न्यायालयमा बिचाैलिया हाबीः प्रधानन्यायाधीश

धनकुटाः प्रधानन्यायाधीश सुशीला कार्कीले बिचौलिया हावी हुँदा न्यायालयप्रतिको सम्मान र विश्वास जोगाइराख्न चुनौती थपिएको बताएकी छन् । पूर्वी क्षेत्रका न्यायालयहरूको अनुगमन भ्रमणका क्रममा पुनरावेदन अदालत धनकुटाको संयोजनमा हिलेमा आयोजित कार्यक्रममा प्रधानान्यायाधीश कार्कीले बिचौलिया हाबी भएको कारण न्यायकर्मी र न्यायालयका कर्मचारीमा आचरण सुधारको खाँचो आवश्यक रहेको बताइन् ।

धनकुटासहित तेह्रथुम, भोजपुर र संखुवासभाका जिल्ला न्यायाधीश र कानुन व्यवसायीको भेलामा उनले न्यायकर्मी र न्यायालयका कर्मचारीहरूलाई खानपान र बसउठमा ख्याल गर्नसमेत सचेत गराइन् ।

न्यायमा महिलाको पहुँच स्थापित गराउन महिलाका लागि अदालती शुल्क मिनाहा गर्नेबारेमा आफूले सोचिरहेको उनको भनाइ थियो । उनले भनिन्, ‘सुशासन कायम गर्न अदालतले मात्र नसक्ने भएकाले कानुन व्यवसायी, सरकारी वकिल र सेवाग्राही सबैको भूमिका हुनुपर्छ ।’

अदालतमा वैतनिक वकिलको व्यवस्था गरिएको, आधुनिक प्रविधिको प्रयोग गर्न थालेको र सूचनाको हकलाई स्थापित गरेकाले सुशासन कायम हुन थालेको भन्दै उनले खुसी प्रकट गरिन् ।

सम्पूर्ण न्यायाधीशलाई फैसला समयमा नै दिनसक्ने वातावरण तयार गर्न आग्रहका साथ पहाडी जिल्लामा मेलमिलाप गराउने कार्यको प्रशंसा गर्दै प्रधानन्यायाधीश कार्कीले भनिन्, ‘काठमाडौंमा मेलमिलाप गराउने कार्यमा सन्तुष्टि छैन । यहाँ राम्रो रहेछ, खुसी लाग्यो ।’

न्याय क्षेत्रमा लागेको आरोपबाट मुक्त हुनका लागि न्यायिक सुशासनको आवश्यकता रहेको उनले बताइन् । प्रधानन्यायाधीश कार्कीले न्यायाधीशहरूलाई निर्देशन दिँदै ढिलो हुने फैसलालाई छिटो हुने वातावरण मिलाउन आग्रह गरिन् ।

गाउँमा आउटरिज कार्यक्रम गर्दाचाहिँ जनतासँग घुममिल हुनेभन्दा पनि कर्मचारी लोकल कुखुरा खोज्ने गरेको गुनासो आएको हुँदा आफ्नो आचरणमा सुधार गर्न कर्मचारीलाई उनले निर्देशन दिइन् । देश भूकम्प र बाढीपहिरोको पीडामा रहेको बताउँदै प्रधानन्यायाधीश कार्कीले सीमित स्रोतसाधनको सदुपयोग गरेर भए पनि सेवाग्राहीहरूलाई सेवा दिन आग्रह गरिन् । अहिले पनि नेपालमा ५ देखि १५ प्रतिशतसम्ममात्र न्यायमा पहुँच भएकाले सबैको सहयोग भएमा मात्र न्याय क्षेत्रमा जनताको पहुँच पुग्ने कार्कीले बताइन् ।

सोही अवसरमा पुनरावेदन अदालत धनकुटाअन्तर्गत रहेका धनकुटा, भोजपुर, संखुवासभा र तेह्रथुम जिल्ला अदालतले गरेका कार्य प्रगतिका विषयमा जिल्ला न्यायाधीशहरूले प्रस्तुति गरेका थिए । त्यस अवसरमा जिल्ला अदालतमा परेका मुद्दाको फैसला अवस्था, मेलमिलापको अवस्था र न्याय दिन हुने कठिनाइको विषयमा जानकारी दिइएको थियो ।

त्यस अवसरमा सर्वोच्च अदालतका रजिस्ट्रार श्रीकान्त पौडेल र पुनरावेदन अदालत धनकुटाका मुख्य न्यायाधीश प्रकाशकुमार ढुंगानाले बोलेका थिए ।