थ्रीस्टार बिजयी

काठमाडौंः एएफसी कप प्ले अफ छनोट फुटबलमा रुस्लान थ्रीस्टार क्लबले सुखद सुरुआत गरेको छ । मंगोलियामा आइतबारदेखि सुरु भएको समूह ‘बी’ को पहिलो खेलमा थ्रीस्टारले घरेलु टोली इर्चिम फुटबल क्लबलाई २-० गोलले हरायो ।

इर्चिमविरुद्ध सशक्त प्रदर्शन गरेको थ्रीस्टारले खेलको १३ औं मिनेटमा खाता खोलेको थियो । थ्रीस्टारका लागि पहिलो गोल अफ्रिकी खेलाडी मार्टिन्सले गरेका थिए । इर्चिमका गोलरक्षकको हातबाट फुत्किएको बललाई मार्टिन्सले पोस्ट छेउबाट गोल गरेका थिए ।

पहिलो हाफमा १-० गोलको अग्रता बनाएको थ्रीस्टारले दोस्रो हाफमा थप सुधारिएको खेल खेलेको थियो । थ्रीस्टारका लागि दोस्रो गोल कप्तान विक्रम लामाले गरेका थिए । विक्रमले ७६ औं मिनेटमा गोल थप्दै थ्रीस्टारको जित पक्का बनाएका थिए ।

युवा खेलाडीको साथ पाएको थ्रीस्टारले खेलभर घरेलु टोलीविरुद्ध आकर्षक खेल खेलेको थियो । एक महिनाअघि मात्र नयाँ टोली बनाएको थ्रीस्टारमा अहिले राष्ट्रिय टोलीका सात खेलाडी छन् । यसैगरी मंगोलियाको लिग च्याम्पियन इर्चिममा पनि राष्ट्रिय टोलीका १० खेलाडी समावेश थिए ।

इर्चिमसँगको जितसँगै थ्रीस्टारले अघिल्लो चरणमा पुग्ने सम्भावनालाई बलियो बनाएको छ । समूहको दोस्रो खेलमा थ्रीस्टारले मंगलबार कम्बोडियाको लिग च्याम्पियन नागावोर्लड फुटबल क्लबसँग प्रतिस्पर्धा गर्नेछ ।

थ्रीस्टारले नागावोर्लडलाई हराएमा वा बराबरीमा मात्र रोके पनि छनोट हुनेछ । थ्रीस्टारले राष्ट्रिय लिग विजेताको हैसियतमा एएफसी कप प्लेअफ छनोट खेल खेल्न पाएको हो । एएफसी कप प्लेअफ छनोट फुटबलमा एसियाका नौ टोलीले भाग लिएका छन् ।

सहभागी टोलीलाई तीन समूहमा विभाजन गरिएको छ । प्रत्येक समूहको उत्कृष्ट टोली अर्को चरणमा प्रवेश गर्नेछ । एएफसी कपको प्ले अफ खेल्ने थ्रीस्टार नेपालको पहिलो टोली हो । यसअघि लिग विजेताका रूपमा थ्रीस्टार दुईपटक एएफसी प्रेसिडेन्ट कपमा सहभागी बन्दै अन्तिम चरणमा पुगेको थियो ।