ओरालो लाग्यो जलविद्युत् र होटेल समूहको सेयर

काठमाडौंः धितोपत्र बोर्डले प्रत्यक्ष नियमनकारी निकाय नभएको कम्पनीलाई तत्काल हकप्रद र एफपीओ ल्याउन प्रतिबन्ध लगाएपछि त्यसको प्रभाव सेयर बजारमा देखिएको छ । प्रत्येक्ष नियामक निकाय नभएका जलविद्युत् र होटेल समूहका सेयर भाउ बुधबार ओरालो लागेको छ ।

बोर्डको हस्तक्षेपको सबैभन्दा बढी प्रभाव जलविद्युत् कम्पनीमा परेको छ । जलविद्युत् समूहको सूचक बुधबारमात्रै १०३.३१ अंकले घटेको छ । यसपछि बढी असर देखिएको होटेल समूहको सूचक पनि २९.३८ अंकले तल झरेको छ । सेयर बजार लगातार माथि गइरहेका बेला बोर्डको हस्तक्षेपपछि जलविद्युत् र होटेल समूहमा भने ब्रेक लागेको हो ।

जलविद्युत् क्षेत्रमा प्रत्यक्ष नियमनकारी निकाय छैन । नियामक नहुँदा कम्पनीहरूले आफूखुसी निर्णय गर्दैआएका छन् । सञ्चालक समितिको निर्णयका भरमा पुँजी बढाउने, बोनस र नगद लाभांश दिने काम हुँदै आएको छ ।

यसबाहेक हकप्रद तथा एफपीओ ल्याउन पनि सञ्चालक समितिको निर्णय र साधारण सभाले अनुमोदन गरे पुग्छ । अधिकांश जलविद्युत् होटेलमा सञ्चालक समितिको बहुमत सदस्यमा नातेदारकै हालीमुहाली हुने गरेको छ ।

उचित कारणबिना हकप्रद र एफपीओ ल्याउनेलगायतका घोषणा हुन थालेपछि पुँजी बजार नियामक नेपाल धितोपत्र बोर्डले तत्कालका लागि नियामक नभएका पब्लिक कम्पनीमाथि हकप्रद र एफपीओमा रोक लगाएको हो । यस्ता कम्पनीलाई कुन मोडालिटीका आधारमा हकप्रद र एफपीओ ल्याउन दिने भनेर अध्ययन गर्न बोर्डले विज्ञसम्मिलित एक समिति पनि गठन गरेको छ ।

यो समितिले एक महिनाभित्र प्रतिवेदन बुझाउनेछ । सोही प्रतिवेदनका आधारमा हकप्रद, एफपीओसहितका पुँजी वृद्धिका योजना ल्याउन दिने रणनीति बोर्डको छ ।

बुधबार स्टक एक्सचेन्जमा सूचीकृत सबै जलविद्युत् कम्पनीको सेयर भाउ घटेको छ । सबैभन्दा धेरै अपि जलविद्युत् र सानिमा माई जलविद्युत्को भाउ घटेको छ । बोर्डको निर्देशनले प्रभाव पार्ने सबै कम्पनीको भाउ घटे पनि ओरियन्टल होटेलेको मूल्य भने बुधबार पनि २१ रुपैयाँले बढेको छ । अपि जलविद्युत्ले १ः२ अनुपातमा हकप्रद ल्याउने तयारी गरेको छ । हकप्रद ल्याउन कम्पनीले धितोपत्र बोर्डमा आवेदनसमेत दिइसकेको छ ।

उता, सानिमा माई जलविद्युत्ले १ः१ अनुपातमा हकप्रद ल्याउने प्रस्ताव साधारण सभासमेत बोलाइसकेको छ । यस्तै, बुटवल पावर कम्पनीले एफपीओ ल्याउने तयारी गरेको थियो । यसबाहेक अन्य जलविद्युत् कम्पनीले पनि एफपीओ र हकप्रदको योजनामा थिए ।

बाेर्डको निर्देशनपछि होटेललाई पनि तत्काल पुँजी वृद्धि गर्न समस्या भएको छ । बोर्डको नयाँ नियम आएपछि मात्र यी कम्पनीले पुँजी वृद्धि योजना अघि सार्न पाउनेछन् । होटेल सोल्टीलगायतले पुँजी वृद्धि गर्ने योजना बनाएका खबर आएका थिए ।

होटेल र जलविद्युत् समूहको सूचकमा भारी गिरावट आए पनि बुधबार बजारमापक नेप्से परिसूचक भने ९.३७ अंकले बढेर १७९७.४५ विन्दुमा पुगेको छ । बैंकिङ र बिमा समूहले बजारलाई उचालेका हुन् । कारोबार रकम पनि एक अर्ब २५ करोड रुपैयाँभन्दा माथि पुगेको छ ।

जलविद्युत् र होटेल समूहको बुधबारको सेयर भाउ

कम्पनी घटेको सेयर मूल्य प्रतिकित्ता (रुपैयाँमा)
अपि जलविद्युत् -७०
सानिमामाई जलविद्युत् -५२
बुटवल पावर कम्पनी -३८
बरुण जलविद्युत् -३७
चिलिमे जलविद्युत् -३५
अरूण भ्याली जलविद्युत् -२०
रिडी जलविद्युत् -११
नेसन जलविद्युत् -४
सोल्टी होटेल -९
तारागाउँ -७
स्रोतः नेपाल स्टक एक्स्चेन्ज