ओलम्पिकमा बोल्टलाई आठाैै स्वर्ण
रियो दी जेनेरियोः जमैकन धावक उसेन बोल्टले ओलम्पिक खेलकुदमा आठौं स्वर्ण पदक जितेका छन् । जारी रियो ओलम्पिक खेलकुदअन्तर्गत बिहीबार दुई सय मिटर दौडमा स्वर्ण जित्दै बोल्टले आफ्नो ओलम्पिकको स्वर्ण संख्या आठ पुर्याएका हुन् । यो सफलतासँगै उनी ट्रायक एन्ड फिल्डको प्रतिस्पर्धामा सर्वकालीन महान् खेलाडीको होडमा अघि देखिएका छन् ।
बोल्टले निर्धारित दूरी १९.७८ सेकेन्डमा पूरा गर्दै स्वर्ण जितेका हुन् । उनले स्वर्णका लागि क्यानडाका एन्द्रे डी ग्रास्सीलाई पछि पारेका थिए । स्वर्ण जितेपछि आफ्नो देशको झन्डासहित केही समय ट्र्याकको वरिपरि दौडिएर खुसियाली मनाएका बोल्टले आफू महान् खेलाडी भएको दाबी गरे ।
‘मैले विश्वसामु प्रमाणित गरेको छु कि म नै महान् खेलाडी हुँ’, बोल्टले भने, ‘म रियो ओलम्पिकमा पनि यही तथ्य प्रमाणित गर्न आएको थिएँ । त्यसमा म सफल भएको छु ।’ बोल्टले आफ्ना लागि यो अन्तिम ओलम्पिक खेलकुद भएको समेत बताए ।
पछिल्लो स्वर्णसँगै बोल्ट ओलम्पिक खेलकुदको लगातार तेस्रो संस्करणमा एथलेटिक्सको एक सय, दुई सय र चार गुणा एक सय मिटर दौडमा स्वर्ण जित्ने पहिलो खेलाडी बन्ने अवसरनजिक पुगेका छन् । शनिबार हुने चार गुणा एक सय मिटर दौडमा स्वर्ण जिते उनले त्यो सफलता प्राप्त गर्नेछन् । रियो ओलम्पिक खेलकुदमा उनले यसअघि नै एक सय मिटरमा स्वर्ण जितिसकेका छन् ।
बोल्टले यसअघि सन् २००८ मा चीनको बेइजिङ तथा सन् २०१२ मा इङ्ल्यान्डको लन्डनमा भएको ओलम्पिक खेलकुदको यी तीनै स्पर्धामा स्वर्ण जितेका थिए । बोल्टले ओलम्पिक खेलकुदमा व्यक्तिगत स्पर्धा तथा समग्रमा सर्वाधिक स्वर्ण जित्ने खेलाडीको सूचीमा पनि एक स्थान सुधार गरेका छन् ।
ओलम्पिक इतिहासमा व्यक्तिगत स्पर्धामा स्वर्ण जित्ने खेलाडीको सूचीमा उनी चौथो स्थानमा पुगेका छन् । बोल्टसहित छ खेलाडीले ओलम्पिक खेलकुदको व्यक्तिगत स्पर्धामा ६-६ स्वर्ण जितेका छन् भने दुई खेलाडीले सात स्वर्ण तथा एक खेलाडीले आठ र एक खेलाडीले सर्वाधिक १३ स्वर्ण पदक जितेका छन् ।
ओलम्पिक खेलकुदमा समग्रमा बढी स्वर्ण जित्ने खेलाडीको सूचीमा पनि तेस्रो स्थानमा उक्लिएका छन् । उनीसहित आठ खेलाडीले आठ-आठ स्वर्ण जितेका छन् भने तीन खेलाडीले नौ-नौ तथा एकले २३ स्वर्ण जितेका छन् । व्यक्तिगत र समग्रमा दुवैतर्फ सर्वाधिक स्वर्ण जित्ने खेलाडीको सूचीको शीर्ष स्थानमा अमेरिकी पौडीबाज माइकल फेलप्स रहेका छन् ।
ओलम्पिक खेलकुदको व्यक्तिगत स्पर्धामा १३ तथा समग्रतर्फ २३ स्वर्ण पदक जित्ने खेलाडी फेलप्स नै हुन् । चर्चा र प्रदर्शनको हिसाबले फेलप्सपछिको सर्वाधिक सफल खेलाडी मानिएका बोल्टले ओलम्पिक अेलकुदमा आठौं प्रयासमा आठौं स्वर्ण जितेका हुन् । बेइजिङ ओलम्पिकबाट ओलम्पिक खेलकुदमा प्रतिस्पर्धा गर्न सुरु गरेका बोल्टले त्यसयता आफू सहभागी भएको स्पर्धामा आफ्नो एकछत्र राज गर्दै आइरहेका छन् ।
प्रतिक्रिया दिनुहोस !
