मोबाइलले बढायो इन्टरनेट प्रयोगकर्ता

काठमाडौं: मोबाइलका कारण नेपालमा इन्टरनेट प्रयोगकर्ताको संख्या बढेको देखिएको छ । मोबाइल प्रयोगकर्ताको संख्या दिनदिनै बढ्दै जाँदा इन्टरनेट चलाउनेको संख्या पनि बढेर एक करोड ३९ लाख पुगेको नेपाल दूरसञ्चार प्राधिकरणले जानकारी दिएको छ ।

प्राधिकरणको वेबसाइटमा राखेको म्यानेजमेन्ट इन्फरमेसन सिस्टम (एमआईएस) प्रतिवेदनअनुसार गत वैशाख महिनासम्ममा विभिन्न माध्यमबाट इन्टरनेट प्रयोगकर्ताको संख्या एक करोड ३९ लाख पुगेको देखिएको हो । प्राधिकरणले विभिन्न ६ वटा सेवाप्रदायकबाट दिइएको यस्तो सेवा नेपालीको जनसंख्याको अनुपातमा ५० प्रतिशतसम्म पुगेको जनाएको छ ।

प्राधिकरणले २०७३ वैशाखसम्मको तथ्यांक राखेर सार्वजनिक गरेको प्रतिवेदनअनुसार सरकारी स्वामित्वको नेपाल टेलिकमका ७४ लाख २९ हजार इन्टरनेट प्रयोगकर्ता छन् । एनसेलका ५७ लाख ९० हजार, इन्टरनेट सेवा प्रदायक (आईएसपी) का एक लाख ५३ हजार, स्मार्ट टेलिकमका एक लाख र यूटीएलका ६३ हजार ग्राहक इन्टरनेट प्रयोगकर्ता रहेको तथ्यांकले देखाएको छ ।

टेलिकमको बजार हिस्सा ५५ प्रतिशत

नेपालमा अहिले दूरसञ्चार सेवामा सरकारी स्वामित्वको नेपाल टेलिकम र निजी क्षेत्रको एनसेलबीच तीव्र प्रतिस्पर्धा देखिएको छ । प्रतिस्पर्धामा अहिलेसम्म नेपाल टेलिकम नै अग्रणी स्थानमा रहेको छ । इन्टरनेट सेवातर्फ टेलिकमको अहिलेको बजार हिस्सा ५४ दशमलब ८७ प्रतिशत रहेको छ भने एनसेलको ४२ दशमलब ४७ प्रतिशत छ ।

यसबाहेक आईएसपीको एक दशमलब १३, यूटीएलको शून्य दशमलब ४७ र स्मार्टको शून्य दशमलब ७६ प्रतिशत बजार हिस्सा छ ।