सिम्रिक एयरलाइन्सको उडान अनुमति नवीकरण
काठमाडौः वायुसेवा कम्पनी सिम्रिक एयरलाइन्सको उडान अनुमति नवीकरण भएको छ । मंगलबारको मन्त्रिपरिषद् बैठकले सिम्रिकको उडान अनुमति नवीकरण गर्ने निर्णय गरेपछि बुधबारै चार वर्षका लागि इजाजत नवीकरण गरेको पर्यटन मन्त्रालयले जानकारी दिएको छ ।
सिम्रिमको उडान अनुमति नवीकरण गर्न दिनेगरी मन्त्रिपरिषद्बाट निर्णय आएकोले सोही अनुसार बुधबार नै इजाजत नवीकरण गरेर नेपाल नागरिक उड्डयन प्राधिकरण पठाएको पर्यटन मन्त्रालयका सचिव प्रेमकुमार राइले बताए ।
उनका अनुसार नेपालको उड्डयन नियमअनुसार मन्त्रालयबाट इजाजत र प्राधिकरणबाट उडान अनुमति लिनुपर्छ । मन्त्रालयबाट लिनुपर्ने इजाजत नवीकरण समयमा नभएको कारण प्राधिकरणले पनि उडान अनुमति नवीकरण नगर्दा सिम्रिकको सेवा नौ दिनदेखि सुचारु भएको थिएन । प्राधिकरणबाट पनि बुधबार नै उडान सञ्चालन अनुमति (एओसी) नवीकरण भएको छ ।
‘सिम्रिकले मन्त्रालयबाट इजाजत नवीकरण गरेर ल्याएका कारण हामीले पनि आजै नवीकरण गरेका छौं’, नेपाल नागरिक उड्डयन प्राधिकरणका उपमहानिर्देशक राजनराज पोखरेले भने ।
मन्त्रालय र नियामक निकायबाट इजाजत तथा उडान अनुमति नवीकरण भएकोले बिहीबारदेखि नै उडान सुचारु हुने सिम्रिक एयरलाइन्सले जानकारी दिएको छ । सिम्रिकको उडान अनुमति मानवीय त्रुटिका कारण समयमा नै नवीकरण हुन नसक्दा नौ दिनदेखि उडान बन्द थियो ।
मन्त्रालय र प्राधिकरण दुवैबाट अनुमति लिनुपर्ने व्यवस्था छ । मन्त्रालयको इजाजत हरेक चार वर्षमा नवीकरण गर्नुपर्छ ।
सिम्रिकले आवश्यक सबै प्रक्रिया पूरा गरेर नवीकरण गरेको र बिहीबारबाट नै नियमित उडान हुने जानकारी दिएको छ । सिम्रिकले विज्ञप्ति जारी गरेर नौ दिनदेखि रोकिएको उडान बिहीबारबाटै नियमित हुने जानकारी दिएको छ ।
प्राधिकरणले पनि सिम्रिकलाई बिहीबारबाट नै उडान सुचारु गर्न कुनै बाधा नरहेको जानकारी दिएको छ । सिम्रिकका आन्तरिक उडानमा चारवटा जहाज छन् ।
प्रतिक्रिया दिनुहोस !
