नेमारको हातमा ओलम्पिकको ट्याटु
रियो दी जेनेरियोः ब्राजिलले गत आइतबार आफ्नै देशमा सम्पन्न ३१ औं गृष्मकालीन ओलम्पिक खेलकुदको पुरुष फुटबलतर्फको उपाधि जित्यो ।
ब्राजिलले ओलम्पिक इतिहासमै फुटबलतर्फ स्वर्ण पदक जितेको यो पहिलो अवसर थियो । त्यो स्वर्ण पदक ब्राजिलियन जनताका लागि महŒवपूर्ण त थियो नै, त्योभन्दा पनि महŒवपूर्ण टोलीका कप्तान तथा स्ट्राइकर नेमारका लागि थियो ।
नेमारले राष्ट्रिय टोलीबाट देशलाई उपाधि दिलाएको यो नै पहिलो पटक हो । त्यसैले त्यही ऐतिहासिक सफलतालाई थप स्मरणीय बनाउन नेमारले आफ्नो हातमा ‘ट्याटु’ खोपाएका छन् । नेमारले आफ्नो बायाँ हातमा ओलम्पिकको लोगोसहितको ‘ट्याटु’ खोपाएका हुन् ।
आइतबार रियो ओलम्पिक खेलकुदको समापन समारोहअघि भएको फाइनल खेलमा नेमारकै निर्णायक पेनाल्टी प्रहारमा जर्मनीलाई ५-४ गोलले पराजित गर्दै ब्राजिलले पुरुष फुटबलको स्वर्ण पदक जितेको थियो ।
नेमारले सोही सफलतालाई आफ्नो बायाँ हातमा ‘रियो २०१६’ को ट्याटु खोपाएर थप यादगार बनाउने प्रयास गरेका हुन् । २४ वर्षीय नेमारले आफ्नो कपाललाई समेत खैरो रङमा रंग्याएका छन् ।
नेमारले बार्सिलोनाका आफ्ना सहकर्मी लियोनल मेसीले जस्तै कपाललाई खैरो रङमा रंग्याएका हुन् । हालै अमेरिकामा सम्पन्न कोपा अमेरिका फुटबलको फाइनलमा अर्जेन्टिनी टोली टाइब्रेकरमा साबिक विजेता चिलीसँग पराजित भएपछि टोलीका कप्तान मेसीले आफ्नो कपाललाई खैरो बनाएका थिए ।
रियो ओलम्पिकको सफलतापछि हाल नेमार बिदामा छन् । उनी अझै केही समय ब्राजिलमै रहने छन् । उनी विश्व कप छनोट प्रतियोगिताअन्तर्गत अर्का साता हुने खेलपछि मात्र व्यावसायिक फुटबल खेल्न बार्सिलोना फर्कने छन् ।
प्रतिक्रिया दिनुहोस !
