आईईएलटीएस दिने विद्यार्थीलाई सजिलो
काठमाडौंः उच्चशिक्षा अध्ययनका लागि विदेश जान चाहने विद्यार्थीका लागि अंग्रेजी भाषाको दक्षता परीक्षण गर्ने इन्टरनेसनल इङ्लिस टेस्टिङ सिस्टम (आईईएलटीएस) परीक्षा सञ्चालन गर्न नेपालमा नयाँ संस्था थपिएको छ ।
यससँगै आईईएलटीएसको तयारीमा बसेका विद्यार्थीलाई फाइदा पुग्ने भएको छ । यसअघि ब्रिटिस काउन्सिल नेपालले मात्र यस्तो परीक्षा सञ्चालन गर्दै आएको थियो ।
काउन्सिलले जस्तै परीक्षा सञ्चालन गर्ने गरी आईडीपी एजुकेसन नेपाल नामक संस्थाको शुक्रबार उद्घाटन गरिएको हो । पछिल्लो समय नेपालबाट उच्चशिक्षा अध्ययनका लागि विदेश जाने विद्यार्थीको संख्या बढिरहेका कारण आईईएलटीएसको परीक्षा दिन ब्रिटिस काउन्सिलमा दर्ता गर्न नपाएर भारतसम्म पुग्नुपर्ने बाध्यता छ ।
आईडीपीले अब सहज रूपमा आईईएलटीएसको दर्ता र परीक्षा नेपालमै पाइने दाबी गरेको छ । कार्यालय उद्घाटन समारोहमा संस्थाका साउथ एसिया, नर्थ अमेरिका तथा बेलायतका क्षेत्रीय निर्देशक हर्मित पेन्टलले आईडीपीले आईईएलटीएसको तयारी कक्षा र परीक्षा सञ्चालनमा विद्यार्थीलाई विश्वस्तरको सेवा प्रदान गर्ने बताए । विश्वभर नौ हजारभन्दा बढी संस्थाले आईईएलटीएसको परीक्षा सञ्चालनको मान्यता पाएका छन् ।
प्रतिक्रिया दिनुहोस !
