यात्रालाई विश्वसनीय बनाउँदै पर्यटक सवारी

काठमाडौं उपत्यका र बाहिरका गन्तव्यमा सेवा प्रदान गरिरहेका पर्यटक सवारी साधनप्रतिको यात्रामा यात्रुको विश्वसनीयता बढ्दै गएको छ । विभिन्न ट्राभल्स कम्पनीले हरियो प्लेटका सवारीसाधनबाट दिने सेवाप्रतिको विश्वसनीयता पछिल्लो समय बढ्दै गएको छ ।

अन्य सार्वजनिक यातायातको तुलनामा आफ्नै गति, निश्चित मापदण्डमा सञ्चालन हुने, चालकको लापर्वाही न्यून रहेका कारण पनि विश्वसनीयता बढ्दै गएको पर्यटन यातायात व्यवसायी संघको भनाइ छ ।

पर्यटक सवारीले आधुनिक सेवा-सुविधा बढाउन थालेका र आरामदायी सिटका साथै सवारीभित्र दिइने वाइफाई तथा एयर कन्डिसनसहितका आधुनिक सुविधासम्पन्न भएका कारण पर्यटक गाडीप्रतिको विश्वसनीयता बढ्दै गएको पोखरा जगदम्बा ग्रुपका अध्यक्ष केशव अधिकारीले बताएका छन् । यात्रुकै सुविधालाई ध्यानमा राखेर पोखरा जगदम्बा ट्राभल्सले हवाई जहाजकै सुविधामा काठमाडौं-पोखराको रुटमा दुईवटा पर्यटक गाडी सञ्चालन गरिरहेको छ ।

पर्यटक सवारीले बीचमा रोकेर यात्रु नचढाउने र नरोक्ने भएकाले गन्तव्यमा पुग्ने समय बाटोमा अवरोध नभए समय सधैं एउटै हुने ट्राभल व्यवसायी बताउँछन् । यात्रुको सुविधा लागि पहिल्यै टिकट बुकिङ गर्न सकिने, खाजा र खानाको गन्तव्यमा बाहेक अन्यत्र नरोकिने भएकाले पनि अझै यात्रुको यात्राप्रतिको विश्वसनीयता रहेको उल्लेख छ । पर्यटक गाडीको यात्राले ठगीबाट बच्चे सुरक्षित माध्यम बनेको छ । अहिलेसम्मको इतिहासमा पर्यटक सवारीमार्फत कुनै पनि ठूलो मानवीय क्षति दुर्घटना नभएको दाबीसमेत व्यवसायीको छ ।

सुरक्षित यात्रा नै अहिलेको सबैभन्दा विश्वसनीय आधार भएको ट्राभल व्यवसायीको भनाइ छ । पर्यटक सवारीले पर्यटकीय सेवालाई दृष्टिगत गरेर दिने सुरक्षित सेवा नै यसप्रतिको विश्वास भएको महालक्ष्मी भेइकलका प्रबन्ध निर्देशक रामहरि शर्माले बताए । उनका अनुसार पर्यटकीय सवारीसाधनले आन्तरिक र बाह्य दुबैलाई लक्जरियस सेवा दिने गरेका छन् ।

अन्य सवारीसाधनको तुलनामा बढी सुरक्षित र तालिम प्राप्त चालक तथा सहचालक हुनु नै यसको विशेषता हो । पर्यटक सवारीसाधन सामान्यभन्दा सुरक्षित, आरामदायी सेवा-सुविधा हुने भएकाले नै यसप्रति आन्तरिक पर्यटकको पनि रुचि बढेको बुझाइ शर्माको छ । हरिया नम्बर प्लेटका सवारीले विशेषगरी पर्यटक बोक्ने नै अनुमति पाएका छन् । पर्यटकीय गन्तव्यमा जाने आन्तरिक तथा बाह्यक दुबै पर्यटकलाई यी सवारीले सुविधा दिने गरेका छन् ।

अहिले उपत्यका मात्रै पर्यटकीय सेवाका सवारीसाधन सानाठूला गरी १ हजार पाँच सय भन्दा बढी छन् । ठूला लक्जरियस बसको संख्या करिब १ सयवटा रहेको सम्बन्धित पर्यटन व्यसायीको भनाइ छ । टुरिस्ट भेइकल एसोसिएसन अफ नेपाल (एनटीभीए) अन्तर्गत रहेका १५ सय सवारीसाधन रुटमा चल्दैनन् ।

यी सवारीसाधन नेपाल आउन पर्यटकलाई विमानस्थल आइपुगेपछि लिन जानेदेखि पर्यटकीय गन्तव्य घुम्ने र फिर्ता जाने बेलासम्मको सुविधामा खटिने गरेका छन् । नेपाल पर्यटन यातायात संघअन्तर्गत रहेका करिब २ सय बस भने विभिन्न ट्राभल कम्पनीका सवारीसाधन हुन् । यी सवारीसाधन काठमाडौंबाट पोखरा र चितवन, काठमाडौं-दिल्ली, पोखरा-दिल्लीसहितको रुटमा चल्ने गरेका छन् ।

