तनहुँको रिस्तीमा पहिरोले तीन घर पुर्यो
दमौलीः गएरातिदेखि परेको अविरल वर्षाका कारण पहिरो खस्दा तनहुँको रिस्ती ८ स्वामीफेदमा तीन घर पुरिएका छन् । वर्षाका कारण झरेको पहिरोले स्थानीय खहरेखोला थुने पछि खोलाले ठाउँ छोडेर बग्न थालेपछि पहिरो खसेको थियो ।
पहिरोमा परेर स्थानीय तीन घर पूर्णरुपमा पुरिएको प्रमुख जिल्ला अधिकारी दीपक सुवेदीले बताए । अहिले पहिरो पन्छाउने काम भइरहेको छ ।
पहिरोले मनवहादुर क्षेत्री, पुरुषोत्तम रेग्मी, शिव तिवारीको घर पुरेको छ । अन्य सात घर पहिरोको जोखिममा छन् । घटनास्थलमा दमौलीबाट गएको सडक विभागको डोजर तथा मनकामना गण भानुका सशस्त्र प्रहरी र नेपाल प्रहरीका जवानहरु उद्धार तथा पहिरो पन्छाउने काममा जुटेका छन् ।
डुबेको घरका सबैलाई सुरक्षित स्थलमा राखिएको र राहत लिएर टोली जाँदै गरेको रेडक्रस सोसाइटी तनहुँका सभापति उदयराज गौलीले बताए । उनले पाल तथा अत्यावश्यक सामग्रीसहितको टोली लिएर घटनास्थल जाँदै गरेको बताए ।
पहिरो रोक्न तथा बाढी आउन नदिन र थप क्षति हुन नदिन प्रहरी सुरक्षाकर्मीले काम गरिरहेको प्रजिअ सुवेदीले बताए । तनहुँ तथा आसपासका क्षेत्रमा मंगलबार रातिदेखि विहानसम्म अविरल वर्षा भएको थियो ।