मनास्लु पदमार्ग सरसफाई

गोरखाः मनास्लु आरोहण गर्ने मौसम नजिकिदै जाँदा मनास्लु क्षेत्रका बासिन्दाले आरोहण गर्ने पदमार्ग र बेसक्याम्प सरसफाइ गरेका छन् । सामागाउँ, ल्हो, प्रोक र बिही गाविसका बासिन्दाले शुक्रबार बेस क्याम्प र बाटो सरसफाइ गरेको नेपाल पर्वतारोहण संघ, मनास्लु च्याप्टरका संयोजक लाक्पाडुण्डुप लामाले जानकारी दिए ।

सामागाउँ गाविसमा पर्ने बेस क्याम्प सफा गर्न ४० जनाको समूह गएको सामागाउँका वीरबहादुर लामाले जानकारी दिए । त्यस्तै ६० जनाको समूहले सामागाउँमा फोहर ब्यबस्थापन गर्ने खाल्डो निर्माण गरेको उनले बताए । 'बेस क्याम्पमा भेटिएका फोहरलाई बोरामा बोकेर सामागाउँमा बनाएको खाल्डोमा ल्याएर व्यवस्थापन गरेका छौं' उनले भने ।

बेस क्याम्पमा प्लास्टिक तथा गोलटिनका फोहरहरु रहेका थिए । विगत तीन बर्षदेखि सरसफाइ नगरेको सो क्षेत्रलाई यसबर्ष सरसफाइ गरिएको सामागाउँकै मिङमार लामाले जानकारी दिए । सरसफाइ कार्यक्रमका लागि यसबर्ष नेपाल पर्वतारोहण संघबाट पनि केही आर्थिक सहायता प्राप्त भएको उनले बताए ।

प्रत्येक वर्ष मनास्लु आरोहण गर्न करिब डेढ सय जनाको संख्यामा आरोहीहरु आउने गरेको मनास्लु संरक्षण क्षेत्र आयोजनाका प्रमुख राजकुमार गुरुङले बताए ।