जहाज सरहकै सुविधामा पर्यटक सवारी

गत वर्षदेखि नेपालमा पोखरा जगदम्बा ट्राभल्सले जहाज सरहकै सुविधामा पर्यटक सवारी सञ्चालन गरिरहेको छ । यो कम्पनीले गत वर्ष असोज १५ गतेबाट दुईवटा सवारीसाधन अत्याधुनिक सेवा र सुविधामा सञ्चालन गरिरहेको छ । यो कम्पनीले काठमाडौं पोखरामा सेवा दिइरहेको आधुनिक सेवा सुविधाका दुईवटा सवारीसाधनमा जहाजमा एयरहोस्टेज जस्तै गाडीका लागि बस क्रु राखेर सेवा दिइरहेको छ ।

बस क्रु हुने यो गाडीमा यात्रुले रिमोट कन्ट्रोलबाट सञ्चालन गर्न मिल्ने आरामदायी सिट, वाईफाई, एसी, खाना र खाजाको व्यवस्थासहित गाडीभित्रै मिनी बारको समेत सुविधा दिइएको पोखरा जगदम्बा ट्राभल्स तथा मोडर्न इरा टुर्स एन्ड ट्राभलका अध्यक्ष केशवप्रसाद अधिकारीले बताए । उनका अनुसार यो गाडी सेवा र सुविधा हिसाबले दक्षिण एसियाकै उत्कृष्ट रहेको छ ।

काठमाडौंबाट पोखरा र चितवन सञ्चालन भइरहेको यो गाडीले जम्मा २ हजार रुपैयाँ लिने गरेको छ । काठमाडौंबाट पोखरासम्मको यो शुल्कमा यात्रुले आफ्नै सिटमा चिया, कफी, कोल्ड ड्रिङ्स, खाजासहितको सुविधा पाउँछन् भने बाटोमा हुने खानाको व्यवस्था पनि टिकेटमै जोडिएको छ । गाडीमा बस होस्टेज (लेडी क्रु) राखिएको छ ।

थप सुविधाका पाँच गाडी थपिँदै

पोखरा जगदम्बा ट्राभल्सले दुईवटा सुविधासम्पन्न पर्यटक गाडी सञ्चालन गरेको एक वर्षमा नै थप पाँचवटा गाडी भित्र्याउने भएको छ । आगामी असोज १ गतेबाट सञ्चालनको तयारी भइरहेको थप पाँचवटा गाडीमा भित्रै शौचालय र खाना, चिया तथा कफीका निम्ति टेवुलको सुविधा थपिएको छ ।

हाल २१ सिट क्षमताको सवारी सञ्चालन गरिरहेको यो कम्पनीले २८ सिट क्षमताको नयाँ गाडी ल्याउने भएको छ । सिट क्षमता बढेकाले सेवा र सुविधा थप भए पनि यात्रुले तिर्ने टिकेट भने ५ सय घटाएर १५ सय रुपैयाँ बनाउने पनि अधिकारीले बताए ।

पाँचवटा थप गरेर दुईवटा काठमाडौं-पोखरा, दुईवटा विराटनगर—काठमाडौं र एउटा आवश्यकताअनुसारको गन्तव्यमा सञ्चालन गर्ने गरी रुट तय भएको पनि अधिकारीले बताए । आधुनिक सुविधाका यी गाडी एउटैको करिब डेढ करोड रुपैयाँ पर्ने अधिकारीले बताए । कम्पनीले विगत आठ वर्षदेखि पोखरा-दिल्लीसम्म नियमित सेवा दिइरहेको छ ।

पछिल्लो समय यात्रु सेवामा आधुनिक सुविधा प्रदान गर्दै अरू ट्राभल व्यवसायीले पनि एसीसहित भित्रै ट्वाइलेट भएको गाडी सञ्चालन गर्न थालिसकेको पर्यटक बस व्यवसायी संघले जानकारी दिएको छ । एक हजार रुपैयाँ शुल्क लिएर सुविधासम्पन्न गाडीबाट सेवा दिने कम्पनी हरेक वर्ष बढ्दै गएको पनि संघको भनाइ छ ।

ग्राण्ड टुर गराउँदै गोचाली ट्राभल

अघिल्लो वर्षको भूकम्पपछि नेपालमा चिनियाँ पर्यटकको बजार कम भएकाले स्थलमार्गबाटै चिनियाँ ल्याएर प्रवर्धनको अभियानका निम्ति गोचाली ट्राभल एण्ड टुर्सले ग्राण्ड टुर आयोजना गर्ने भएको छ ।

यो ट्राभलले आगामी सेप्टेम्बर १३ मा चीनको केरुङबाट रसुवा हुँदै ३५ देखि ६० वटा गाडीमार्फत कम्तीमा १ सय ५० जना पर्यटक ल्याउने भएको छ । आफैं सवारी हाँकेर आउने यो चिनियाँ टोली सीधै बन्दीपुर र पोखरा घुमेर काठमाडौं आउने र सेप्टेम्बर २१ मा फर्कने गरी योजना बनेको गोचालीका प्रबन्ध निर्देशक भागीरथ सापकोटाले बताए ।