फ्रान्सेली नागरिक चिउरीभिरमा मृत भेटिईन
स्याङ्जाः फ्रान्सका एक नागरिक स्याङ्जाको चिरीभीरमा मृत अवस्थामा फेला परेका छन् । उनको शवसहित साथमा रहेको झोला, राहदानी र नागरिकता पनि फेला परेको छ । सामान फेला परेको एक हप्तापछि उनको शव भेटिएको थियो ।
फ्रान्सेली नागरिक मेलानी परनान्डे ओडेटको नागरिकता, पासपोर्ट तथा अन्य बन्दोबस्तीका सामान सहित शव भेटिएकाले मृतक ओडेट नै रहेको हुनसक्ने प्रहरी निरीक्षक उत्तमप्रकाश बरालले जानकारी दिए । उनी लुम्बिनी हिँडेको वा फर्केको हुनुसक्ने प्रहरीको अनुमान छ ।
गत शुक्रबार बाख्रा चराउन गएका स्थानीयले पासपोर्टसहितको झोला भेटेपछि प्रहरीलाई खबर गरेका थिए । प्रहरीले सोही क्षेत्रमा गरेको खोजतलासको क्रममा सात दिनपछि शव गलेको अवस्थामा फेला परेको थियो । सोही क्षेत्रको भीरबाट सिनोजस्तो गन्ध आएपछि प्रहरीले भीरमा पुगेर खोजतलास गरेको थियो ।
अत्यन्तै भिर भएको ठाउमा मृत शरिर रहेकोले पोखराबाट आएको रेस्क्यू टोलीले शव निकालेको हो । सडेगलेको शरीर, केही कपाल झरेको अवस्थामा मेलानीको शव थियो ।
उनले लगाएको लुगा, गरगहना र कपालको आधारमा उक्त शव मेलानीको भएको यकिन गर्दै थप अनुसन्धान र पोस्टमार्टमका लागि शव काठमाडौं स्थित शिक्षण अस्पताल महाराजगंजमा पठाइएको छ ।
घटनाबारे प्रहरीले थप अनुसन्धान गरिरहेको र के कारणले उनको मृत्यु भएको भन्ने बारेमा अनुसन्धान गरिरहेको जिल्ला प्रहरी कार्यलय स्याङ्जाका प्रहरी उपरीक्षक देवबहादुर बोगटीले जानकारी दिए ।