त्रिशूली नदीमा ट्रक खस्यो, सातजना घाइते
चितवनः त्रिशूली नदीमा ट्रक खस्दा सातजना घाइते भएका छन्। चितवनको नारायणगढ–मुग्लिन सडक खण्डको जलवीरे नजिकैबाट शुक्रवार बिहान त्रिशूली नदीमा ना ३ ख ४५५६ नम्बरको ट्रक खसेको हो।
ट्रकमा सवार तीन बालबालिका, दुई महिला र दुई पुरुषको प्रहरीले तत्काल उद्धार गरेको थियो। उनीहरुको चितवनस्थित अस्पतालमा उपचार भइरहेको छ।
मुग्लिनबाट बालुवा लिएर नारायणगढतर्फ आउँदै गरेको सो ट्रक त्रिशूली नदीमा खसेको जिल्ला प्रहरी कार्यालयका प्रमुख प्रहरी उपरीक्षक वसन्तबहादुर कुँवरले जानकारी दिए।
ट्रकका चालक र सहचालक पनि घाइते भएका छन्। उनीहरुको नेपाल प्रहरी र सशस्त्र प्रहरी विपद् व्यवस्थापन तालिम केन्द्र कुरिनटारको टोलीले उद्धार गरेको थियो।