बालविवाह रोक्न चिठी अभियान
चौतारा: आफ्ना सन्तानको सानै उमेरमा विवाह नगरिदिन सचेत गराउने उद्देश्यले जिल्लाका अभिभावकलाई लक्षित गरी बालबालिकाले चिठी लेख्न थालेका छन् ।
बालविवाहविरुद्ध अभिभावक र बालबालिकालाई सचेत गराउन जिल्ला बाल सञ्जालले चिठी अभियान थालेको हो । सकेसम्म जिल्लाका सबै परिवारमा पुर्याउने उद्देश्यले सोमबारबाट सुरु भएको अभियान भदौ महिनाभर चल्ने छ ।
बालविवाह गर्दा हुने समस्या र यसविरुद्ध कानुनमा भएको व्यवस्थासमेत समावेश गरी साथीको नाममा लेखिएको चिठी गाउँगाउँ पठाउन थालिएको सञ्जालकी अध्यक्ष सफलता भण्डारीले बताइन् । गाउँघरमा हुने बालविवाहविरुद्ध जनचेतना जगाउनु चिठी अभियानको उद्देश्य रहेको भण्डारी बताउँछिन् । गाउँमा रहेका बाल क्लब र विभिन्न संस्थाको सहयोगमा चिठी घरघरमा पठाउने भण्डारीले जानकारी दिइन् ।
'चिठीमै उल्लेख भएको व्यहोराको फ्लेक्स प्रिन्ट पनि बनाएका छौं, त्यसलाई गाउँको सार्वजनिक स्थल र विद्यालयमा टाँस्छौं', भण्डारीले भनिन्, 'चिठी भने सकेसम्म जिल्ला भरका सबै घरमा पठाउने व्यवस्था गर्छौं ।' पहिलो चरणमा एउटा वडामा ५० वटाका दरले जिल्लाभर पठाउन साढे ३५ हजार चिठी छापिएको छ ।
गाउँगाउँमा चिठी पुर्याउन बालबालिकाको क्षेत्रमा काम गर्ने संस्थाका सामाजिक परिचालक तयार भएका छन् । चिठी छाप्न र अन्य व्यवस्थापनका लागि सहयोग गर्न पनि संस्थाहरू सकारात्मक रहेको भण्डारीले बताइन् । 'सुरुमा राम्रो र प्रभावकारी भए पनि स्रोत जुटाउन सकिँदैन कि भन्ने लागेको थियो', भण्डारीले भनिन्, 'अभियान सुरु गरेपछि सहयोगी हातहरू भेटिए अब केही दिनमै हामीले लेखेको चिठी गाउँगाउँ पुग्ने छ ।'
बाल क्लबमार्फत बालविवाह रोक्ने अभियानमा सक्रियता देखाउँदै आएको सञ्जालले सुरु गरेको चिठी अभियानले सकारात्मक परिवर्तन ल्याउन सहयोग हुने जिल्ला बालकल्याण समितिका सदस्य सोम सापकोटाले बताए । जिल्लामा बालविवाहको दर बढी नै रहेकाले यो अभियानबाट अभिभावक र बालबालिका स्वयंले पनि बालविवाहबाट हुने असरबारे जानकारी पाउने सापकोटा बताउँछन् ।
महिला तथा बालबालिका कार्यालयकी प्रमुख सन्ध्याराजेश्वरी सिंह चेतनामुलक चिठीको माध्मबाट बालविवाहविरुद्ध सन्देश दिन खोज्नु प्रभावकारी अभियान भएको बताउँछिन् ।
प्रतिक्रिया दिनुहोस !
