काठमाडौं: नेपालबाट अन्तर्राष्ट्रिय उडान गर्ने वायुसेवा सञ्चालन गर्न सार्वजनिक प्रस्ताव पर्खनु नपर्ने व्यवस्था हुने भएको छ । नेपालबाट कुनै पनि वायुसेवाले अन्तर्राष्ट्रिय उडान गर्न चाहेमा सरकारले प्रस्ताव आह्वान गरेपछि मात्रै आवश्यक प्रक्रिया पुर्याएर निवेदन दिने व्यवस्थालाई संस्कृति, पर्यटन तथा नागरिक उड्डयन मन्त्रालयले परिमार्जन गर्ने भएको छ ।
मन्त्रालयले आगामी दसैंसम्मा हवाई उद्योग व्यवस्थापन नियमावली बनाउने भएको छ । यो नियमावलीमा अन्तर्राष्ट्रिय वायुसेवा सञ्चालन गर्न चाहने कम्पनीले आवश्यक प्रक्रिया पुर्याएर जतिबेला पनि निवदेन दिन सक्ने मन्त्रालयका सहप्रवक्ता तथा हवाई उद्योग महाशाखाका उपसचिव प्रमोद नेपालले जानकारी दिए ।
नागरिक उड्डयनसँग सम्बन्धित संस्थालाई इजाजत दिने सम्बन्धी कार्यविधि २०६६ अनुसार कुनै पनि वायुसेवाले सार्वजनिक प्रस्ताव आह्वान भए पछि मात्रै निवेदन दिनुपर्ने व्यवस्था छ । यो कार्यविधि पर्यटन मन्त्रीस्तरीय निर्णयबाट २०७२ चैतमा संशोधन भएको थियो ।
पर्यटन मन्त्रालयले नेपालबाट अन्तर्राष्ट्रिय उडानका वायुसेवाको आवश्यकता छ भनेर सार्वजनिक प्रस्ताव नमागेसम्म वायुसेवा कम्पनीले मात्रै चाहेर अन्तर्राष्ट्रिय लाइसेन्स नपाइने मन्त्रालयको भनाइ छ । वायुसेवाको चाहेका बेला अनुमति नपाए सरकारीले प्रस्ताव मागेको बेला आवेदन नै नपर्ने गरेकोले पनि सहजीकरण गर्न खोजिएको मन्त्रालयको भनाइ छ ।
पर्यटन मन्त्रालयका अनुसार हवाई उद्योग व्यवस्थापना नियमावलीको तयारी भइरहेकोले आन्तरिक र अन्तर्राष्ट्रिय उडानका वायुसेवालाई सहजीकरण गर्न पनि यस्तो नियमावली जरुरी छ । मन्त्रालका अनुसार नियमावलीको प्रारम्भिक खाका तयार भैसकेकोले कानुन मन्त्रालयको राय लिने र आवश्यक संशोधनपछि सरकारले स्वीकृत गर्नुपर्ने हुन्छ । आगामी दुई महिनाभित्रै सबै सरकारी प्रकृया सकेर मन्त्रिपरिषद्बाट नियमावली स्वीकृत गराउने योजना पर्यटन मन्त्रालयको छ ।
मन्त्रालयलका अनुसार हेलिकोप्टर सेवा प्रदायक श्री एयरलाइन्सको आन्तरिक उडानमा रुचि देखाउँदै जहाज संख्या थप्न निवेदन दिएको छ । यस्तो निवेदनमा सीमा क्षेत्रका गन्तव्यमा अन्तर्राष्ट्रिय उडान गर्ने चासोसहित अनुमति पनि माग गरेको छ । मन्त्रालयका अनुसार नयाँ वायुसेवासरहको प्रक्रिया अपनाएर यो वायुसेवाले आवेदन दिनुपर्नेछ ।
नेपालबाट अन्तर्राष्ट्रिय उडान गर्ने वायुसेवामा लामो सयमदेखि राष्ट्रिय ध्वजाबाहक नेपाल वायुसेवा निगम मात्रै छ । निगमले ५८ वर्षदेखि निरन्तर सेवा दिइरहेको छ । निगममा जहाज थप हुन नसक्दा मात्रै उडान समस्या हुने गरेको छ ।
निजी क्षेत्रबाट अन्तर्राष्ट्रिय उडानमा हिमालय एयरलाइन्सले भर्खरै सेवा सुरु गरेको छ । यो वायुसेवाले पनि तत्कालीन फ्लाई यतिको लाइसेन्स किनेर अन्तर्राष्ट्रिय उडानको प्रकृया अगाडि बढाएको हो । यस अघि निजी क्षेत्रबाट बीबी एयरवेजले अन्तर्राष्ट्रिय उडान सुरु गरेको भए पनि तीन महिनाभन्दा लामो समय सेवा दिन सकेन ।
नेपालबाट अन्तर्राष्ट्रिय उडानको सम्भावना भएर पनि नेपाल निजी वायुसेवाले सेवा दिन सकेका छैनन् । विभिन्न विदेशी गन्तव्यबाट नेपाल आउने अन्तर्राष्ट्रिय वायुसेवाको संख्या भने २६ वटा रहेको नेपाल नागरिक उड्डयन प्राधिकरणले जानकारी दिएको छ । नेपालबाट सीध अन्तर्राष्ट्रिय उडान गर्ने वायुसेवाको अभावका कारण विदेशी वायुसेवाबाट महँगो हवाई भाडा तिरेर यात्रा गर्न नेपाल आउने यात्रु वाध्य छन् ।
प्रतिक्रिया दिनुहोस !
