अवसरबापत 'कास्टिङ काउच'

कास्टिङकाउच भन्ने शब्द प्रायः मनोरञ्जन क्षेत्रमा चलेको सुनिन्छ । चलचित्र उद्योगमा समयको अन्तरालसँगै कास्टिङ काउच सुनिने गर्छ । कास्टिङ काउच अर्थात् कामका लागि अवसर दिएबापत मालिकले लिने यौनिक फाइदा । फाइदा लिने निर्देशकले कामको खोजीमा रहेका नयाँ नायकनायिकाको करिअर चम्काइदिने आश्वासन दिन्छन् । कास्टिङ काउचको सिकार बन्नेहरू प्रायः नायिकाहरू नै हुन्छन् । कहिलेकाहीँ भने नायकहरू पनि पीडित बनेका हुन्छन् । हलिउडदेखि बलिउडसम्म कास्टिङ काउच प्रचलनमा छ । कास्टिङ काउचबारे आफूले गरेको अनुभूति चलनचल्तीका नायिकाहरू यसरी सुनाउँछन्ः

स्थापित भएपछि पीडित, मेघन फक्स

हलिउडकी जल्दीबल्दी नायिकाका रूपमा हेरिन्छ मेघन फक्सलाई । ३० वर्षीया मेघन कुनै पनि नायिकाले कुनै न कुनै समयमा कास्टिङ काउच सामना गरेको दाबी गर्छिन् । चाहे ऊ करिअरको जुनसुकै उचाइमा पुगेको किन नहोस्, उसले कास्टिङ काउचको सामना गरेको उनको दाबी छ ।

'मैले स्थापित भएपछि कास्टिङ काउचको अनुभव गरेकी छु । साँच्चै यो निकै नै हृदयविदारक थियो । अरूको भन्दा मेरो कथा फरक थियो, किनकि मैले सेलिब्रेटीका रूपमा चिनिएपछि यस्तो अवस्था सामना गर्नु परेको थियो । उनको भनाइलाई मान्ने हो भने प्रायः कलाकार करिअरको सुरुआतका दिनमा यसको सिकार भएका हुन्छन् । 'तर, कतिले यस्तो कुरा भन्छन्, कतिले मनमा गुम्स्याएर राख्छन् । फरक यति हो', उनले भनिन् ।

१९ वर्षमा कास्टिङ काउच, चार्लिज थेरोन

'मोस्टर', 'नर्थ कन्ट्री', 'स्नो ह्वाइट', 'द हन्ट्समेन'जस्ता फिल्ममा काम गरिसकेकी अमेरिकन नायिका चार्लिजले पनि कास्टिङ काउचको अनुभव गरेको बताएकी छन् । ४१ वर्ष पुगेकी चार्लिजले एक अन्तर्वार्तामा आफूले १९ वर्षको उमेरमा त्यस्तो अनुभव गरेको बताएकी हुन् ।

साउथ अफ्रिकाबाट हलिउडमा आएकी चार्लिजले लसएन्जलसस्थित निर्देशकको घरमा भएको अडिसनमा यस्तो अनुभव बटुलेकी हुन् । त्यति बेला निर्देशकले भित्र बोलाएर ड्रिङ्सको अफर गरेको तर आफू उचित मान्छेलाई प्रस्ताव नगरेको भनेर धक्की दिँदै बाहिर निस्किएको बताएकी छन् ।

घुम्न जाँदा कास्टिङ काउच, मर्लिन मुनरो

हलिउडमा सेक्सिएस्ट तथा सेन्सुअल गायिका, नायिकाका रूपमा स्थापित मर्लिन मुनरोले झनै धेरै कास्टिङ काउचको अनुभव गरेको आफ्नो बायोग्राफीमा समेटेकी छन् । तर उनले अरू सेलिब्रेटीले जस्तो खुलाउन चाहेकी थिइनन् । उनले आफ्नो फाइदाका लागि प्रोड्युसरहरूसँगको यौन कार्यलाई स्वीकार गरेकी थिइन् ।

एउटा निर्देशकले उनीसँग घुम्न जाने क्रममा मर्लिनमा कुनै विशेष कुरा नभेटेको बताएको र उनी एउटी मूर्ख केटी भएको कुरा बायोग्राफीमा उल्लेख गरिएको छ । उनलाई हलिउडमा विभिन्न आरोप लगाइएको थियो । केहीले त उनलाई 'वेश्या'भन्दा कम नभएको आरोप लगाएका थिए ।

भागेको थिएँ, टिस्का चोपडा

टिस्का चोपडा बलिउडकी चर्चित नायिका हुन् । ४२ वर्षीया टिस्काले बलिउडका थुप्रै फिल्ममा काम गरिसकेकी छन् । 'मामी फिल्म फेस्टिबल'मा उनले जुरीको रूपमा पनि काम गरेकी छन् । ४२ वर्षीया नायिका चोपडाले कास्टिङ काउचको विषयमा बोल्दै नायिकाहरूको व्यापारिक रूपमा डिमान्ड र सप्लाई हुँदै आएको बताएकी छन् ।

नायिकाको सप्लाई, डिमान्डभन्दा धेरै ठूलो कुरो भएको उनले बताएकी छन् । डाइरेक्टर, प्रोड्युसरले नै अवसर दिएबापत आफूहरूले के पाउने भन्ने प्रश्न गर्छन् । उनले पनि यस्तै अवस्था आइपरेपछि भाग्न सफल भएको बताएकी छन् ।

सेक्स अफर गरेका थिए, कंगना रनौत

बलिउडको अर्की नायिका कंगना रनौतको भनाइमा कसैसँग रात बिताएर कुनै फिल्ममा रोल पाउँछु भन्ने सोच्नु मूर्ख काम हो । 'इमानदारीसाथ भन्दा मैले कहिल्यै यस्तो अवस्था स्वीकार गरिनँ, म त्यति मूर्ख पनि हुन चाहन्नँ । १७ वर्षको उमेरमा मैले करिअर सुरु गर्दा पनि त्यस्तो गरिनँ', उनले स्पष्ट पारेकी छन्, 'किनकि मान्छेले कमन सेन्स प्रयोग गर्नुपर्छ ।

कसैले उसलाई खुसी पारेर रोल दिन्छ भन्नेमा विश्वास गर्नु नै मूर्खता हो ।' उनको भनाइमा कास्टिङ काउचले त्यस्तो हुन्थ्यो भने रेडलाइट एरियाका सबै महिला सुपरस्टार हुन्थे । उनले भनेकी छन्, 'हुन त मलाई सेक्सको अफर आएको हो, मैले सीधै अस्वीकार गरेँ ।'

दिमाग लगाउनुपर्छ, कल्की कोचलिन

फ्रेन्च नागरिक भएर पनि बलिउडमा स्थापित बनेकी छन् कल्की कोचलिन । ३२ वर्षीया कल्कीले बलिउडमा फिल्मफेयर, नेसनल फिल्म अवार्ड हात पारिसकेकी छन् । तर उनले पनि अरूले जस्तै अनुभव गरेको बताएकी छन् । 'जब मैले त्यो समयमा असहज महसुस गरेँ, त्यहाँबाट फुत्किने जुक्ति लगाएँ । फुत्किन सफल भएँ', उनले भनिन् । उनलाई ब्युटी विथ ब्रेन पनि भनिन्छ ।