जनताको विपक्षमा आउने प्रस्ताव स्वीकार्य हुँदैनः एमाले

काठमाडौँ: संविधान शंसोधनप्रति एमाले सकारात्मक भएको छ ।  जारी स्थायी समितिको आइतबारको बैठकले संविधान शंसोधन प्रति सकारात्मक हुने निर्णय गरेको हो । ‘हाम्रो पार्टी सैद्धान्तिक रुपमा संविधानको शंसोधनप्रति सकारात्मक दृष्टिकोण राख्छ तर राष्ट्र र जनताको विपक्षमा आउने कुनै पनि प्रस्तावलाई अस्वीकार नगर्ने कुरा बैठकले स्पष्ट गरेको छ ’ प्रचार विभाग प्रमुख एवम् सचिव योगेश भट्टराईले भने ।

बैठकले नयाँ सत्ता समीकरणका नेतृत्वकर्ता दलका गतिविधि र नियतले मुलुकमा राजनीतिक र संवैधानिक रिक्तता उत्पन्न हुने खतरा पैदा भइरहेको प्रति सचेत हुँदै संविधानको कार्यान्वयन गर्दै लोकतान्त्रिक प्रक्रियालाई अगाडि बढाउनु अहिलेको आवश्यकता भएको ठहर एमालेको छ ।

उसले पूर्वसरकारले प्रस्तुत गरेको मिति र समयमा तहगत निर्वाचन सम्पन्न गर्न र यसका निम्ति आवश्यक कानुनी, प्रशासनिक तथा भौतिक तयारीमा जुट्न वर्तमान सरकारको गम्भीर ध्यानाकर्षण गर्ने निर्णय गरेको छ । बैठकले आफ्नो पार्टीका अध्यक्षको नेतृत्वमा रहेको सरकारले अघि सारेका नीति, कार्यक्रम र बजेटको निरन्तरता र कार्यान्वयनका लागि वर्तमान सरकारको ध्यानाकर्षण गर्दै सरकारका तर्फबाट हुने कुनै पनि अनुचित क्रियाकलाप तथा सत्ताको दुरुपयोगप्रति कडा निगरानी गर्ने निर्णय गरेको छ । साथै, यिनै विषय वस्तुहरुलाई अघि सार्दै देशव्यापी पार्टी परिचालनको कार्ययोजना अघि सार्ने निर्णय समेत गरेको छ ।

बैठकले मुलुकको वर्तमान विषम परिस्थितिलाई ख्याल गर्दै राष्ट्रिय एकता, सामाजिक सद्भाव, संविधानको कार्यान्वयन, लगायतका विषयमा एकताबद्ध पहलकदमीका निम्ति सबै राजनीतिक दल र सम्बद्ध सबैमा बैठकले आह्वान गरेको छ ।

बैठकले पार्टीको आन्तरिक एकतालाई मजबुच पार्न विभिन्न निर्णय गरेको छ । पार्टीका संस्थागत निर्णयलाई कार्यान्वयन गर्दै वैचारिक र राजनीतिक कामलाई प्राथमिकता दिने निर्णय गरेको छ । बैठकले विधि, नीति र पद्धतिलाई अनुशरण गर्दै योग्यता, क्षमता र योगदानका आधारमा कामको जिम्मेवारी दिने, पार्टीका सिद्धान्त, नीति, कार्यक्रम र निर्णयहरुको तदरुकताका साथ कार्यान्वयन गर्ने समेत निर्णय गरेको छ ।

एमालेले  पार्टीको प्रतिष्ठा र लोकप्रियतामा आँच पुग्ने किसिमका कुनै पनि गतिविधिहरु नगर्ने, बहस र छलफल गर्नुपर्ने विषयमा सम्बन्धित कमिटी र संगठनका बैठकमा पार्टी विधान र नियमअनुरुप यथोचित रुपमा छलफल गर्ने समेत निर्णय गरेको छ । कुनै पनि नेता, कार्यकर्ता र सदस्यलाई कुनै पनि प्रकारको पूर्वाग्रह वा पक्षधरताको आधारमा नभई योगदान, क्षमता, सक्रियता र इमान्दारिताको आधारमा जिम्मेवारी दिने प्रणाली गर्ने निर्णय समेत गरेको भट्टराईले जारी गरेको विज्ञप्तिमा उल्लेख छ ।

बैठकमा बोल्दै अध्यक्ष ओलीले गत बैशाखमा नै आफु नेतृत्वको सरकार ढाल्ने षडयन्त्र भएको भएपनि पार्टीमा सर्बै नेता एकता बद्ध पारेर बिफल भएको उल्लेख गरे । ओलीले यहि समिकरणलाई  आफूले कायम राख्न प्रयत्न गरेको र माओवादी केन्द्रसँग त्यसको खाका माग गरेकोमा त्यो नदिएको बताए । उनले विभिन्न षड्यन्त्रपूर्ण तरिकाले समिकरण भत्काएको जानकारी बैठकमा गराएको प्रचार विभाग प्रमुख भट्टराईले जानकारी दिए ।