लिंग परिवर्तनपछि एनी...

विराटनगरकी एनी लामा पढाइको सिलसिलामा चार वर्षअगाडि मात्रै काठमाडौं आएकी हुन् । काठमाडौंको वातावरण र यहाँ मानिसले तेस्रो लिंगीलाई हेर्ने नजरले गर्दा उनले पढ्ने आँटसम्म पनि गर्न सकिनन् । तेस्रो लिंगीको क्षेत्रमा काम गर्ने संस्थाका बारेमा थाहा पाएपछि उनी नीलहीरा समाजमा पुगिन् । त्यहाँ करिब दुई वर्षजति कार्यक्रम सहायकका रूपमा काम गरिसकेपछि उनमा आत्मविश्वास पनि बढ्दै गयो ।

उनी जब १६ वर्ष पुगिन्, उनको व्यवहार अरूको भन्दा अलि फरक हुँदै गयो । आफू पुरुष भएर पनि पुरुषप्रति नै उनको आकर्षण बढ्दै गएपछि उनले आफू तेस्रोलिंगी भएको थाहा पाइन् । त्यसपछि उनलाई घरपरिवार र समाजले गर्ने व्यवहार पनि फरक हुन थाले ।

घरमा उनका आमा र दाइमात्रै छन् । आफूले अंशमा पाउने सम्पत्ति बेचेर एक वर्षअगाडि उनले थाइल्यान्डको बैंकक गएर आफ्नो लिंग परिवर्तन गरेर आइन् । यसका लागि करिब आठ लाख रुपैयाँ लाग्यो । तर, उनलाई यसमा कुनै चित्त दुखाइ छैन । महिलाको जस्तै भावना उब्जने मनका साथै शरीर पनि पाएकी छन् अहिले उनले । त्यसैले त गर्वका साथ भन्छिन्,­ ‘अब म केटी हुँ ।' उनलाई फेसन र मोडलिङमा विशेष रुचि रहेको छ । त्यसैले केही महिना अगाडिदेखि नेपाल इन्स्टिच्युट अफ फेसनमा उनी दुई वर्षको फेसन डिजाइनरको डिप्लोमा कोर्स गरिरहेकी छन् ।

नीलहीरा समाजले प्रत्येक वर्ष तेस्रोलिंगीबीच गर्दै आएको ‘मिस पिंक' प्रतियोगितामा उनले यस वर्षको शीर्ष उपाधि जितेकी छन् । ‘मलाई मोडल हुने रहर बच्चैदेखि थियो तर मेरो उचाइ अलि कम भएकाले मैले आँट्न सकेको थिइनँ । यो प्रतियोगितामा रूपमात्रै होइन, आफ्नो प्रतिभा र दिमागी क्षमता पनि देखाउनुपर्ने हुनाले म सफल भएँ', उनले भनिन् । वैशाख १२ को भूकम्पको एक दिनअगाडि भएको मिस ग्ल्यामरस स्टारमा पनि उनी दोस्रो रनरअप भएकी थिइन् ।

सौन्दर्य प्रतियोगिताका यी विभिन्न अनुभव सँगालेर यही नोभेम्बर ९ मा थाइल्यान्डको पतैयामा हुने मिस इन्टरनेसनल ब्युटी क्विनमा उनले पनि सहभागिता जनाउने भएकी छन् । प्रतियोगितामा सकेसम्म जितेर आफ्नो देशको नाम संसारभर चिनाउने उनको इच्छा छ । शीर्ष उपाधि नपाए पनि उत्कृष्ट १० भित्र भने जसरी पनि पर्छुझैं लागेको छ एनीलाई । प्रतियोगितामा स्विम सुट राउन्ड पनि भएकाले आफ्नो शरीरलाई फिट राख्न हाल उनी जुम्बा सिकिरहेकी छन् ।

प्रतियोगितामा लगाइने पोसाक उनी आफैंले डिजाइन गर्ने भएकी छन् । इभिनिङ गाउन र क्लासिक गाउनबाहेक राष्ट्रिय पोसाक पनि लगाउनुपर्ने हुनाले उनले नेपाली धोती चोलोलाई नै थोरै परिस्कृत गर्ने भएकी छन् ।

उनी आफ्नो समूहका साथीहरूसँग कहिलेकाहीँ हिँड्दा कतिपयले छक्का, हिजडालगायतका शब्दले जिस्क्याउने गर्थे । तर, अब आफू केटी भइसकेकाले यस्ता खाले जिस्क्याइले कुनै फरक नपार्ने उनले बताइन् । अहिले उनी आफ्नो पुरुष पार्टनरसँग ‘लिभिङ टुगेदर' सम्बन्धमा बस्दै आएकी छन् । आफूले चाहेको सफलता हात पारेपछि विवाह गरेर घरजम बसाउने उनको धोको छ ।