँदै आएको नेपाल विद्यार्थी संघको नेतृत्व चयनका लागि बुधबार चुनाव हुने भएको छ ।
प्रतिनिधि विवाद सहमतिका आधारमा समाधान भएपछि बुधबार बिहान ७ देखि साँझ ७ बजेसम्म चुनाव हुने भएको छ । संघको एक सय २९ सदस्यीय कार्यसमितिका लागि विभिन्न पदमा ६ सयभन्दा बढीले उम्मेदवारी दिएका छन् ।

पटकपटक अधिवेशन घोषणा भएर पनि चुनावमार्फत नेतृत्व चयन हुन नसकेको संघको नौ वर्षपछि पहिलोपटक चुनावमार्फत कार्यसमिति चयन हुन लागेको हो । यसअघि तत्कालीन पार्टी सभापति सुशील कोइरालाले महाधिवेशन गराउन तीनपटकसम्म आयोजक समिति गठन गरेका थिए ।

पार्टीको तेह्रां महाधिवेशनबाट गत चैतमा सभापति चयन भएका शेरबहादुर देउवाले केन्द्रीय समितिको पहिलो बैठकबाटै नेविसंघलगायतका भ्रातृ संस्थाको अधिवेशन गराउने निर्णय गरेका थिए ।

प्रतिनिधि विवादका कारण अधिवेशनको चुनावी प्रक्रियामा केही अवरोध आए पनि अन्ततः शीर्ष नेताहरूबीच सहमति गरेर उक्त विवाद समाधान गरी नेतृत्वका लागि चुनावमा जाने सहमति भएको हो ।

निर्वाचन समितिले मंगलबार साँझ प्रकाशित गरेको उम्मेदवारहरूको अन्तिम नामावलीमा अध्यक्षमा सातजना प्रतिस्पर्धी छन् । पार्टी महाधिवेशनमा जस्तै संघको महाधिवेशनमा पनि सभापति देउवा र नेता रामचन्द्र पौडेल पक्षबीच तीव्र प्रतिस्पर्धा हुने भएको छ । दुवै पक्षले प्यानल बनाएर उम्मेदवारी दिएका छन् । अध्यक्षमा देउवा पक्षबाट नैनसिंह महरले र पौडेल पक्षबाट मनोजमणि आचार्यले उम्मेदवारी दिएका छन् । महर र आचार्य दुवै नेविसंघका पूर्वउपाध्यक्ष हुन् ।

त्यस्तै आनन्द त्रिपाठी, शुभराम बस्नेत, लक्ष्मण आचार्य, बच्चन कार्की र नगेनसिंह ठकुरीले पनि अध्यक्षमा उम्मेदवारी दिएका छन् ।
संघको अर्को महत्वपूर्ण निर्वाचित हुने दुई महामन्त्रीमा देउवा पक्षबाट कुन्दनराज काफ्ले र सरोज थापाले उम्मेदवारी दिएका छन् भने पौडेल पक्षबाट दीपक भट्टराई र हिमालदत्त श्रेष्ठको उम्मेदवारी परेको छ ।

महामन्त्रीमा राजेश ज्ञवाली र शंकर पौडेलले पनि उम्मेदवारी दिएका छन् । निर्वाचित हुने सात प्रदेशबाट एकएकजना र दलित, महिला, जनजाति र मधेसी आरक्षणतर्फका उपाध्यक्षमा पनि चार दर्जनभन्दा बढीको उम्मेदवारी परेको छ ।

उपध्यक्षमा दलितबाट सागर परियार, डम्बरबहादुर सुनार, पदम नेपाली र राम नेपालीको उम्मेदवारी परेको छ । त्यस्तै महिला उपाध्यक्षमा उर्मिला थपलिया, महेश्वरी कुँवर र कृष्णकुमारी बस्नेतको उम्मेदवारी परेको छ । मधेसी उपाध्यक्षमा परमेश्वर शाह, पवन यादव, प्रभुनाथ राउत र मो.अजिद अरसदको उम्मेदवारी परेको छ । जनजाति उपाध्यक्षमा अृमतकुमार श्रेष्ठ, धनबहादुर छन्त्याल, नवीन राई, शिरा थापा, राजेश श्रेष्ठ, रिसा श्रेष्ठसहित ११ जनाको उम्मेदवारी परेको छ ।

प्रदेश नम्बर १ को उपाध्यक्षमा विष्णु कार्की, गोपाल सेढार्इं, विकास केसी, सुभाषा भण्डारीसहित सातजनाको उम्मेदवारी परेको छ । प्रदेश नम्बर २ बाट खगेन्द्र कर्ण, प्रवेशकुमार चौधरी, राम यादव र सञ्जयकुमार यादवको उम्मेदवारी परेको छ । प्रदेश नम्बर ३ बाट भरत खड्का, रामप्रसाद अधिकारी, विनयराज भट्ट, विष्णु पौडेलसहित सातजनाको उम्मेदवारी परेको छ ।

प्रदेश नम्बर ४ बाट सुवास कोइराला, पुष्पा तिवारी, पवन नेपाल, लक्ष्मीभक्त खनालसहित आठजनाको उम्मेदवारी परेको छ । त्यस्तै प्रदेश नम्बर ५ बाट अजय रावल, टंकप्रसाद पाण्डे, पूर्ण केसीसहित १२ जनाको उम्मेदवारी परेको छ । प्रदेश नम्बर ६ बाट कृष्णप्रसाद जैसी, केशरबहादुर शाही, खड्कबहादुर डाँगी र राजीवकुमार केसीको उम्मेदवारी परेको छ भने प्रदेश नम्बर ७ बाट उपाध्यक्षमा ईश्वर मल्ल, राजन कुँवर, सरोज न्यौपानेसहित ६ जनाको उम्मेदवारी परेको छ ।

त्यस्तै कोषाध्यक्षमा अञ्जना अर्याल, उमेश भट्टराई, कमला न्यौपाने, केदार खनाल, टीका श्रेष्ठ, निमा गिरी, विश्वामित्र रिजाल र शिव रिमालको उम्मेदवारी परेको छ ।

त्यस्तै सात प्रदेशबाट एकएकजना, दलित, महिला, जनजाति र मधेसीका साथै उपत्यका र पिछडिएको क्षेत्रबाट निर्वाचित १३ जना सहमहामन्त्रीमा पनि पाँच दर्जनभन्दा बढीको उम्मेदवारी परेको छ ।

प्रत्येक प्रदेशबाट निर्वाचित हुने दुई महिलासहित ६, दलित जनजाति, मधेसी, महिला र उपत्यकाका साथै पिछडिएको क्षेत्रबाट निर्वाचित हुने सदस्यमा पनि सयभन्दा बढीको उम्मेदवारी परेको छ ।

निर्वाचन समितिका अनुसार बुधबार साँझ सात बजे मतदान सकिएलगत्तै कांग्रेस केन्द्रीय कार्यालय सानेपामा मतगणना सुरु हुनेछ ।