बढ्दै छ स्कुटर मोह 

एउटा यस्तो समय थियो, स्कुटर भन्नेबित्तिकै केटीमात्र चढ्ने बुझिन्थ्यो । सडकमा पनि फाट्टफुट्ट स्कुटरहरू कुदेको देखिन्थ्यो । केटाहरू स्कुटर चढे गिज्याउँथे । तर, समय परिवर्तन भइसकेको छ । अब स्कुटर केटीको मात्र रहेन, केटाहरूको पनि रोजाइमा पर्न थालेको छ । अहिले स्कुटर चलाउने युवायुवतीहरू बराबर देखिन्छन् ।

पछिल्लो समय स्कुटर सबैको रोजाइमा पर्न थालेको छ । स्कुटर ‘फेमिली ट्रान्सपोर्टेसन’ बन्न पुगेको छ । महिला पुरुष दुवैका लागि उपयुक्त, चलाउन सजिलो र समान राख्न मिल्ने हुँदा स्कुटरमा आकर्षण बढेको हो । अझ विवाहित जोडीहरू संयुक्त रोजाइ बन्न थालेको छ, स्कुटर । कतिपय युवाहरूले विवाहपछि बाइक बेचेर स्कुटर किन्ने गरेका छन् ।

नेपालमा मनै लोभ्याउन स्कुटरहरू भित्रिएका छन् । डिजाइन, पावर र कलरमा बाइकलाई चुनौती दिने स्कुटरहरू बजारमा भेटिन्छन् । युवाका लागि भनेर पावरफुल स्कुटर आइरहेका छन् । तीन सय सीसीसम्मका हेभी स्कुटर नेपाली बजारमा छन् । नेपालमा स्कुटरको बिक्री बढेपछि व्यवसायीहरू पनि नयाँनयाँ स्कुटर भित्र्याउने होडबाजीमा उत्रिएको देखिन्छ ।

अहिले एक दर्जनभन्दा बढी कम्पनीले स्कुटर बिक्री गर्छन् । यी कम्पनीका झन्डै तीन दर्जन मोडलहरू उपभोक्तलाई प्रस्तुत गरेका छन् । जसको मूल्य एक लाख २५ हजारदेखि साढे ६ लाख रुपैयाँसम्म रहेको छ । ग्राहकले रोजीरोजी स्कुटर खरिद गर्न सक्ने टीभीएसका बिक्रेता बताउँछन् । स्कुटरमा पनि पावर, स्टाइलिस, ग्राफिक्स कलर, उच्च माइलेज, मोबाइल चार्जिङ पोर्टलगायतका सुविधाहरू थपिँदै गएपछि बजार बढ्दै गएको उनको भनाइ छ ।

पहिला बाबुआमाले छोरालाई रोजीरोजी बाइक किनिदिन्थे । तर, छोरीलाई स्कुटर किन्दिन मान्दैनथे । अहिले छोराछोरीलाई बराबर हेर्न थालिएको छ । छोरीलाई पनि स्कुटर किन्दिने परिपाटी बढेको छ । युवतीहरू पनि स्कुटरलाई आफ्नो प्यासन बनाउन थालेका छन् । यसले पनि स्कुटरको बिक्री बढाएको व्यवसायीको अनुभव छ ।

कलेजमा पढ्ने युवती होऊन् वा अफिसमा काम गर्ने महिला, उद्यम व्यवसाय गर्ने महिलादेखि गृहिणीसम्मले स्कुटर कुदाउँछन् । ग्राहकहरूबीच पनि अरूको भन्दा आकर्षक स्कुटर चढ्ने होडबाजी चलेको देखिन्छ । यसमा पुरुषहरूले पनि साथ दिइरहेका छन् । पुरुषहरूमा पनि स्कुटर मोह बढ्दै गएपछि हेभी स्कुटर भित्र्याएको टाइवानी एसवाइएम स्कुटरका बिक्रेताले बताए । एसवाईएमले तीन सय सीसीको स्कुटर भित्र्याएको छ । जसको मूल्य साढे ६ लाख रुपैयाँ रहेको छ ।
नेपालमा बाइकको तुलनामा स्कुटर बिक्रीको वृद्धिदर उच्च रहेको व्यवसायी बताउँछन् । नेपालको दुईपांग्रे बजारमा स्कुटरको हिस्सा २५ प्रतिशत नाघिसकेको छ । स्कुटरको बजार हिस्सा बढ्ने क्रम जारी छ ।

