सम्बन्धको दायरा थप्न चीन इच्छुक

काठमाडौंः नेपालमा विपत्तिमा उद्धार, पूर्वाधार निर्माणलगायत पाँच महŒवपूर्ण क्षेत्रमा चीनले सहयोग विस्तार गर्ने प्रतिबद्धता जनाएको छ । प्रधानमन्त्रीका विशेष दूतका रूपमा बेइजिङमा रहेका उपप्रधानमन्त्री कृष्णबहादुर महरासँगको भेटमा चिनियाँ प्रधानमन्त्री ली खछ्याङले बुधबार उक्त प्रतिबद्धता व्यक्त गरेका हुन् ।

नेपालसँग व्यापार, कनेक्टिभिटी र राहत पुनर्निर्माणमा सघाउने योजनासमेत चिनियाँ प्रधानमन्त्रीले उपप्रधानमन्त्री महरासँग बताएका छन् ।
चीनले यी महत्वपूर्ण विषयमा सहयोग विस्तारको आश्वासनसँगै नेपालसँग भएका सहमति कार्यान्वयन र उसको महŒवाकांक्षी ‘वान बेल्ट वान रोड’ परियोजनामा नेपालको प्रतिबद्धतासमेत खोजेको छ ।

चिनियाँ सरकारी समाचार एजेन्सी सिन्ह्वाका अनुसार उपप्रधानमन्त्री महरासँगको भेटमा प्रधानमन्त्री लीले चीनले अघि सारेको ‘वान बेल्ट वान रोड’ रणनीतिमा नेपालको प्रतिबद्धता खोजेका थिए । नेपालले सन् २०१४ मा ‘वान बेल्ट वान रोड’ रणनीतिमा सहभागी हुने समझदारीपत्रमा हस्ताक्षर गरे पनि सहभागी हुने विषयमा ठोस निर्णय लिनसकेको छैन ।

उपप्रधान तथा अर्थमन्त्री महराले चीनसँगको सम्बन्धलाई नेपालले प्राथमिकतामा राखेको बताउँदै एक चीन नीतिप्रतिको प्रतिबद्धता दोहो¥याएका छन् ।
सिन्ह्वाका अनुसार महराले चीनसँगको सम्बन्धलाई सहकार्य र समन्वयबाट अझै सुदृढ गर्दै लगिने बताउँदै नेपाल र चीनबीच विगतमा भएका सहमति र सम्झौताहरू कार्यान्वयन गर्ने स्पष्ट पारेका थिए ।

महराले नेपाल संविधान कार्यान्वयनको चरणमा रहेकाले चीनबाट महत्वपूर्ण सहयोगको अपेक्षा गरिएको बताए । चिनियाँ प्रधानमन्त्री लीले विकास र स्थिरताको मार्गमा नेपाल अघि बढोस् भन्ने सदिच्छा व्यक्त गरे । ‘संविधान कार्यान्वयनमा सबै दलहरूबीच सहमति हुनेछ भन्ने हाम्रो विश्वास छ’, उनले भनेका थिए, ‘नेपालको स्थिरता र विकासमा चीन सधैं असल छिमेकीका रूपमा सहयोग गर्न तयार छ ।’

पूर्वप्रधानमन्त्री केपी शर्मा ओलीको चीन भ्रमणका क्रममा भएका पारवहन र यातायात सम्झौता इमानदारीका साथ कार्यान्वयन गर्न नेपाल तयार रहेको महराले बताएको जानकारी भेटमा सहभागी परराष्ट्र मन्त्रालयका सहसचिव झविन्द्र अर्यालले अन्नपूर्णलाई दिए ।

अर्यालका अनुसार महराले चिनियाँ राष्ट्रपति सी जिनपिङ र प्रधानमन्त्री लीलाई नेपाल भ्रमणको निमन्त्रणापत्र हस्तान्तरण गरे । चिनियाँ प्रधानमन्त्रीले निमन्त्रणाका लागि धन्यवाद दिँदै उच्चस्तरीय भ्रमणका लागि दुवै देशका विदेश मन्त्रालयबीच आवश्यक समन्वय जारी रहने बताएको अर्यालले उल्लेख गरेका छन् ।

‘नेपालमा नयाँ सरकार बनेसँगै चीनले नेपालसँगको सम्बन्धलाई उच्च महŒव दिएको छ’, भेटमा चिनियाँ प्रधानमन्त्री लीले भने ।

चिनियाँ प्रधानमन्त्रीले नेपालसँग मित्रता, इमानदारी र पारस्परिक हितका आधारमा द्विपक्षीय सम्बन्ध अघि बढाउने उल्लेख गर्दै एसिया क्षेत्रकै शान्ति, स्थिरता र समृद्धिका लागि काम गर्ने बताएको सिन्ह्वाले उल्लेख गरेको छ । उनले नेपाल र चीनबीचको सम्बन्ध आगामी दिनमा अझै प्रगाढ हुने विश्वास राखेका थिए । ‘नेपाललाई सकेको सहयोग गर्न चीन तयार छ’, लीले भनेका थिए ।

मन्त्री महराले नेपालको सामाजिक र आर्थिक विकासमा चीनको निरन्तर सहयोगका लागि धन्यवाद दिँदै आगामी दिनमा पनि सहयोग निरन्तर रहने अपेक्षा गरे । उनले चिनियाँ उच्च नेतृत्वको नेपाल भ्रमण चाँडै हुने अपेक्षा राखेको अर्यालले बताए ।

मन्त्री महराले चिनियाँ कम्युनिस्ट पार्टीका विदेश विभाग प्रमुख सङ ताओसँग बुधबारै भेटेका छन् । उनले मंगलबार चिनियाँ विदेशमन्त्री वाङ यीसँग भेटेका थिए ।