शुभेच्छु र नेपालीलाई मोती पुरस्कार

काठमाडौँः यस वर्षको युवावर्ष मोती पुरस्कार साहित्यकार रमेश शुभेच्छु (पाँचथर) र गोविन्द नेपाली सार्की (जुम्ला)लाई प्रदान गरिएको छ । राष्ट्रिय विभूति युवाकवि मोतीराम भट्टको १५१ औँ जयन्तीको अवसरमा राष्ट्रकवि माधव घिमिरेले शुभेच्छु र नेपालीलाई पुरस्कार प्रदान गरे ।

नेपाली शिक्षा परिषद्को आयोजनामा राजधानीमा आयोजित विशेष कार्यक्रममा नगद २५–२५ हजार, स्वर्ण पदक र सम्मानपत्रले दुई कवि सम्मानित भएका हुन् । राष्ट्रिय युवा कोषले २०४२ सालदेखि प्रत्येक वर्ष ४० वर्ष ननाघेका साहित्यकारलाई मोती पुरस्कार प्रदान गर्दै आएको छ ।

पुरस्कार वितरणपछि बोल्दै राष्ट्रकवि घिमिरेले भने, ‘सम्मानित युवा कविले मोतीराम जस्तै उन्नती गर्दै जाने विश्वास लिएको छु, सम्मानित दुवै कविलाई मेरोतर्फबाट बधाई छ ।’

पुरस्कार छनोट समितिका संयोजक प्रा.डा. चूडामणि बन्धुले सम्मानित हुने प्रतिभालाई बधाई तथा शुभकामना दिए । कार्यक्रममा पुरस्कृत कविको परिचय परिषद्का सदस्य शंकरप्रसाद पाण्डेले गराए । पाण्डेले कर्णाली अञ्चलका नेपाली र मेची अञ्चलका शुभेच्छुले नेपाली साहित्य क्षेत्रमा युवा उमेरै पुर्याएको योगदानको चर्चा गरे ।

सम्मानित कवि शुभेच्छुले मोती पुरस्कारले आफूलाई मोतीरामको जस्तै काम गर्ने हौसला मिलेको बताए भने नेपालीले सिर्जना यात्रामा यो पुरस्कारले थप ऊर्जा मिलेको बताए ।

सोही अवसरमा समस्यापूर्ति कवि सम्मेलन सम्पन्न भएको छ । ‘स्वागतम भोलीलाई’ शीर्षकमा तत्काल कविता लेखेर कविले एकएक श्लोक कविता बाचन गरे । समस्यापूर्ति सुनाउने कविमा राष्ट्रकवि घिमिरे, रमेश खकुरेल, गार्गी शर्मा, बुनु लामिछाने, भुवनहरि सिंग्देल, श्रीहरि फुयाँललगायत दुई दर्जन बढी थिए ।

राष्ट्रकवि घिमिरेले मोतीराम भट्टबाट सुरु भएको समस्यापूर्ति कविता लेखनले अहिलेसम्म निरन्तरता पाएकोमा खुशी व्यक्त गरे । ‘आजको स्रष्टामा समस्यापूर्ति कविता लेखनमा देखिएको उत्साहले मलाई थप उत्साह मिलेको छ,’ राष्ट्रकवि घिमिरेले भने ।