दाइलाई स्वर्ण, भाइलाई रजत
रियो दी जेनेरियोः जारी रियो ओलम्पिक खेलकुदअन्तर्गत ट्रायथलनमा एकै दाजुभाइले स्वर्ण र रजत पदक जितेका छन् ।
प्रतियोगिताअन्तर्गत बिहीबार भएको प्रतिस्पर्धामा बेलायतका ब्राउन्ली दाजुभाइ एलिस्टेयर र जोनाथनले स्वर्ण र रजत पदक जितेका हुन् । दाजु एलिस्टेयरलले स्वर्ण तथा जोनाथनले रजत पदक जिते । एलिस्टेयर जोनाथनभन्दा मात्र दुई वर्षले दाइ हुन् ।
ओलम्पिक खेलकुदमा एकै दाजुभाइले एउटै स्पर्धामा स्वर्ण र रजत पदक जितेको यो ५६ वर्षपछिकै पहिलो घटना हो । एलिस्टेयर र जोनाथन यो सफलता हात पार्ने समग्रमा छैटौं दाजुभाइ बनेका छन् ।
एलिस्टेयर र जोनाथनले चार वर्षअघि आफ्नै देश इङ्ल्यान्डमा भएको ओलम्पिक खेलकुदमा समेत पदक जितेका थिए । यद्यपि त्यस बेला एलिस्टेयरले स्वर्ण जित्दा जोनाथन कांस्यमै रोकिएका थिए । यसपटक जोनाथनले आफ्नो प्रदर्शनमा सुधार ल्याउँदै रजत जितेका हुन् ।
प्रतिस्पर्धामा ब्राउन्ली दाजुभाइले १० किलोमिटरको दौडपछि नै अन्य प्रतिस्पर्धीलाई पछि पारेका थिए । अन्ततः एलेस्टियरले स्विमिङ, साइक्लिङ र दौड सम्मिलित प्रतिस्पर्धाको निर्धारित दूरी एक घन्टा ४५ मिनेट एक सेकेन्डमा पार गर्दै स्वर्ण जितेका हुन् ।
एलेस्टियरले आफ्ना भाइ जोनाथनले भन्दा मात्र ६ सेकेन्डले पहिले दूरी पूरा गर्दै स्वर्ण जितेका थिए । दाजुभाइले नै स्वर्ण र रजत पदक जितेपछि उनीहरूले स्टेडियममै खुसी मनाएका थिए ।
प्रतिस्पर्धा सकिएपछि पनि लामो समय स्टेडियममै रहेर एकअर्कालाई अंकमाल गर्दै उनीहरूले खुसी साटासाट गरेका थिए । ‘म योभन्दा पहिले कहिल्यै पनि यस्तो भावनात्मक बनेको थिइनँ’, जोनाथनले भने, ‘चार वर्षअघि हामीले स्वर्ण र कांस्य जितेका थियौं तर यसपटक स्वर्ण र रजत जितेका छौं ।
यो सफलता हाम्रा लागि निकै नै महŒवपूर्ण छ ।’ जोनाथनभन्दा ४२ सेकेन्ड पछि आइपुगेका दक्षिण अफ्रिकी हेन्री स्कोइमानले कांस्य पदकमा चित्त बुझाए ।
प्रतिक्रिया दिनुहोस !
