अनेरास्ववियुमा तीन गुट
काठमाडौंः एमाले निकट अनेरास्ववियु आपसी विवादका कारण फेरि तीन चिरा परेको छ । ६ महिनाअघि सम्पन्न राष्ट्रिय महाधिवेशनमा पार्टी अध्यक्ष केपी शर्मा ओली पक्षको एक समूह र पार्टीका वरिष्ठ नेता माधवकुमार नेपाल तथा झलनाथ खनालको अर्को समूहबीच प्रतिस्पर्धा भएको थियो ।
महाधिवेशनमा एकै प्यानलबाट चुनाव जितेका ओलीपक्षीय अध्यक्ष नवीना लामा र महासचिव ऐन महरबीच अहिले फाटो आएको छ । अध्यक्ष लामाले महाविधेशन सम्पन्न भएको ६ महिना बितिसक्दा पनि विभिन्न विभागमा जिम्मेवारी नतोकेको तथा जिम्मेवारी तोकिएकामध्ये आफू निकटका व्यक्तिमात्र रहेको भन्दै महर पक्षले असन्तुष्टि व्यक्त गरेको छ । महर पक्षले अध्यक्षसँग अनुमति नलिई एकलौटी निर्णयबाट भदौ चारका लागि राष्ट्रिय भेला आयोजना गरेको छ ।
भेला बोलाएको विषयमा अध्यक्षलाई टेलिफोनबाट मात्र जानकारी गराएको महरले बताए । लामा र महर पक्षको मिलनबाट उक्त समूहले गत फागुनमा सम्पन्न २२ औं महाविधेशनमा बहुमत पदमा विजय प्राप्त गरेको थियो । ‘दुई वर्षको कार्यकालका लागि निर्वाचित साथीहरूले ६ महिनासम्म पनि जिम्मेवारी पाएका छैनन् ।
त्यसैमाथि अध्यक्षले कुनै पनि बैठकबाट निर्णय नगराई केही साथीहरूलाई आफूखुसी जिम्मेवारी तोकेकी छन्’, महरले भने, ‘यस्ता गतिविधिले कार्यकर्तालाई अन्योलमा पारेको छ । यस्तो अन्योल हटाउनु महासचिव भएको नाताले मेरो जिम्मेवारी हो । त्यही भएर भेला बोलाएको हुँ ।’
भेलामा ७५ प्रतिशतभन्दा धेरै कार्यकर्ता उपस्थित हुने महरको दाबी छ । अध्यक्ष लामाले भने महरले भेला बोलाएको विषयमा आफूलाई जानकारी नभएको बताइन् । हाल उपत्यकाबाहिर रहेकी लामाले भनिन्, ‘म संगठनकै कामको सिलसिलामा प्युठान आइपुगेकी छु । मेरो अनुपस्थितिमा महासचिवले कुनै पनि निर्णय गर्न सक्दैनन् । भेला बोलाइएको भए पनि यो अनेरास्ववियुको आधिकारिक भेला होइन ।’
आफूले अहिलेसम्म गरेको निर्णय संगठनको विधानअनुसार रहेको दाबी उनले गरिन् । ‘काम गर्ने क्रममा केही कमजोरी भए मूल्यांकन गरेर सुधार्नुपर्छ भन्ने पक्षमा म छु’, लामाले भनिन् ।
अहिले महरको भेला बोलाउने निर्णयमा उपाध्यक्षद्वय सुनिता बराल र महेश बर्तौला तथा सचिवहरू अमृत बुढा, आरसी लामिछाने र समिक बडाल तथा निर्वाचन आयोगका अध्यक्ष तुलसी मैनालीको समूहले समर्थन जनाएको छ ।
एकै प्यानलबाट अध्यक्ष र महासचिव जितेका लामा र महरबीच फुट आएपछि माधव नेपाल पक्षका कार्यकर्ताले भने लामालाई समर्थन गरेका छन् । संगठनमा माधव नेपाल पक्षका तीनजना सचिव तथा अन्य सदस्य छन् ।
नेपाल पक्षको समर्थनमा सचिव बनेका सुदेश पराजुलीले भने, ‘महासचिवले बोलाएको भेला अवैधानिक हो । महासचिवजस्तो व्यक्तिले यस्तो भेला बोलाउनु भनेको संगठनकै बदनाम गराउनु हो । महासचिवले पदीय मर्यादालाई ख्याल गर्न जानेनन् ।’