५५ करोडमा बिक्यो सीता एयर

काठमाडौंः आन्तरिक उडानको वायुसेवा कम्पनी सीता एयर बिक्री भएको छ । विराटनगरका व्यापारी सुरेश राठीसहितको समूले यो वायुसेवाको पूर्णस्वामित्व खरिद गरेको छ । यो वायुसेवा खरिदबिक्री सम्बन्धमा दुई महिना अगाडि नै सीता एयर र राठी समूहबीच सम्झौता भए पनि औपचारिक रूपमा स्वामित्व परिवर्तन गर्न अझै केही समय लाग्ने भएको छ ।

राठीले अर्का एक व्यवसायीसँगको सहकार्यमा सीता एयर खरिद गर्न लागिएको जानकारी दिए । निजी लगानीको सीता एयर ५५ करोड रुपैयाँमा खरिद गरिएको राठीले बताए । एयरमा आफूले लगानी गरेको भए पनि साइलेन्ट पार्नरका रूपमा बस्न चाहेको र हवाई क्षेत्रकै एक जना यो वायुसेवामा हुने भएकोले कुनै हल्ला नगरिएको राठीको भनाइ छ ।

सीता एयर स्रोतका अनुसार दुई महिना अगाडि नै जहाज खरिदबिक्रीको दुईपक्षीय सम्झौता भए पनि औपचारिकता दिन अझै केही दिन लाग्नेछ । कम्पनीको स्वामित्व हस्तान्तरण गर्न आवश्यक प्रक्रिया मिलाउन अझै चार/पाँच दिन लाग्ने सीता एयर स्रोतको भनाइ छ । स्रोतका अनुसार राठीसहित पाँच जनाको व्यापारिक समूहबाट सीता एयर खरिद भएको हो ।

राठीसहित पाँच जनाको व्यापारिक समूहबाट सीता एयर खरिद भएको हो ।

विराटनगरका व्यवसायी राठीको ट्रेडिङ व्यवसायमा दख्खल छ । राठीले भने आफूहरूले कुनै व्यापारिक ग्रुप खडा नगरेको र स्वतः स्फूर्त व्यवसाय गर्ने भएकोले पनि एयरलाइन्स सञ्चालनमा पनि व्यावसायिक ग्रुप नरहने दाबी गरेका छन् ।

राठीका अनुसार आवश्यक प्रक्रिया पुर्‍याउन, सेयर स्वामित्व परिवर्तन गर्न, कानुनी प्रक्रिया मिलाउन समय लाग्ने भएकोले खरिद गर्ने सम्झौता भए पनि आफ्नो मातहतमा सीता एयरको स्वामित्व आइनपुगेको जानकारी दिए ।

विराटनगरमा राठी जग्गाको कारोबार गर्छन् । उनको अक्सिजन ग्यास, जुट उद्योगमा पनि लगानी छ । राठी गु्रपका नामले परिचित यी व्यवसायीको आयातनिर्यात कारोबार पनि छ ।

आन्तरिक उडानको यो वायुसेवा कम्पनीसँग दुईवटा मल्टिइन्जिनका जहाज छन् । सन् २००३ बाट सञ्चालनमा आएको यो वायुसेवासँग डोर्नियर २२८ नामका १८ सीट क्षमताका जहाज सञ्चालनमा छन् । सीतासँग यस अघि चारवटा जहाज भए पनि दुईवटा दुर्घटनामा परेका थिए ।

यात्रु तथा कार्गो उडान गर्ने यो वायुसेवाले एउटा जहाजमार्फत काठमाडौंबाट लुक्ला दैनिक पाँचदेखि सातवटा उडान गर्दै आएको छ । अर्को एक जहाजमार्फत नेपालगन्जबाट जुम्ला, हुम्ला र बाजुरामा एक÷एक उडान गर्दै आएको छ । यो वायुसेवा नेपालको दुर्गम क्षेत्रमा सेवा दिने छोटो दूरीको उडान तथा अवतरण गर्ने स्टोल एयरक्राफ्ट हो । लामो समयदेखि रणनीतिक साझेदार खोज्दै आएको यो वायुसेवाले पूर्णस्वामित्व नै हस्तान्तरण गरेको छ ।

सीताले काठमाडौंबाट पोखरा, तुम्लिङटार, धनगढी, जनकपुर, दाङ, विराटनगरको उडान अनुमति पाएको छ । नेपालगन्जबाट हुम्ला, जुम्ला, बाजुरालगायतका जिल्लाका गन्तव्यमा उडान गर्ने अनुमति पाएको छ । यो वायुसेवासँग पर्याप्त जहाज नभएका कारण अनुमति पाएका केही गन्तव्यमा उडान गर्न नसकिएको जानकारी दिएको छ ।