महावीर पुनलाई एभरेष्ट स्कुलको तीन लाख सहयोग
भक्तपुरः एभरेष्ट इङ्गलिस स्कुल मिवाछें भक्तपुरले समाजसेवी महावीर पुनलाई तीन लाख ३३ हजार तीन सय ३३ रुपैयाँ सहयोग गरेको छ ।
विज्ञान र प्रविधिको विकास मार्फत नेपाललाई आर्थिक रुपले सम्पन्न बनाउने अभियानमा लागेका पुनले सञ्चालन गरेको राष्ट्रिय आविष्कार केन्द्रलाई स्कुलको तर्फबाट एक लाख ११ हजार १११, एभरेस्ट जन्मदिन कोषबाट एक लाख ११ हजार एक सय ११ र विद्यालयका अभिभावक, शुभचिन्तक एवम् अन्यबाट सङ्कलन गरिएको एक लाख ११ हजार एक सय ११ गरी तीन लाख ३३ हजार तीन सय ३३ पुनलाई बुधबार हस्तान्तरण गरिएको हो ।
एभरेस्ट जन्मदिन कोषका सद्भावनादूत एवम् राष्ट्रिय गानका रचनाकार प्रदीपकुमार राई (व्याकुल माइला), विद्यालय व्यवस्थापन समितिका अध्यक्ष रामगोपाल कर्माचार्य, विद्यालयका संस्थापक प्रिन्सिपल भक्त राजभण्डारीले पुनलाई रकम हस्तान्तरण गरे ।
म्यागासासे पुरस्कारबाट पुरस्कृत केन्द्रका संस्थापक पुनले विज्ञान प्रविधिको अनुसन्धान र विकासमार्फत नेपाललाई आर्थिक रुपमा सम्पन्न बनाउन केन्द्रले अभियान थालेको बताउँदै अबको ४० वर्षमा देशलाई सम्पन्न बनाउन सबै विद्यार्थी तथा शुभचिन्तकको सहयोगको अपेक्षा गरे ।