सुरु भयो अटो मेला, पहिलो दिन नै भीड
तस्बिरः सरोज वैजु /रासस
काठमाडौं: राजधानीको भृकुटीमण्डमा ‘नाडा अटो सो’ सुरु भएको छ ।
नेपाल अटोमोबाइल डिलर्स एसोसियसन (नाडा)ले आयोजना गरेको मेलामा सहभागी झन्डै दुई दर्जन कम्पनीले नयाँ मोडल भित्राएका छन् । उद्घाटनकै दिन मेलामा अवलोकनकर्ताको भीड लागेको छ । मेलामा बेलायती एमजी र फ्रान्सेली रेनोल्ट गाडी नयाँ ब्रान्डका रूपमा प्रवेश गरेका छन् ।
एमजीले तीनवटा र रेनोल्टले दुईवटा मोडल राखेको छ । यस्तै, टोयोटा, फियाट, होन्डा, सुजुकी, टाटा, स्याङयोङ, डाटसुन, भक्सवागन, स्कोडाले नयाँ मोडल प्रर्दशनीमा राखेका छन् । मेलामा महिन्द्रा, होन्डा, टीभीएस, यामाहा, यूएम, एसवाइएमलगायतले नयाँ बाइक भिœयाएका छन् । मेलामार्फत नयाँ बाइकका रूपमा मोटरेस भित्रिएको छ ।
मेलामा ३६ ब्रान्डका सवारीसाधन प्रर्दशनीमा राखिएको छ । यसमध्ये १६ ब्रान्डका चार पांग्रे, १५ ब्रान्डका दुई पांग्रे र पाँच ब्रान्डका कमसियल गाडी छन् ।बैंक तथा वित्तीय संस्था, स्पेयर्स पार्टस्, लुब्रिकेन्ट, सवारी सुरक्षा प्रविधि, ग्यारेज उपकरण, टायर, ब्याट्रीलगायतका स्टल पनि छन् । बैंकले ग्राहकलाई मेलास्थलमै फाइनान्सिङको सुविधा दिइरहेका छन् ।
उपप्रधान तथा अर्थमन्त्री कृष्णबहादुर महराले एघारौं संस्करणको अटो मेला मंगलबार उद्घाटन गरे । अर्थमन्त्री महराले मेलास्थलमा विभिन्न कम्पनीले ल्याएका नयाँ गाडी र मोटरसाइकल सार्वजनिक गर्दै सम्पूर्ण स्टल भ्रमण गरे ।
भदौ १९ गतेसम्म सञ्चालन हुने मेलामा ५० हजार अवलोकनकर्ता आउने नाडाको लक्ष्य छ । नाडाले मेलामा दुई अर्ब रुपैयाँको कारोबार हुने अनुमान गरेको छ । गत वर्षको मेलामा डेढ अर्बको कारोबार भएको थियो ।
प्रतिक्रिया दिनुहोस !
