मन्त्री छान्न बुढानिलकण्ठमा देउवा र पौडेलबीच विशेष वार्ता
काठमाडौं : सरकारमा जाने मन्त्रीहरुको नामलाई अन्तिम रुप दिन कांग्रेस सभापति शेरबहादुर देउवा र वरिष्ठ नेता रामचन्द्र पौडेलबीच देउवा निवास बुढानिलकण्ठमा बुधबार बेलुका विशेष वार्ता चलिरहेको छ ।
आजै मन्त्री बन्नेहरुको नामावली टुंगो लगाउने गरी देउवा बुधबार बिहानदेखि आन्तरिक छलफल र परामर्शमा जुटेका हुन् । मन्त्रालय र मन्त्रीहरुको भागबन्डाका लागि दिनभर छलफल भए पनि सहमति हुन नसकेपछि पौडेल पक्षले सरकारमा सहभागी नहुने चेतावनी दिएको थियो ।
सहमतिबाटै मन्त्री बन्नेहरुको नाम टुंगो लगाउने पहल स्वरुप देउवाले छलफलका लागि रामचन्द्रलाई बेलुका बुढानिलकण्ठमा बोलाएका हुन् । पौडेल पक्षले पाँच मन्त्री र केही राज्यमन्त्रीसमेत पाउनुपर्ने माग राखे पनि विवाद झन् थपिएको छ ।
कांग्रेसले पाएको १३ मन्त्रालयमध्ये गृह तथा उपप्रधानमा विमलेन्द्र निधि र भौतिक योजना तथा निर्माणमा रमेश लेखकलाई यसअघि नै पठाइसकेको छ । बाँकी मन्त्रालयको भागबन्डा नमिल्दा झन्डै दुई सातादेखि मन्त्रिपरिषद् अपुरो छ ।
दुवै पक्षबाट मन्त्री बन्ने धेरैको नाममा टुंगो लागे पनि केहीको हकमा भने निर्णय हुन बाँकी छ भने मन्त्रालयको भागबन्डामा पनि विवाद छ। देउवा पक्षबाट शिक्षामा अर्जुननरसिंह केसी, रक्षामा बालकृष्ण खाण, परराष्ट्रमा प्रकाशशरण महत, पर्यटनमा जीवन शाहीको नाम लगभग निश्चित भइसकेको छ । तर केशवकुमार बुढाथोकी, फरमुल्ला मन्सुर र मिन विश्वकर्मामध्येबाट एकजना छान्न्न बाँकी छ। यसमा निर्णय भएको छैन ।
त्यसैगरी पौडेल पक्षबाट श्रममा दीपक गिरी र बनमा सितादेवी यादवको नाममा लगभग सहमति भइसकेको छ । बलबहादुर केसी, नविन्द्रराज जोशी, आनन्द ढुंगाना र रोमी गौचन थकालीमध्ये दुईजनालाई छान्नुपर्ने भए पनि अझै निर्णय भइसकेको छैन।
कृष्णप्रसाद सिटौला पक्षबाट गगन थापा र भीमसेनदास प्रधानमध्ये एकजना मन्त्रिपरिषद्मा जानेछन् । गगनको संभावना बढी छ । त्यसैगरी खुमबहादुर खड्काको सिफारिसमा मोहन बस्नेत, शंकर भण्डारीमध्ये एकजना मन्त्रिमण्डलमा पर्नेछन् । मोहनको संभावना बढी छ ।
प्रतिक्रिया दिनुहोस !
