सुनजस्तै तोलामा बिक्री हुन्छ चरेश

काठमाडौं: धादिङका कृष्ण मगर भदौ ६ गते दुई किलो चरेशसहित कीर्तिपुरबाट पक्राउ परे । उनले ठमेलमा बिक्री गर्न उक्त चरेश धादिङबाट खरिद गरेर ल्याएको बयान प्रहरीलाई दिएका थिए । मगरले ठमेलमा दुर्व्यसनीलाई चरेश पटकपटक बिक्री गर्दै आएको समेत बताए ।

मगर पक्राउ परेको दुई सातापछि बाफलबाट सुजन क्षेत्री एक किलो चरेशसहित शुक्रबार ठमेलबाट पक्राउ परे । ठमेलमा ह्यान्डिक्राप्ट ट्रेड सेन्टर खोलेका मगरको भित्री उद्देश्य चरेश बिक्री गर्नु थियो । उनले तराजु राखेर साना पाउचमा चरेश तौलेर दुर्व्यसनीलाई बिक्री गर्दै आएको प्रहरी अनुसन्धानबाट खुल्यो । प्रहरीले मगरको ह्यान्डिक्राप्ट पसलबाट तराजुसमेत बरामद गरेको छ । शनिबार गुल्मीका निशान भट्टचन एक किलो दुई सय ५० ग्राम चरेशसहित मनमैजुबाट पक्राउ परे । उनी पनि ठमेलकै दुर्व्यसनीलाई चरेश बेच्ने व्यापारी हुन् ।

तीन साता अवधिमा प्रहरीले ठमेल क्षेत्रबाट करिब पाँच किलो चरेश बरामद गरिसकेको छ । ६ महिना अवधिमा यस क्षेत्रबाट २० किलो चरेश बरामद भएको प्रहरीको भनाइ छ ।

महानगरीय प्रहरी वृत्त लैनचौरका प्रमुख डीएसपी सोमेन्द्रसिंह राठौर भन्छन्, 'ठमेलमा प्रहरीले लागूऔषधको धन्दा पाँच प्रतिशतमात्रै कन्ट्रोल गरिरहेको छ । बाँकी ९५ प्रतिशतले गोप्य ढंगबाट बिक्री गरिरहेका छन् । सुराकीबिना पत्ता लगाउन धेरै गाह्रो छ ।' उनले ठमेलमा ५० प्रतिशत विदेशी तथा स्वदेशी पर्यटक लागूऔषध सेवनकै लागि आउने गरेको दाबी गरे । डीएसपी राठौरका अनुसार सुनजसरी तोलामा बिक्री हुन्छ चरेश ठमेलमा । 'चरेशसँगै तराजु बरामद गरेपछि हामीले सोध्दा तोलामा चरेश बिक्री गर्ने गरेको बयान कारोबारीले दिएका छन्', उनले भने । पैसाबिनाका सुराकीले सूचना नदिने भएकाले ठमेलमा लागूऔषध नियन्त्रण गर्न राज्यले पैसा खर्च गर्नुपर्ने प्रहरी भनाइ छ ।

विशेषगरी नाइजेरियाली र भारतीय कारोबारीहरू ठमेलमा लागूऔषध बिक्रीमा सक्रिय रहेको सूचना प्रहरीसँग छ । 'कोकिन, हेरोइनजस्ता उच्च कोटीका लागूऔषध नाइजेरियालीले बिक्री गर्छन् भने चरेश भारतीय गिरोहले बिक्री गर्ने गरेका सूचना प्रहरीसमक्ष आइपुगेको छ । हामीले उनीहरूमाथि उच्च निगरानी राखेका छौं', राठौरले भने ।

गृह मन्त्रालयको प्रतिवेदनअनुसार नेपालमा ६७ जिल्लामा गाँजाको खेती हुन्छ । व्यावसायिक रूपमा भने मकवानपुर र धादिङमा बढी गाँजाखेती हुँदै आएको छ । मकवानपुर र धादिङमा उत्पादित गाँजा ठमेलमा मात्रै सातामा पाँच देखि १० किलो बिक्री हुने गरेको जानकारी राठौरले दिए । उनले भने, 'हामीले समात्न पनि छाडेका छैनौं । कारोबारीले बिक्री गर्न पनि छोडेका छैनन् ।' दुईदेखि पाँच किलो चरेश बोकेर हिँड्ने व्यक्ति पोके कारोबारी हुन् । साना पाउच बोक्ने दुर्व्यसनी हुन् । नाम उल्लेख नगर्ने सर्तमा एक प्रहरी अधिकृतले भने, 'ठमेल लागूऔषधमै टिकेको छ, गाँजामा गमला उमार्ने होटल धनी तथा आवरणमा कपडा र ह्यान्डिक्राप्ट व्यापारी नै चरेश बिक्रीमा संलग्न छन् ।'

लागूऔषध दुर्व्यसनी पक्राउ

डेरामा धमाधम लागूऔषध दुव्र्यसन गरिरहेका आठजनालाई प्रहरीले पक्राउ गेरेको छ । कागेश्वरी मनहरा नगरपालिका–११ गोठाटार डेरा लिएर बसेकी पुनम खत्रीको कोठाबाट खत्रीसहित सात युवती र एक किशोर गरी आठजनालाई प्रहरीले पक्राउ गरेको हो । प्रहरीले खत्रीको कोठाबाट १३ वटा सिरिन्ज, सिरिन्जमा लाग्ने फेनारगन, डाइजेपाम ३० एम्पुलसमेत बरामद गरेको छ ।