एक महिनामै पोकेमनगोले कमायो २५ करोड डलर

काठमाडौं: एक महिनाअघिमात्र सार्वजनिक गरिएको मोबाइल गेम 'पोकेमन गो' ले २५ करोड अमेरिकी डलर आम्दानी गरेको छ । पोकेमन गोले एक महिनाको अवधिमा उक्त रकम आम्दानी गरी विश्व गेमको दुनियाँमै नयाँ रेकर्ड कायम गरेको हो ।

मार्केट रिसर्च कम्पनी 'युगोभ रिपोर्स' ले पोकेमन गोका ५० हजार खेलाडीलाई सहभागी बनाई गरेको सर्वेक्षणअनुसार २० प्रतिशतले पोकेमन गोको एप्समा पैसा खर्च गर्ने गरेका छन् । युगोभका अनुसार यो गेमको एप्सका लागि २६ करोड आठ लाख अमेरिकी डलर भुक्तानी भइसकेको छ । बेलायतमा मात्र एक करोड मानिसले यो गेम खेल्न पैसा तिरेका छन् ।

अमेरिकाका २९ प्रतिशत र जर्मनीका २० प्रतिशत मानिसले यो गेम खेल्न एप्समा पैसा खर्च गरेका अध्ययनले जनाएको छ । यसले अबको केही अवधिमा नै एक अर्ब अमेरिकी डलरभन्दा बढीको कारोबार गर्ने अनुमान गरिएको छ ।

वास्तविक दुनियामा आधारित भएर गेमका रूपमा निर्माण गरिएको यसले स्मार्टफोनको लोकेसन प्रयोग गर्छ, जसका लागी प्रयोगकर्ताले जीपीएस अन गर्नुपर्ने हुन्छ । जीपीएस खोलेर गेम खेल्नुपर्ने भएकाले नै यसमा बढी पैसा खर्च भएको हो ।

केही दिन अघिमात्र यो गेम खेल्दा मोबाइलमा ३७ सय पाउन्डको बिल उठेपछि रियो ओलम्पिक खेलकुदमा सहभागी हुन ब्राजिल पुगेका जापानिज जिम्नास्टिक खेलाडी कोहेई उचिमुरा बेहोस भएको समाचार सार्वजनिक भइसकेको छ ।

रिलिज भएको एक सातामै ट्विटरका दैनिक प्रयोकर्ताको संख्यालाई उछिनेको पोकमेनगोले सामाजिक सञ्जालका साथै मोबाइल गेमको दुनियाँमा विभिन्न रेकर्ड तोडिसकेको छ । यसले एक साताको अवधिमा नै आइफोनको आईओएसमार्फत सबैभन्दा बढी डाउनलोड हुने एपको स्थान बनाएको थियो ।

रिलिज भएको एक सातामै ट्विटरका दैनिक प्रयोकर्ताको संख्यालाई उछिनेको पोकमेनगोले सामाजिक सञ्जालका साथै मोबाइल गेमको दुनियाँमा विभिन्न रेकर्ड तोडिसकेको छ ।

प्रयोगकर्ताले एपमा बिताउने समयका आधारमा समेत यसले ट्विटर, फेसबुक र ह्वाट्एपलाई पछि पारिसकेको छ । अहिले एन्ड्रोइड प्रयोगकर्ताले कम्तीमा ३४ मिनेट र आईओएस प्रयोगकर्ताले कम्तीमा ३१ मिनेट दैनिक यसमा बिताउने गरेको अन्तर्राट्रिय मिडिया टेक क्रन्चले उल्लेख गरेको छ ।

यो गेम अमेरिकामा नै सबैभन्दा ठूलो गेमको रूपमा स्थापित भइसकेको छ । यसले योभन्दा अघि ठूलो गेमको रूपमा स्थापित भएको 'क्यान्डीक्रस' का सक्रिय प्रयोगकर्ताको संख्यालाई पनि एक महिनामै जितिसकेको छ ।

एकपछि अर्को रेकर्ड बनाइसकेको पोकेमनगोलाई इरानले सुरक्षालाई देखाउँदै बन्द गरिसकेको छ । एसियाका अन्य देशले पनि यसलाई बन्द गर्न सक्ने अन्तर्राष्ट्रिय मिडियाले जनाएका छन् ।

के हो पोकेमन गो ?

अमेरिकाको स्थापित कम्पनी 'नियान्टिक' ले निर्माण गरेको यो गेम वास्तविक दुनियामा आधारित गेम हो । यो गेम खेल्ने क्रममा कति प्रयोगकर्ता हराएको समेत समाचार सार्वजनिक भएको छ । सुरुमा बेलायत, अमेरिका, नेदरल्यान्ड्स र युरोपका केही मुलुकमा रिलिज भएको पोकेमन गो अहिले विश्वका ७५ वटा देशमा रिलिज भइसकेको छ ।

एसियन मुलुकमा यो गेम सार्वजानिक हुन बाँकी रहँदै यसले विभिन्न रेकर्ड राखिसकेको छ । नेपाल, भारतजस्ता देशमा यो गेम आधिकारिक रूपमा रिलिज भएको छैन । तर, अवैध डाउनलोड गरी खेल्ने प्रयोगकर्ता भने छन् । यो गेम स्थानीय लोकेसनमा आधारित भएर डिजाइन भएको छ ।

वास्तविक लोकेसनमा उपस्थिति नहुँदा सम्म पोकेमन गो स्टार र टार्गेट भेटिन्न । प्रयोगकर्ताले प्रयोग गरेको स्मार्टफोनको लोकेसनको आधारमा क्यामेरामार्फत यसले प्रयोगकर्तालाई वास्तविक दुनियाँसँग जोड्छ, जसले गर्दा प्रयोकर्ताले स्टार, अन्डा खोज्दै लामो दूरी पनि पार गर्नुपर्छ ।

गेममा प्रयोगकर्तालाई टार्गेट दिइएको हुनेछ । टार्गेट पार गर्न प्रयोकर्ताले वास्तविक लोकेसनमा गएर अन्डा कलेक्ट गर्नुपर्ने हुन्छ । पोकेमन गोले गुगल म्यापमा आधारमा सार्वजनिक स्थानलाई पोकेमन गो स्टोरका रूपमा राखेको छ ।