बजेट सदुपयोग गर्न चनाखो बन्दै गाउँले

बझाङः गाविसको बजेट राजनीतिक भागबन्डा हुँदा हिनामिना हुने गरेको जनगुनासो आएपछि बझाङमा अहिले गाउँलेहरू आफैं गाविसको बजेट लेखाजोखा गर्न सक्रिय भएका छन् ।

स्थानीय तहमा बनाएका योजना, यसमा छुट्याइएको रकम र पारदर्शिता तथा उपलब्धिका बारेमा स्थानीय चनाखो बन्न थालेका छन् । गाविसले गाविसस्तरमा गर्ने वार्षिक समीक्षा बैठक र सार्वजनिक सुनुवाइ कार्यक्रममा योजना लिएका अध्यक्ष र गाविस सचिवलाई उपभोक्ता समितिले योजनाको प्रभावकारी कार्यन्वयन गराउन सजग गराउन थालेका हुन् ।

कँडेल गाविसको तोलेनीमा गाविसले गरेको सार्वजनिक सुनुवाइ कार्यक्रममा यहाँका उपभोक्ताले गाविसले खर्च गरेको रकमअनुसार उपलब्धि नभएको गुनासो गरे । स्थानीय लीला सुनुवारले गाउँ परिषद्मा नेता र टाठाबाठाले बजेट विनयोजन गर्ने हुँदा दलित समुदायले रकम नपाएको गुनासो गरिन् ।

लक्षित वर्गअन्तर्गत बालबालिकाको रकम गाविसका सामाजिक परिचालकले खर्च गरेको हुँदा कार्यक्रममा गुनासो आएपछि खर्च हुन बाँकी रहेको उनले सुनाए । नागरिक वडा मञ्चमा आउने बजेट सबै वडामा नपुगेको स्थानीय हिक्मत सिंहले बताए ।

वकिलबहादुर सिंहले गाविसको बजेटले गाउँमा जति विकास हुनुपर्ने हो त्यति नभएको बताए । तेस्रो पक्षबाट गरिएको सार्वजनिक सुनुवाइमा गाविस सचिव गगन ऐडीले परिषद्बाट विनियोजन भएका योजनाको रकम उपभोक्ताको खातामा गएको तर उपभोक्ता समितिले यसको खर्चको बिल भर्पाई र प्रगति प्रतिवेदन गाविसमा नबुझाएको बताए ।

स्थानीयले यसरी योजना तथा कार्यक्रमको लेखाजोखा गर्दा रकम हिनामिना कम हुने उनले बताए ।

स्थानीय निकायको सार्वजनिक सुनुवाइ कार्यविधिअनुसार तेस्रो पक्षबाट सार्जजनिक सुनुवाइ गर्ने प्रावधान भएकाले हाल गाविस, नगरपालिका र जिविसले तेस्रो पक्षबाट सार्वजनिक सुनुवाइ गर्दै आएका छन् । यसअघि गाविस आफैंले समीक्षा मात्र गर्ने गरेका थिए ।

ब्यासीका लक्ष्मीराज जोशीले अहिले तेस्रो पक्षबाट सार्वजनिक सुनुवाइ कार्यक्रम भएपछि बजेट पनि सार्वजनिक हुने गरेको र रकम हिनामिना हुन छोडेको बताए ।
गत आर्थिक वर्षमा गाविसले विकासका लागि २३ लाख खर्च गरेको थियो ।