अटो मेलामा आधा दर्जन नयाँ बाइक

राजधानीको भृकुटीमण्डपमा आयोजित अटो मेलामा १५ ब्रान्डका बाइक तथा स्कुटर प्रदर्शनीमा राखिएको छ । तीमध्ये आधा दर्जन कम्पनीले नयाँ बाइक तथा स्कुटर भित्र्याएका छन् । बाँकी कम्पनीले आफ्नो मोडललाई नै प्रदर्शनीमा राखेको देखिन्छ । बजाज मोटरसाइकलले मेलालाई लक्षित गरी यसअघि नै १५० सीसी भी–१५ नयाँ बाइक सार्वजनिक गरेको थियो । बजाजको मुख्य आकर्षण पनि यही बाइक बनेको छ ।

मेलामा महिन्द्रा, सुजुकी, होन्डा, टीभीएस, यामाहा, यूएम, एसवाइएम, रोयल इनफिल्ड, मोटरेस, स्कोमादी लगायतका कम्पनी सहभागी छन् । जसमध्ये 'मोटरेस' पहिलोपटक नेपाल भित्रिएको हो । मेलामा बेला मोटर्सले आधा दर्जन इलेक्ट्रिक स्कुटर प्रदर्शनीमा राखेको छ ।

नेपालमा बाइक तथा स्कुटर सबैभन्दा उपयुक्त सवारी हो । नेपालीको आयस्रोत र सडकको अवस्थाले पनि बाइकको बिक्री उच्च हुने गर्छ । अहिलेसम्म १८ लाख ३६ हजार २५ थान बाइक तथा स्कुटर नेपालमा दर्ता भइसकेका छन् । गत आर्थिक वर्षमा मात्र दुई लाख ६७ हजार चार सय ३९ बाइक तथा स्कुटर दर्ता भएको यातायात व्यवस्था विभागको तथ्यांकले देखाउँछ ।

नेपालमा बाइक तथा स्कुटरको माग उच्च रहेका कारण व्यवसायी नयाँ–नयाँ बाइक तथा स्कुटर भित्र्याउन होडबाजी गर्दै आएका छन् । अझ नाडा अटो शोमा नयाँ मोडल सार्वजनिक गरेर उपभोक्ता आकर्षित गर्ने प्रतिस्पर्धा नै चल्छ । यसपटकको मेलामा पनि आधा दर्जन कम्पनीले नयाँ मोडल भित्र्याएर ग्राहक आकर्षित गरिरहेका छन् ।

महिन्द्रा मोजो

भारतीय महिन्द्रा कम्पनीले मेलामा नयाँ बाइक 'मोजो' सार्वजनिक गरेको छ । यो तीन सय सीसीको बाइक हो । यसले २८ किलोमिटर माइलेज दिने कम्पनीको दाबी छ । स्पोर्टी लुक्समा रहेको यो बाइक रातो र कालो गरी दुई रङमा उपलब्ध छ । यसमा सिंगल सिलिन्डर, फोर स्ट्रोक, एसआइ इन्जिन लगायतका फिचर छन् । नेपालमा मोजोको मूल्य पाँच लाख ८० हजार रुपैयाँ तोकिएको छ ।

यामाहा रे जेडआर

यामाहाले अटो मेलामा 'रे जेडआर' स्कुटर सार्वजनिक गरेको छ । यो एक सय १३ सीसीको स्कुटर हो । रे जेडआर डिक्स र ड्रम ब्रेक गरी दुई भेरियन्टमा उपलब्ध छ । यसमा एअर कुल्ड, फोर स्ट्रोक, एसओएचसी, टु भल्ब लगायतका फिचर छन् । यसले ४५ देखि ५० किलोमिटरसम्म माइलेज दिने कम्पनीको दाबी छ । इन्धन ट्यांकी क्षमता ५.२ लिटर छ । डिक्स ब्रेक स्कुटरको मूल्य एक लाख ९२ हजार नौ सय र ड्रम ब्रेक स्कुटरको एक लाख ८४ हजार नौ सय रहेको छ ।

अपाचे आरटीआर २०० ४भी

टीभीएस बाइकको नेपाली बिक्रेता जगदम्बा मोर्टसले मेलामा 'अपाचे आरटिआर २०० ४भी' सार्वजनिक गरेको छ । कम्पनीले रेसिङ बाइकको रूपमा यसलाई भित्र्याएको जनाएको छ । यो दुई सय सीसी इन्जिन क्षमता भएको बाइक हो । यसमा एसआइ, फोर स्ट्रोक, ओएल कुलेड इन्जिन प्रयोग गरिएको छ । पाँच स्पिड गियर रहेको यसले ३५ किलोमिटर माइलेज दिने कम्पनीको दाबी छ । यसको मूल्य २ लाख ८३ हजार ९ सय रहेको कम्पनीले जनाएको छ । यो विभिन्न सात रङमा उपलब्ध हुनेछ ।

