दाहालले बाह्य हस्तक्षेप निम्त्याएः एमाले
![दाहालले बाह्य हस्तक्षेप निम्त्याएः एमाले](https://annapurnapost.prixacdn.net/media/albums/uml_emale-57be41f6b40967.11220031_9iN7LVNecW.jpg)
काठमाडौंः संविधान संशोधनलगायत मुलुकको आन्तरिक मामिलाबारे प्रधानमन्त्रीबाट भारतीय प्रधानमन्त्रीलाई पत्र पठाइएको भन्ने अड्कलबाजी भइरहँदा त्यसबारे स्पष्ट पार्न प्रमुख प्रतिपक्षी एमालेले आग्रह गरेको छ ।
‘यस्तो कार्यले हाम्रो स्वाधीनता र स्वतन्त्र निर्णय गर्ने हैसियतमा आँच पुर्याएको छ र आन्तरिक मामिलामा अवाञ्छित बाह्य चासो निम्त्याउने त्रुटिपूर्ण कार्य भएको छ’, स्थायी समिति बैठकपछि एमालेले जारी गरेको प्रेसविज्ञप्तिमा उल्लेख छ ।
मंगलबार सकिएको एमाले स्थायी समिति बैठकले प्रधानमन्त्रीबाट पठाइएको भनिएको पत्र सार्वजनिक गर्न मागसमेत गरेको छ । नेपालको भविष्य नेपाली जनता आफैंले निर्धारण गर्ने मान्यता र स्वाभिमानमा आघात पु¥याउने कुनै किसिमका काम नगर्नसमेत एमालेले सरकारलाई सचेत गराएको छ ।
एमाले स्थायी समिति बैठकबारे बुधबार पार्टी मुख्यालय धुम्बाराहीमा आयोजित पत्रकारसम्मेलनमा महासचिव ईश्वर पोखरेलले सरकारले छिमेकीसँग सन्तुलित सम्बन्ध बिगारेको र नेपालीको शिर झुक्ने काम गरेको आरोपसमेत लगाए ।
‘संविधान एउटा गतिशील दस्ताबेज हो र यसलाई समयसापेक्ष बनाइरहनुपर्छ । तर अहिले जे आधारमा र जुन ठाउँमा संविधान संशोधनका लागि चर्चा चलाइएको छ, यो आपत्तिजनक र निरर्थक छ’, एमालेले भनेको छ, ‘संविधान संशोधन हाम्रो देशको आन्तरिक विषय हो र यहाँका राजनीतिक दलहरूले महसुस गर्ने आवश्यकतामा यो निर्भर रहन्छ ।’
कुनै देशको अतिरिक्त चासोका आधारमा देशको मूल कानुन संशोधन हुन नसक्ने उल्लेख गर्दै एमालेले त्यस्तो चासोले समस्या बल्झाउने र नयाँनयाँ समस्या उत्पन्न गर्ने बताएको छ । ‘त्यस विषयमा देशभित्र कुनै छलफल नै नभएर विदेशी भूमिमा गएर छलफल गरिनु आपत्तिजनक छ’, एमालेले भनेको छ ।
नयाँ सरकार बनेपछि संविधान कार्यान्वयनलाई धरापमा पारेर मुलुकलाई अनिश्चय, अस्थिरता र संवैधानिक रिक्तताको डरलाग्दो खाडलतिर लैजाने कोसिस भइरहेको आरोप पनि एमालेले लगाएको छ ।
त्यसका लागि राजनीतिक तथा सामाजिक द्वन्द्व निम्त्याउने खेल सुरु भएको र हुँदै नभएको समस्या खडा गरेर त्यसकै भरमा मुलुकलाई अप्ठेरो पार्ने कामले समस्या समाधान गर्ने होइन, थप समस्या खडा गर्ने एमालेले उल्लेख गरेको छ ।
‘छिमेकी मुलुकहरूसँग कायम भएको सन्तुलित सम्बन्धलाई पुनः असन्तुलित बनाउने, जागेको स्वाभिमानलाई गिराउने र नेपाली आफैंले केही गर्न सक्दैनन् भन्ने छाप पारेर मुलुकको शिर निहुरिने अवस्था सिर्जना गर्ने गतिविधि बढेका छन् । पार्टी यस्ता क्रियाकलापको दृढतापूर्वक विरोध गर्दै आफ्नो प्रभावकारी भूमिका निर्वाह गर्नेमा स्पष्ट छ’, पत्रकारसम्मेलनमा महासचिव पोखरेलले भने ।
प्रतिक्रिया दिनुहोस !
![Unity](https://annapurnapost.prixacdn.net/static/assets/images/unity-logo.png)