सेनासँगै युद्ध बेस क्याम्पमा खेलाडी पुगेपछि..
एजेन्सीः एथलेटिक्सको महिला पोल भल्टकी विश्व कीर्तिमानी खेलाडी एलेना इसिनबाएभासहितका रुसी खेलाडी सिरियास्थित आफ्नो हवाई सेनाको बेस क्याप पुगेका छन् ।
प्रतिबन्धित शक्तिवद्र्धक औषधि सेवन परीक्षण (डोपिङ) विवादमा परेपछि उनी हालै ब्राजिलको रियो दी जेनेरियोमा सम्पन्न ३१औं गृष्मकालीन ओलम्पिक खेलकुदमा सहभागिता जनाउनबाट वञ्चित भएकी थिइन् । इसिनबाएभा अन्य केही खेलाडीलाई लिएर सेनाको बेस क्याम्प पुगेकी हुन् ।
रुसले इस्लामिक स्टेट (आईएस) सँग लड्नका लागि सिरियामा बेस क्याम्प खडा गरेको हो । इसिनबाएभा र अन्य खेलाडीले युद्धमा रहेका आफ्ना सेनाको मनोबल बढाउन त्यहाँ पुगेको जनाएका छन् ।
३४ वर्षीया इसिनबाएभा हालै अन्तर्राष्ट्रिय ओलम्पिक कमिटी (आईओसी)मा खेलाडीको कोटामार्फत सदस्य चुनिएकी थिइन् । आठ वर्षका लागि सदस्यमा चुनिएलगत्तै उनले खेल जीवनबाट सन्न्यास लिएको घोषणा पनि गरेकी थिइन् ।
इसिनबाएभाले रुसका लागि सन् २००४ र सन् २००८ को ओलम्पिक खेलकुदमा पोल भल्टतर्फ स्वर्ण पदक जितेकी थिइन् । यद्यपि उनी यसपटक रुसका सबै एथलेटिक्स खेलाडीसँगै प्रतिबन्धमा परेकी थिइन् । आईओसीले राज्य प्रायोजित शक्तिवद्र्धक औषधि सेवनको कारण देखाउँदै इसिनबाएभासहित रुसका सबै एथलेटिक्स खेलाडीलाई रियो ओलम्पिकमा प्रतिस्पर्धा गर्न नपाउने गरी प्रतिबन्ध लगाएको थियो ।
इसिनबाएभा रुसी खेलाडीको नेतृत्व गर्दै रुसी सरकारकै नियन्त्रणमा रहेको सिरियाको हेमेइमिमस्थित सेनाको बेस क्याम्प पुगेकी हुन् । रुसी टेलिभिजनले सोमबार प्रसारण गरेको ‘फुटेज’ मा इसिनबाएभासहितका खेलाडी बेस क्याम्पमा सेनासँग कुरा गरिरहेको देखाइएको छ ।
इसिनबाएभाले आफ्ना सेनासँग समय बिताउन पाउँदा निकै खुसी लागेको बताएकी छन् । ‘यहाँ रहँदा वास्तवमै देशप्रतिको जिम्मेवारीबोध हुन्छ, राष्ट्रिय भावना जागृत हुन्छ’, उनले भनिन्, ‘यहाँ आएर आफ्नो सेनासँग समय बिताउन पाउँदा निकै खुसी लागेको छ ।’ खेलाडीले त्यहाँ वृक्षरोपणसमेत गरेका थिए ।
प्रतिक्रिया दिनुहोस !
