रिस फेर्न झूटो उजुरी र नक्कली पात्र

काठमाडौंः रूपन्देहीका पशुपति भुजले भाइ नाता पर्ने राजकुमार भुजसँग लेनदेन मुद्दा हारेपछि रिस फेर्न प्रहरीमा मानव बेचबिखनको उजुरी दर्ता गरेको पाइएको छ ।
पशुपतिले नक्कली पात्र खडा गरेर राजकुमारविरुद्ध मानव बेचबिखनजस्तो गम्भीर अपराधमा उजुरी दिएको तथ्य मंगलबार खुलेको हो । राजकुमारले भारतमा लगेर बेचिएको भनिएकी सुशीला भनिने कविता पुडासैनीले चार लाख रुपैयाँ पाउने प्रलोभनमा आफूले झूटा व्यहोराको मुद्दा प्रहरीमा दर्ता गराएको बयान प्रहरीमा दिएकी छन् ।

महानगरीय प्रहरी परिसर टेकुका अनुसार पशुपतिले आफ्ना चिनजानका देवराज पुडासैनीलाई ६ लाख रुपैयाँको कार दिने प्रलोभन देखाएर कवितालाई प्रहरीमा उजुरी दिन लगाएका थिए । ‘राजकुमार भुजले दिल्लीमा पुर्‍याएर बेच्यो, पाँच वर्ष नारकीय जीवन बिताएर नेपाल फर्किएँ । उसलाई कारबाही गर्नुप¥यो’, भनेर कविताले प्रहरीमा उजुरी दिएपछि अनुसन्धान गर्दा घटनाले अर्के मोड लिएको छ ।

राजकुमारलाई मानव बेचबिखनका दलालको आरोप लगाउँदै कविताले आफूलाई कलंकी, भैरहवा, दमौली हुँदै दिल्ली पुर्‍याएको बताएकी थिइन् । गम्भीर प्रकृतिको मुद्दा भएकाले प्रहरीले सूक्ष्म अनुसन्धान गरेको थियो । प्रहरीले उजुरीका आधारमा राजकुमारलाई साउन १२ गते पक्राउ गरेको थियो । तर उनले कवितालाई चिन्दै नचिन्ने र आफूमाथि लगाइएको मुद्दा झूटा भएको बयान प्रहरीमा दिए ।

पीडित भनिएकी कविताले प्रहरीमा उजुरी दिँदा गोरखपुरको रेलको टिकटसमेत समावेश गरेकी थिइन् । प्रहरीले कविताले उजुरीमा उल्लेख गरेको रेलको टिकटका बारेमा बुझ्न रूपन्देही प्रहरीमा पत्राचार गर्दा उक्त रेकर्ड फेला परेन । कविताले दिल्ली-गोरखपुर-रक्सौल हुँदै काठमाडौं आएको जानकारी प्रहरीमा गराएकी थिइन् । ‘काठमाडौंबाट राति ११ बजे भैरहवा पुगियो ।

बिहान तीन बजे सुनौलीमा राखेर के औषधि खान दियो थाहा भएन ब्युँझिँदा त दिल्लीमा रहेछु’, कविताले उजुरीमा उल्लेख गरेकी थिइन् । ‘रेलको टिकटको रेकर्ड फेला नपर्नु र कविताले सुनौलीबाट एकैचोटि दिल्ली पुगेर ब्यँझिएको कुराको मेल नखाएपछि अनुसन्धान तीव्र पार्दा उनी झुटा साबित हुन पुगिन्’, परिसरका मुद्दा शाखाका डीएसपी रवीन्द्र रेग्मीले भने ।

अनुसन्धानका क्रममा देवराजले बहिनी मानेकी कविता साँच्चै हुन् कि होइनन् भन्नेमा शंका लागेर प्रहरीले उनको घर पत्ता लगाएको थियो । देवराजको डेरा चाबहिल चुच्चेपाटीमा पुगेर बुझ्दा उनको एउटा दिदीमात्रै रहेको र बहिनी नभएको पत्ता लागेपछि पीडित भनिएकी कविताको उजुरीमाथि प्रहरीले शंका गरेको थियो । ‘देवराजको डेरामा पुगेर परिवारसँग सोधपुछ गर्दा उनको बहिनी रहिनछिन्, तबमात्रै हामी निष्कर्षमा पुग्यौं । यो घटनाभित्र कुनै रहस्य छ’, डीएसपी रेग्मीले भने ।

प्रहरीले देवराजलाई पुनः टेकुमा ल्याएर ‘तपाईं झूटो उजुरी लिएर आउने’ भनेर प्रश्न सोधेपछि उनी झस्किए । उनले ‘साँचो कुरा भन्छु’ भन्दै सबै कहानी प्रहरीमा सुनाइदिए । पशुपति ढुंगेअड्डा डेरा गरी बस्दै आएका बेला उनीसँग चीनजान भएको बयान देवराजले प्रहरीमा दिएका छन् ।

‘पशुपति भुज र भाइ नाता पर्ने राजकुमारबीचको लेनदेन मुद्दा केही महिनाअगाडि अदालतमा चलेको रहेछ । राजकुमारले मुद्दा जितेपछि पशुपति रिस फेर्ने दाउमा थिए । मलाई सबै कहानी बताएपछि बहिनीको नाटक गर्न कवितालाई मनाए’, देवराजको बयान उल्लेख गर्दै डीएसपी रेग्मीले भने । देवराजले प्रहरीमा बयान दिएअनुसार मानव बेचबिखन मुद्दामा राजकुमार जेल परेपछि उनलाई ६ लाख रुपैयाँको कार किनिदिने आश्वासन पशुपतिले दिएका थिए ।

‘मलाई तिमी दाजु बन र एउटी बहिनी पात्र खोजेर राजकुमारविरुद्ध प्रहरीमा मानव बेचबिखनको मुद्दा हाल, कार किनिदिन्छु भन्यो, त्यही भएर यी योजना बुनेको हुँ’, देवराजको बयान उद्धृत गर्दै डीएसपी रेग्मीले भने । देवराजले प्रहरीमा बयान दिएअनुसार उनी बुहारी नाता पर्ने एक महिलाको हत्या अभियोगमा नौ वर्ष जेल सजाय काटेर गत जेठ १५ गते छुटेका थिए ।

प्रहरीले मंगलबार मात्रै कवितालाई पक्राउ गरेको छ । कविताले चार लाख पाउने आसमा देवराजले भनेअनुसार बहिनी र नयाँदिल्लीमा बेचिएको नाटक गरेको बयान प्रहरीमा दिएकी छिन् ।