संसदीय समितिमा गृहमन्त्री निधि र रावलबीच डेढ घण्टा चर्काचर्की
काठमाडौँः उपप्रधान तथा गृहमन्त्री बिमलेन्द्र निधि र प्रमुख प्रतिपक्षि एमालेका सांसदबीच संसदको अन्र्तराष्ट्रिय सम्बन्ध समितिमा शुक्रबार डेढ घण्टा चर्काचर्की चल्यो ।
प्रधानमन्त्री पुष्पकमल दाहालले निधीमार्फत् भारतीय प्रधानमन्त्री नरेन्द्र मोदीलाई पठाएको भनिएको ‘विवादित पत्र’ सार्वजनिक गर्ने/नगर्ने बिषयमा सभासद्हरु विभाजित देखिए ।
एमाले सांसदहरुले निधिमार्फत् संविधान संसोधन जस्तो संसदको विरुद्ध आन्तरिक बिषयलाई भारतीय नेतृत्वसँग छलफल गरिनु आपत्तिजनक भएको बताए । भारतीय पक्षलाई पत्र लेख्नु सार्वभौम संसदको अपमान भएको एमाले सांसद भीम रावलले बताए ।
उपप्रधानमन्त्री कृष्णबहादुर महराको चीन भ्रमणलाई सकारात्मक र आफूले गरेको भारत भ्रमणलाई विवादित बनाउन खोजेको भन्दै उपप्रधानमन्त्री निधि एमाले सांसदमाथि खनिएका थिए ।
केही दिन अघि एमाले उपाध्यक्ष रावल र उपप्रधानमन्त्री निधीबीच प्रधानमन्त्री निवास वालुवाटारमा निधिकै भारत भ्रमणको बिषयलाई लिएर चर्काचर्की भएको थियो ।
बैठकमा उपप्रधानमन्त्री निधीले एमाले सांसदलाई माक्र्सवाद र लेनिनवादबारे आफूले एमाले सांसदलाई भन्दा बढी जानकारी रहेको दाबी गरे ।
बैठकमा उपप्रधानमन्त्री निधिले एमाले पार्टीले आफूले प्रधानमन्त्रीले भारतीय प्रधानमन्त्री मोदीलाई पठाएको पत्र सार्वजनिक गर्ने बिषय संस्थागत रुपमा छलफल गरेको मिडियामा पढेर थाहा पाएको र त्यो अनुचित रहेको बताए ।
‘नेपालमा माक्र्सवाद, लेनिनवादी पार्टीको प्रवृत्ति थाहा छ । कुनै पार्टीको बैठकमा चीनमा बिशेष दूत पठाइनु उपयुक्त तर भारतमा बिशेषदूत पठाउनु अनुपयुक्त भनेको कुरा मिडियामा पढेर मैले थाहा पाएँ । यो उहाँहरुको कस्तो राष्ट्रवाद हो? ’ निधिले एमालेलाई कटाक्ष गर्दै भने । यसो भनेपछि एमालेका सांसद रावल उत्तेजित बने ।
‘हामीले भारतसंग पनि सम्बन्ध सुमधुर बनाउनुपर्छ भनेका छौँ । चीनतिर बिशेषदूत जानु सही र भारततिर जानु गलत भनेका छौँ । यो निधीजीले गलत कुरा राख्नुभयो’ रावलले भने ।
रावलले ‘यो संसदीय समितिको बैठक हो कुनै कांग्रेस र एमाले पार्टीको बैठक होइन’ भन्दै मन्त्री निधीले आफ्नो पदीय मर्यादा र हैसियत बिर्सेर माक्र्सवाद, लेनिनवाद र विपीका सिद्दान्तका कुरा बैठकमा ल्याएको भन्दै आपत्ति जनाए ।
‘म बिपीको शिष्य हुँ । देशको राष्ट्रिय स्वार्थ, हित र सार्वभौमिकता के हो मलाई राम्रो संग थाहा छ । तपाईँहरुले सिकाउनु पर्दैन’ निधिले भने ‘मलाई माक्र्सवाद, लेनिन र उनीहरुका चेलाको राष्ट्रवाद थाहा छ । म बिपीको चेलालाई राष्ट्रवादको पाठ सिकाउनु आवश्यक छैन ।’
‘मोदीलाई लेखिएको पत्र संसद र यस समितिसमक्ष उपलब्ध गराउनुपछ । अन्यथा मिडियामा सार्वजनिक भएझैँ संबिधान संसोधनको बिषय पत्रमा उल्लेख गरिएको भन्ने आशंका गर्ने ठाउँ रहन्छ’ रावलले भने ।
रावलले बिशेषदूत बनाउन मन्त्री निधीलाई भारत र अर्का उपप्रधानमन्त्री कृष्ण बहादुर महरालाई चीन पठाइएता पनि देशका लागि खासै उपलब्धी नभएको बताए ।
‘बिशेष दूतहरु कुनै बिशेष अवस्थामा, दुई देशबीच संकट आइलागेका बेला समस्या समाधान गर्न पठाउने हो । तर अहिले नेपालमा कुनै बिशेष अवस्था छैन। छिमेकसंग संबन्ध सामान्य रहेको अवस्थामा किन बिशेषदूत पठाइयो भन्ने कुराको औचित्य के हो? यसबाट सरकारको अपरिपक्वता झल्केको छ’ रावलले भने ।
रावलको प्रतिवाद गर्दै उत्तेजित मुद्रामा प्रस्तुत भएका गृहमन्त्री निधीले प्रधानमन्त्रीको पत्र लिएर गएको र कुटनीतिक संवेदनशीलताका कारण त्यसलाई संसदमा पेश गर्न या सार्वजनिक गर्न नमिल्ने बताए ।
‘मैले सामान्य कुटनीतिक प्रचलन अनुशार बिशेष दूतको हैसियतमा प्रधानमन्त्री र राष्ट्रपतिको दुइृवटा पत्र लिएर गएको हुँ । तिनमा नेपालको संबिधान संसोधन संबन्धि आन्तरिक बिषय उल्लेख गरिएको छैन’ उनले भने । प्रधानमन्त्रीको पत्र कुनै एउटा बिदेशी राजदूतले राष्ट्रपतिसमक्ष पेश गर्ने ओहदाको प्रमाणपत्र जस्तो खालको रहेको उनले बताए ।
मन्त्री निधीले आफ्नो भ्रमणबाट प्रधानमन्त्री दाहालको भदौ ३० देखिको भारत भ्रमण, भारतीय राष्ट्रपति प्रणव मुखर्जीको नेपाल भ्रमण र राष्ट्रपति बिद्या भण्डारीको भारत भ्रमण निश्चित भएको बताए । ‘भारतीय राष्ट्रपतिको नेपाल भ्रमण र हाम्रा राष्ट्रपतिको भारत भ्रमणको मिति तय हुन बाँकी छ’ उनले भने।
प्रतिक्रिया दिनुहोस !
