पम्फा बनकरियालाई पञ्चकन्या ग्रुपको सहयोग
काठमाडौंः पञ्चकन्या ग्रुपले मकवानपुर जिल्ला हाँडीखोला गाविस वडा नम्बर ७ की छात्रा पम्फा बनकरियालाई उच्च शिक्षा अध्ययन गर्न एक लाख रुपैयाँ आर्थिक सहयोग प्रदान गरेको छ ।
देशकै लोपोन्मुख र पिछडिएको बनकरिया जातिकी पम्फालाई उनको शिक्षामा सहयोग पुगोस् भनेर संस्थागत सामाजिक उत्तरदायित्वअन्तर्गत उनलाई सहयोग गरेको जनाएको छ । उनले २०७२ सालको एसएलसी परीक्षा दिई सो जातिबाटै एसएलसी परीक्षा पास गर्ने पहिलो छात्रा भएकी छन् ।
पम्फालाई एसएलसी परीक्षा उत्तीर्ण गरेपश्चात् उच्च शिक्षा अध्ययनका लागि आर्थिक अभाव देखिएको थियो । उनले प्राविधिक शिक्षा अध्ययन गर्ने इच्छाले नवलपरासीस्थित कालिका मेडिकल एन्ड टेक्निकल कलेजमा छात्रवृत्तिका लागि प्रवेश परीक्षा दिएकी थिइन् ।
तर वैकल्पिकमा नाम निस्केकोले छात्रवृत्तिको सुनिश्चितता नभएको र सरकारले पनि पिछडिएको समुदायलाई सहयोग नगरेको उनले बताएको कम्पनीले जनाएको छ ।
उनको यस्तो परिस्थितिलाई ध्यान दिई पञ्चकन्या ग्रुपका कार्यकारी निर्देशक उज्ज्वलकुमार श्रेष्ठले लोपोन्मुख जातिको उत्थानका साथै गरिबीका कारण पढ्नबाट वञ्चित पम्फा बनकरियाको लागि आर्थिक सहयोग उपलब्ध गराएको बताए ।
प्रतिक्रिया दिनुहोस !
