पहिरो आएपछि २५ घर विस्थापित
धादिङः गाउँमाथिबाट लगातार पहिरो झर्न थालेपछि उत्तरी धादिङको दार्खा गाउँ विकास समिति ८ धार्नामा रहेका २५ घरका परिवार विस्थापित भएका छन । आइतबार राति गाउँमाथिको डाँडो भास्सिएर पहिरो झरेपछि त्रासका कारण गाउँ नै विस्थापित भएको हो ।
लगातारको वर्षाका कारण झरेको पहिरो नरोकिएपछि जोखिममा रहेका परिवारलाई प्रहरीको सहयोगमा आइतबार बिहानै अन्यत्र सारिएको दार्खा प्रहरीले जनाएको छ । धार्ना गाउँबाट विस्थापित भएकालाई दार्खा गाउँ विकास समिति ८ कै लाङचेत गाउँमा ७५ जना र दार्खा ८ कै भोग्टेनी प्राथमिक विद्यालयमा २५ जनालाई राखिएको स्थानीय शमशेरबहादुर घलेले टेलिफोनमा जानकारी दिए ।
वैशाख १२ गतेको विनाशकारी भूकम्पपछि दार्खाकै अन्यत्र गाउँबाट विस्थापित भएर धार्नामा बस्दै आएकाहरू पनि आइतबार रातिको पहिरोका कारण फेरि विस्थापित भएका छन् । भूकम्पपछि बनाएको अस्थायी टहरा छाडेर विस्थापित हुनु परेपछि महिला, बालबालिका र वृद्धवृद्धाको बिजोग भएको छ ।
‘बर्खा मासकोबीचमा दैनिक पानी परिरहेको छ । भूकम्पपछि बनाएको टहरो पनि छोडेर खुला ठाउँमा आएर बस्नुपयो, न त्रिपाल छ, न अस्थायी शिविर बनाउने केही सामान नै छ’, स्थानीय घलेले भने, ‘भूकम्पपछि जसोतसो अस्थायी टहरा बनाएर गाउँमै बसिरहेका थियौँ, अहिले पहिरोले लखेट्यो । बालबालिका र बूढाबूढीलाई राख्न समस्या भएको छ ।’
पहिरोबाट विस्थापित भएकालाई राख्न स्थानीय युवा र प्रहरीको सक्रियतामा सोमबार पाँचवटा त्रिपाल गाडेर सामूहिक आवास बनाइए पनि थप तथा सामग्री नहुँदा समस्या भएको छ ।
विस्थापित भएकालाई सहयोग गर्न मंगलबार पनि दार्खा प्रहरीचौकीबाट प्रहरी परिचालन भए पनि शिविर बनाउने कुनै स्रोत साधन नहुँदा समस्या भएको छ ।
पहिरोका कारण गाउँ नै बगाउने जोखिम भएपछि त्यहाँबाट विस्थापित भएकाहरूलाई लाङचेतकै स्थानीयको तीन रोपनी खाली जग्गामा राख्ने तयारी भइरहेको दार्खाकै स्थानीय सानुकान्छा तामाङले बताए ।
पानी पर्नासाथ पहिरो झर्न सुरु हुने र गाउँभन्दा तल पनि पहिरो जान सुरु भएकाले पहिरोको अत्यन्तै जोखिम रहेका टोलका स्थानीयलाई प्रहरीकै अग्रसरतामा अन्यत्र सारिएको हो ।
भूकम्पले विस्थापित भएकाहरू पहिरोले फेरि विस्थापित
विस्थापितलाई खानभन्दा पनि बासको समस्या
गाउँको तलमाथि नै पहिरो जान थालेपछि धार्नाको सुरक्षित भनिएका टोलका स्थानीय पनि दिनभर खेतबारीमा काम गर्ने र राति नजिकैको सुरक्षित स्थलमा गएर बस्ने गरेको स्थानीय मरिचमान तामाङले बताए । पहिरोको जोखिम भएपछि विस्थापित भएकालाई खानेकुराको समस्या नभए पनि बस्न समस्या भएको छ । मरिचमानले भने, ‘पहिरोले घर नै बगाएको छैन । खानेकुरा त घरबाट झिकेर लैजान सकिन्छ तर एकैपटक धेरैजना गाउँ छाड्नुपर्दा बस्ने ठाउँको समस्या भएको छ ।’
सदरमुकाम धादिङबेसीबाट दुई दिनको पैदल दूरीमा रहेको दार्खा गाविसमा गत वैशाख १२ गतेको विनाशकारी भूकम्पबाट पनि धेरै मानिस गाविसभित्रै विस्थापित भएका थिए । हिउँको समयमा दार्खामा गाडी पुगे पनि बर्खायामा यातायातका साधन प्रायः ठप्प नै हुने गरेको छ । सवारीसाधन नचल्दा पहिरोबाट विस्थापित भएकालाई त्रिपाल र शिविर बनाउन सामान पठाउन सकिएको छैन ।