स्कुटर बिक्री गर्ने कम्पनी

अहिले होन्डा, हिरो, टीभीएस, यामाहा, बेला, भेस्पा, यूएम, महिन्द्रा, सुजुकी, एसवाईएम, स्कोमादी, कम्पनीले स्कुटर बिक्री गरिरहेका छन् । केही चिनियाँ ब्रान्डका इलेक्ट्रिक स्कुटर पनि नेपाल भित्रिएका छन् । हरेक वर्ष नयाँ ब्रान्डका स्कु नेपाल आइरहेको व्यवसायी बताउँछन् ।

स्कुटरले इन्ट्रिलेभल बाइकको बजारसमेत खोसिदिएको छ । नेपालमा डेढ लाखदेखि दुई लाख रुपैयाँसम्मका बाइकलाई इन्ट्रिलेभल मानिन्छ । यो मूल्यमा सबैभन्दा राम्रो स्कुटर खरिद गर्न सकिन्छ । नेपालमा धेरैजसो स्कुटरको मूल्य पौने दुई लाखको हाराहारीमा पर्छ । सस्तो बाइकभन्दा त्यही मूल्यमा आउने आकर्षक स्कुटरमा युवाहरूको ध्यान मोडिएको छ ।

गत वर्षमात्र नेपाल भित्रिएको हो, इटालियन भेस्पा स्कुटर । छोटो समयमै भेस्पाले नेपाली युवतीहरूको ध्यान खिचेको छ । तुलनात्मक रूपमा महँगो भए पनि अहिले सडकमा भेस्पाको उपस्थिति बाक्लो देखिन्छ । भेस्पाका भीएक्सएल, एसएक्सएल र इलिजेन्ट गरी तीनवटा मोडल छन् । जसको मूल्य न्यूनतम दुई लाख ७० हजार नौ सय ४६ देखि तीन लाख पाँच हजार नौ सय ४६ रुपैयाँसम्म रहेको छ ।

भेस्पाप्रतिको आकर्षणले नेपालमा स्कुटर पारखीहरू बढेको स्पष्ट हुन्छ । भेस्पाले चल्तीमा रहेका ब्रान्डहरूको बजार खोसिरहेको बिक्रेता बताउँछन् । भेस्पाको युनिक डिजाइनले ग्राहकलाई आकर्षित गरेको हो । भेस्पाले स्कुटरमात्र उत्पादन गर्दै आएको छ ।

नेपालमा बढी बिक्री हुने होन्डा स्कुटर हो । होन्डाको डीओ मोडलले बजारमा एकछत्र राज गरिरहेको छ । उत्कृष्ट डिजाइन र आकर्षक ग्राफिक्स कलरका कारण डीओले सबैको ध्यान मोडेको हो । होन्डाको एभिएटर र एक्टिभा पनि ग्राहकको रोजाइमा पर्छन् ।

नेपालमा महिन्द्राको रोडियो उजो, गस्टो र फ्लाइट गरी तीनवटा मोडल उपलब्ध छन् । सबै मोडलहरू १२५ सीसीका हुन् । गस्टो ११० सीसीमा पनि उपलब्ध छ ।

यामाहाले हालसालै भित्र्याएको फ्यासिनोले अहिले बजार तताएको छ । फरक डिजाइनमा रहेको फ्यासिनो सर्वाधिक बिक्री हुनेमा पर्छ । यसले होन्डाको डीओलाई चुनौती दिइरहेको छ । यामाहाले अटो मेलामा नयाँ मोडल रे जेडआर सार्वजनिक गरेको छ । यसअघि भित्रिएको जेडआर लोकप्रिय मोडल हो ।

सुजुकीका एक्सेस र लेट्स गरी दुईवटा मोडल छन् । एक्सेस १२५ सीसी र लेट्स ११२ सीसीको स्कुटर हुन् । त्यस्तै, हिरोको तीनवटा मोडलमध्ये प्लेजर सर्वाधिक लोकप्रिय छ । प्लेजर १०२ सीसीको स्कुटर हो । डुयट र ड्यास १०१ सीसीका स्कुटर हुन् ।

टीभीएस कम्पनीको स्टार सिटी, विगो रिफ्रेस, जुपिटर र जेस्ट गरी चारवटा मोडल छन् । सबै मोडल ११० सीसीका हुन् । जसको मूल्य न्यूनतम एक लाख ६३ हजारदेखि एक लाख ७३ हजारसम्म रहेको छ ।

इटालियन ब्रान्ड बेलाले इलेक्ट्रिक स्कुटर भित्र्याएको छ । बेलाका सातवटा मोडल नेपालमा उपलब्ध छन् । पछिल्लो समय इलेक्ट्रिक स्कुटरको पनि बजार बढिरहेको बताइन्छ । खासगरी चीनमा एसेम्बल गरिएका इलेक्ट्रिक स्कुटर नेपाली बजारमा पाइन्छन् ।