सुजुकीको एसेस १२५ स्कुटर

भीजी अटोमोबाइल्सले नाडा अटो शोबाट सुजुकीको 'एसेस १२५' स्कुटर सार्वजनिक गरेको छ । हेड ल्याम्पमा थ्रिडी लोगो साथ आएको यस स्कुटरमा फराकिलो सिट र इजी स्टार्ट सिस्टम रहेको कम्पनीले जनाएको छ । कम इन्धन खपत गर्नुका सथै यस स्कुटरले ६४ किलोमिटर प्रतिलिटरका दरले माइलेज दिनेछ । कम्पनीका अनुसार चार विभिन्न रङमा उपलब्ध यस स्कुटरको बजार मूल्य एक लाख ८९ हजार नौ सय रहेको छ ।

युएमको कमान्डो र स्पोर्टस् एस

अमेरिकन ब्रान्ड युएमको नेपालका लागि आधिकारिक बिक्रेता आइएमई अटोमोटिभ्सले मेलामा 'रेनगेट कमान्डो' र 'रेनगेट स्पोर्टस् एस' सार्वजानिक गरेको छ । तीन सय सीसीमा उपलब्ध दुबै बाइकको मूल्य पाँच लाख ४ हजार रुपैयाँ पर्ने कम्पनीले जनाएको छ । यी बाइकमा सिंगल सिलिन्डर, फोर स्ट्रोक, फोर भल्ब, लिक्युइड कुल्ड इन्जिन लगायतका फिचर छन् । दुबै बाइकले राजमार्गमा २२ देखि २५ किलोमिटर माइलेज दिने कम्पनीको दाबी छ । बाइक तीन फरक रङमा उपलब्ध छन् ।

होन्डाको सीबीआर र नाभी

मेलामा होन्डाले सीबीआर ६५० एफ र नाभी मोडल सार्वजनिक गरेको छ । सीबीआरको बजार मूल्य २० लाख तोकिएको छ । यसमा ६ स्पिडको गिएर, लिक्युइड कुल्ड लाइन फोर सिलिन्डर डीओएचसी इन्जिन रहेको छ ।

एक सय १० सीसीका नाभी स्कुटर र बाइकको समिश्रण हो । यसको मूल्य एक लाख ५० हजार ९ सय रहेको छ । यसमा फोर स्ट्रोक एसआइ इन्जिन रहेको छ । यसले ५० किलोमिटर माइलेज दिने कम्पनीको दाबी छ । यो विभिन्न पाँच रङमा उपलब्ध हुनेछ ।

मोटरेसको एम५, इ–एम५ र एमएक्स–इएफआइ

एसएलआर टेक्नो एन्ड ट्रेड प्रालिले नेपालमा मोटरेसका तीन नयाँ मोडल 'एम५', 'इ–एम५' र 'एमएक्स–इएफआइ' नाडामार्फत सार्वजानिक गरेको छ । यो ब्रान्ड मेलामार्फत पहिलोपटक नेपालमा भित्रिएको हो । यस कम्पनीका बाइक साना तथा आकर्षक रहेका छन् । कम्पनीको एम५ एक सय २५ सीसीमा रहेको छ । ५.५ लिटर फ्mयुल क्षमता रहेको यो बाइकले २.२ लिटर प्रतिसय किलोमिटरका दरले इन्धन खपत गर्ने कम्पनीको भनाइ छ । यसको मूल्य २ लाख ८५ हजार रहेको छ ।

इ–एम५ एक सय २५ सीसीमा रहेको छ । इलेक्ट्रोनिक्स बाइकको रूपमा रहेको यो बाइकले २ हजार वाटमा पावर प्रदान गर्ने कम्पनीले जनाएको छ । ८ देखि १० घण्टामा फुल चार्ज हुने यो बाइकको मूल्य १ लाख ७० हजार रहेको छ ।

एमएक्स–इएफआइ बाइक भने कम्पनीले लिमिटेड इडिसनको रूपमा मेलामा ल्याएको छ । १ सय २५ सीसीको यो बाइकमा ५.५ लिटर फ्युल ट्यांक रहेको छ । यो बाइकले १.३ लिटर प्रतिसय किलोमिटरका दरले इन्धन खपत गर्ने कम्पनीको दाबी छ । यसको मूल्य ३ लाख ४५ हजार रहेको छ ।