बुढीगण्डकी गोरखाको सोती बजारमा पसेपछि...
गोरखाः अबिरल वर्षापछि बढेको बुढीगण्डकी नदी गोरखाको थुमी गाउँ पसेको छ । थुमी गाविसको वडा नम्बर सातमा रहेको सोती बजारमा नदी पसेपछि बजारका चार होटेलमा क्षति पुगेको छ ।
स्थानीय होटल सञ्चालक सपना गुरुङका अनुसार गुरुङले सञ्चालन गरिरहेको फूलबारी होटलमा रहेको कुखुरा तथा बंगुरको खोर नदीले बगाएको छ ।
त्यस्तै नेत्र भट्टको एबीसी होटेलको भान्सा र डाइनिङ बगाएको छ । बाढीले सोमबहादुर गुरुङको कपडा पसल बगाएको छ भने चित्रबहादुर गुरुङको ग्रीन भ्याली होटेलमा क्षति पुगेको छ । त्यस्तै चन्दना अधिकारी बस्ने घरमा पनि बाढीले क्षति पुर्याएको गुरुङले जानकारी दिइन् ।
नदी राति नौ बजेको समयदेखि गाउँ पसेपछि त्यहाँका स्थानीयबासी रातभर जाग्राम बसेका छन् । सोतीमा रहेका २५ घरका बासिन्दा सुरक्षित ठाउँको खोजीमा गाउँ माथिको भिरालो ठाउँमा बसेका छन् । केही स्थानीय भने नजिकै रहेको चर्चमा बसेको गुरुङले बताइन् । उनले भनिन्–'एकाएक सपनाजस्तै भयो गाउँमा बाढी पसेकाले क्षति धेरै भएको छ । यो सपना नै भइदिए हुन्थ्यो जस्तो लागेको थियो । अब कसरी बाँच्ने चिन्ता छ ।'
स्थानीय रातिदेखि सुरक्षित स्थानको खोजी गर्दै सामान ओसारप्रसारमा व्यस्त भएका थिए ।
घटनास्थलमा उद्धारका लागि आरुखेत प्रहरी चौकीबाट प्रहरी पठाइएको प्रमुख जिल्ला अधिकारी नारायणप्रसाद भट्टले जानकारी दिएका छन् । प्रहरीसँगै पहिरो पन्छाउन डोजर पनि पठाइएको भट्टले बताए ।
बाढीले ६ पुल बगायो
गएरातिदेखि परेको अविरल वर्षाका कारण नदीको बहाब बढेपछि लापु गाविसको वडा नम्बर एक र चारका ६ वटा पुल बगाएको छ । भीरकुना गाउँमा एक झोलुङगे र पाँच काठे पुल बगाएको स्थानीय इमानसिंह गुरुङले जानकारी दिए ।
बाढीले घट्टे खोलाको तीन काठे पुल, तातेखोलाको एउटा काठे र एउटा झोलुङे पुल तथा लङ्से खोलको एउटा काठे पुल बगाएको गुरुङले बताए ।
बाढीले पुल बगाएपछि त्यहाँका स्थानीयबासीलाई आवतजावतमा समस्या भएको छ भने गंगाजमुना प्राविमा पढ्ने विद्यार्थी पुल नभएपछि विद्यालय जान पाएका छैनन् ।
प्रतिक्रिया दिनुहोस !
