इन्डोर कर्पोरट क्रिकेट आजदेखि

काठमाडौंः एम एन्ड एम रेमिट यूआईसी कर्पाेरेट कप इन्डोर क्रिकेट प्रतियोगिता शुक्रबारदेखि राजधानीमा सुरु हुँदैछ । अल्टिमेट इन्डोर्स प्रालिको आयोजनामा सञ्चालन हुन लागेको उक्त प्रतियोगिताको यो तेस्रो संस्करण हो । यूआईसी कपको उद्घाटन खेलमा शुक्रबार युनिभर्सल ट्राभल एन्ड टुर्स (यूटीटी) र मोबाइल कम्पनी जेटीईको टोली भिड्दै छन् । कोटेश्वर महादेवस्थानस्थित अल्टिमेट इन्डोर्सकै इन्डोर क्रिकेट हलमा हुने उद्घाटन खेल बिहान ८ बजे सुरु हुनेछ ।

नौ दिनसम्म चल्ने उक्त प्रतियोगितामा विभिन्न २० वटा टोलीले उपाधिका लागि प्रतिस्पर्धा गर्दैछन् । लिगकम नक आउटका आधारमा खेलाइने उक्त प्रतियोगितामा सहभागी २० टोलीलाई पाँच समूहमा विभाजन गरिएको छ । समूहगत चरणको समाप्तिपछि प्रत्येक समूहबाट विजेता र उपविजेता गरी दुईदुई टोली क्वार्टरफाइनलमा प्रवेश गर्नेछन् ।

प्रतियोगिताको फाइनल खेल भदौ ११ गते हुनेछ । दुई वर्षअघि भएको पहिलो संस्करणको उपाधि सेन्चुरी बैंकले जितेको थियो भने गत वर्ष भएको दोस्रो संस्करणको उपाधि हुवावेले हात पारेको थियो । अन्नपूर्ण पोस्ट् राष्ट्रिय दैनिक उक्त प्रतियोगिताको मिडिया पार्टनरको रूपमा रहेको छ ।