मन्त्री छान्न कांग्रेसमा किचलो, पौडेलसँग भागबन्डा मिलेन
काठमाडौँः कांग्रेसले सरकारमा सहभागी हुने मन्त्री बुधबार पठाउने बताएको भए पनि भागबन्डा नमिलेको भन्दै रामचन्द्र पौडेल पक्षले मन्त्रीको नाम दिन अस्वीकार गरेको छ ।
सरकारमा सहभागी हुने मन्त्रीको नाम बुधबार बिहान टुंगो लगाएर साँझ सपथ गराउने तयारी भएको भए पनि मन्त्री छनोटमा पुनः विवाद भएको छ । सभापति शेरबहादुर देउवाले सरकारमा सहभागि हुने मन्त्रीको नाम टुंगो लागेको बताए पनि पौडेल पक्षले भागबन्डा नमिलेको भन्दै असन्तुष्टि जनाएको छ।
शुक्रबार उपचारका लागि सिंगापुर जाने र विहिबार सार्वजनिक विदा भएकाले पनि बुधबार सरकारमा सहभागि मन्त्री पठाउने तयारी देउवाले गरेका छन् ।
देउवाले नेता कृष्णप्रसाद सिटौला र खुमबहादुर खड्काको सिफारीसमा एक-एक जना र नेता रामचन्द्र पौडेलको सिफारीसमा तीन वा चार जना मन्त्री बनाउने बताएपनि यो विषयमा रामचन्द्र पौडेल असन्तुष्ट देखिएका छन् ।
देउवा पषमा अर्जुननरसिह केसी मन्त्री बन्न तयार भएका छन् । देउवाले केसीसँगै प्रकाशसरण महत, बालकृष्ण खाँड र जीवनबहादुर शाहीलाई सरकारमा पठाउने तयारी गरेका छन् ।
केसीलाई शिक्षा, महतलाई परराष्ट्र, खाँडलाई रक्षा र शाहीलाई पर्यटन मन्त्रालयको जिम्मेवारी दिनसक्ने सम्भावना छ । सँगै देउवाले मिनबहादुर विश्वाकर्मा र फरमुल्लाह मन्सुरको नाम समेत मन्त्रीको रुपमा अघि सारेका छन् ।
बुधबार बिहान मन्त्रीको नाम टुंगो नलागेपछि पौडेलले देउवासँग छलफल गरेर मात्र मन्त्रीको नाम टुंगो लगाउने बताएका छन् ।
मंगलबार नेता पौडेलबाट सीतादेवी यादव र दीपक गिरी मन्त्री हुने निश्चित भएको थियो । यादवलाई वन र गिरीले श्रम मन्त्रालय पाउने बताइएको थियो । त्यस्तै रोमी गौचन र नविन्द्रराज जोशीको नाममा समेच चर्चा चलेको थियो ।
यता नेता कृष्णप्रसाद सिटौलाबाट भने गगन थापा मन्त्री बताउँदै आएका छन् । थापाले शहरी विकास मन्त्रालय पाउनु पर्ने दावी गरेका छन् ।
त्यस्तै, नेता खड्काबाट मोहोनबहादुर बस्नेत वा शंकर भण्डारी मध्ये एक जना मन्त्री हुन सक्ने चर्चा छ । कांग्रेसले पाएको १३ मन्त्रालयमा उपप्रधान र गृह सहित बिमलेन्द्र निधि र भैतिक पूर्वाधार तथा यातयातमा रमेश लेखकले यसअघिनै सपथ खाइसकेका छन् भने अब ११ जना मन्त्री मात्रै पठाउन बाँकी छ ।
प्रतिक्रिया दिनुहोस !
