‘रोनाल्डोभन्दा ग्रिजम्यान उत्कृष्ट खेलाडी हुन्’

काठमाडौंः पोर्चुगल तथा रियल मड्रिडका स्टार खेलाडी क्रिष्टियानो रोनाल्डोले बिहीबार राति मोनाकोमा युरोकप सर्वोत्कृट खेलाडीको अवार्ड जिते। उत्कृष्ट खेलाडीको उपाधि जित्दा रोनाल्डोले रियल मड्रिडका आफ्नै टिममेट ग्यारेथ बेल र एथ्लेटिको मड्रिडका स्ट्राइकर एन्टोनी ग्रिजम्यानलाई पछि पारे।

तर, एथ्लेटिको मड्रिडका प्रशिक्षक डिएगो सिमोनले रोनान्डोभन्दा ग्रिजम्यान नै उत्कृष्ट खेलाडी भएको बताएका छन्। उनले भनेका छन्,‘गत सिजन रोनाल्डोको भन्दा ग्रिजम्यानको प्रदर्शन राम्रो थियो। ग्रिजम्यान विश्वकै तीन उत्कृष्ट खेलाडीमध्ये एक हो।’

रोनाल्डोले युरोपको उत्कष्ट खेलाडीको अवार्ड जितेपनि ग्रिजम्यानले गत सिजन उत्कृष्ट खेल पस्केको हो भन्नेमा कुनै शंका नरहेको बताए। उनले युरोपको उत्कृष्ट खेलाडीको सूचीमा पर्दै युरोकपमा ६ गोल गर्दै गोल्डेन बुट विजेता ग्रिजम्यान अघिल्लो सिजन राम्रो प्रदर्शन गरेका खेलाडी भएको बताए।

‘अवार्ड जितेका रोनाल्डोले रियल मड्रिडलाई च्याम्पियन्स लिग फुटबल र पोर्चुगललार्इ पहिलो पटक युरोकप फुटबलको उपाधि दिलाए। त्यसैले उनलाई उपाधि हात पार्न कसैले रोकेन। रोनाल्डोलाई बधाइ छ। तर, कुनै शंकाविना भन्दा सक्छु, मेरालागि ग्रिजम्यान उपाधिका लागि लायक थियो,’सिमोनले भनेका छन्।