शव नभेटिएपछि कुशको शव बनाएर दाहसंस्कार
चितवनको चण्डीभन्ज्याङ ६ स्थित त्रिशूली नदीमा बस दुर्घटना हुँदा हराइरहेका नौजना फेला परेका छैनन् । शव फेला नपरेपछि आफन्तले कुशको शवको प्रतिमा बनाएर अन्तिम सस्कार गर्न थालेका छन् । हराइरहेका मध्ये एकजना भारतीय र एकजना सर्लाहीका छन् भने सातजना रौतहटका छन् । दुर्घटना भएको एक साता बितिसक्दा पनि हराइरहेका यात्रुको शव नभेट्दा आफन्त थप पीडामा छन् ।
गौरः चितवनको चण्डीभन्ज्याङ ६ स्थित त्रिशूली नदीमा बस दुर्घटना हुँदा हराइरहेका नौजना फेला परेका छैनन् । शव फेला नपरेपछि आफन्तले कुशको शवको प्रतिमा बनाएर अन्तिम सस्कार गर्न थालेका छन् ।
हराइरहेका मध्ये एकजना भारतीय र एकजना सर्लाहीका छन् भने सातजना रौतहटका छन् । दुर्घटना भएको एक साता बितिसक्दा पनि हराइरहेका यात्रुको शव नभेट्दा आफन्त थप पीडामा छन् ।
दुर्घटनामा हराइरहेकी चन्द्रपुर ३ की पुनमदेवी साहको शव नभेटिएपछि परिवारले कुशको शव बनाएर हिन्दु धर्मअनुसार अन्तिम संस्कार गरेका छन् । दुर्घटनामा हराइरहेकी साहका श्रीमान्, एक छोरी र छोरा चितवनमा उपचार गराइरहेका छन् भने एक छोरीको मृत्यु भएको थियो ।
जिल्लाकै झुन्खुनुवा गाविसका २६ वर्षीय दीपेन्द्र साह नभेटिएपछि परिवारले कुश को शव बनाएर संस्कार गरेका छन् । शिक्षक बन्ने सपना बोकेर पोखरामा शिक्षक आयोगको परीक्षा दिन हिँडेको छोरोका शवसमेत नभेटिँदा उनका आमा र बुबा बेलाबेलामा बेहोस हुने गरेका छन् ।
दुःखले हुर्काउँदै स्नातकसम्म पढाएको छोरो दुर्घटनामा हराएपछि परिवारमा रुवाबासी छ । साहका बाबु लक्ष्मी भने, ‘छोराको शव भेटिन्छ कि भन्ने आस थियो तर धेरै दिन बित्तिसक्दा पनि नभेटिएपछि कुशको शव बनाएर अन्तिम सस्कार गर्यौ ।’ यस्तै कटहरिया ४ का शम्भुप्रसाद यादवका आफन्तले पनि कुशको शव बनाएर संस्कार गरेका छन् ।
हराइरहेका आफन्तको बिलौनाबाहेक केही छैन । उनीहरूको घरमा चुलो बलेको छैन । दुर्घटनामा हराइरहेका रौतहटका सातजना आफन्तको एउटै बिलौना छ, ‘मरेर गएको भए पनि अन्तिम पटक मुख हेर्न पाए हुने थियो ।’ दुर्घटनामा चार भारतीय नागरिकसहित २५ को ज्यान गएको थियो । दुर्घटना भएकै दिन २२ जना र पाँच दिनपछि हराइरहेका तीनजनाको शव भेटिएको थियो । दुर्घटनामा १६ घाइते भएका थिए भने अझै नौजना हराइरहेकाले खोजी गरिदिन आफन्तले प्रहरीलाई अनुरोध गरेका छन् ।
हराइरहेकाहरूको खोजीमा प्रहरी गम्भीर नभएको आफन्तले गुनासो गरेका छन् । प्रहरीले नदी किनारका प्रहरी इकाइलाई शव खोज्न निर्देशन दिएको जनाएको छ ।
दुर्घटनामा गौरका राकेशकुमार गुप्ता, भारत बिहार राज्य दखानका सञ्जय चौधरी, सर्लाही सुदामा ८ का राजीवकुमार सिंह, रौतहट कटहरियाका ४ का शम्भुप्रसाद यादव, झुन्खुनुवा ८ का दीपेन्द्र साह, राजपुरफरदवा ६ का ललनकुमार कलवार, खेसरहिया ७ का विश्वनाथ साह, चन्द्रपुर नपा ३ की पुनमदेवी साह, मुडवलवाका रामवालक जयसवाल भेटिएका छैनन् ।
एक साताअघि गौरबाट पोखरा जाँदै गरेको ग १ ख ३७०९ नम्बरको बस दुर्घटना भएको थियो ।
प्रतिक्रिया दिनुहोस !
