२० हजारमा नक्कली लाइसेन्स
दमौली: राजमार्गमा सञ्चालन हुने धेरैजसो ट्रक चालक नक्कली लाइसेन्स बनाएर हिँड्ने गरेको पाइएको छ । तनहुँ प्रहरीले केही दिनयता नक्कली सवारी चालकमाथि गरेको अनुसन्धानका क्रममा तीन नक्कली ट्रक चालकलाई नियन्त्रणमा लिएको छ ।
पोखराको रामबजारस्थित मुनाल ड्राइभिङ इन्स्टिच्युटका सञ्चालक विनोद खड्काले जनही २० हजार रुपैयाँमा लाइसेन्स बनाउने गरेको तनहुँका प्रहरी उपरीक्षक कृष्णकुमार महतले जानकारी दिए । फरक फरक रुटमा ट्रक चलाउने तीनैजनाले एकै ठाउँबाट नक्कली लाइसेन्स बनाएको महतले बताए ।
पृथ्वी राजमार्गमा सञ्चालन हुने कतिपय ट्रिपर चालक नक्कली हुने गरेको चर्चा चलिरहँदा प्रहरीले कारबाही थालेको हो । गत महिना जामुनेमा भएको एक ट्रिपर दुर्घटनामा तीनजनाको मृत्यु भएको थियो । घटनामा संलग्न चालक नक्कली भएको खुलेको थियो । लाइसेन्स नभएका तथा भएकाहरूले पनि नक्कली बनाउने गरेको सूचनाका आधारमा प्रहरीले गत सातादेखि गरेको चेकजाँचका क्रममा नक्कली लाइसेन्स बनाउने गिरोह प्रहरी नियन्त्रणमा आउन सफल भएको हो ।
प्रहरी टोलीले गत सोमबार शुक्लागण्डकी १ कोत्रेमा गरेको चेकजाँचका क्रममा ग १ क २४७३ नम्बरको ट्रिपरका चालक बन्दीपुर २ निवासी प्रेम गुरुङको लाइसेन्स शंकास्पद भेटियो । चेकजाँचका क्रममा प्रहरी अधिकारीले शंका लागेपछि परीक्षणका लागि पठाउँदा यातायात व्यवस्था कार्यालय भेरीबाट जारी भनिएको ०३–५२१४७८ नम्बरको लाइसेन्सको अभिलेख माग्दा अर्कैको नाममा लाइसेन्स भेटिएपछि गुरुङको लाइसेन्स नक्कली प्रमाणित भएको थियो ।
गुरुङमाथि अनुसन्धान गर्दा उनले आफ्ना भिनाजु पर्ने देउराली ९ निवासी धनकुमार गुरुङमार्फत बनाएको बयान दिएका थिए । उनको बयानका आधारमा घटनाको दुई दिनपछि नियन्त्रणमा परेका धनकुमारबाट बरामद लाइसेन्ससमेत नक्कली पुष्टि भएको थियो ।
धनकुमारसँगको सोधपुछका क्रममा उनले अर्का नक्कली चालक देउराली ५ निवासी धनप्रसाद गुरुङसँग समेत रहेको बयान दिएका थिए । प्रहरीले इन्स्टिच्युटका खड्कालाई नियन्त्रणमा लिँदा उनले पोखराको नयाँबजारस्थित दीपसिना प्रिन्टर्सबाट छपाएको खुलेको छ । पिन्टर्समा छापा मार्दा प्रहरीले यातायात व्यवस्था विभागको नक्कली छाप तथा केही तयार नक्कली लाइसेन्ससमेत बरामद गरेको महतले जानकारी दिए ।
पिन्टर्सका सञ्चालक पोखरा उपमहानगरपालिका १३ निवासी दीपक पौडेल र खड्काले मिलेर करिब ६ महिनाअघिबाट नक्कली लाइसेन्स बनाउन थालेको पाइएको छ ।
उनीहरूले एसएलसीको नक्कली प्रमाणपत्र र सरकारी छापसमेत बनाउने गरेको पाइएको छ । प्रहरीले नक्कली सवारीचालक र लाइसेन्स बनाउने काममा संलग्न खड्का तथा पौडेलमाथि दस्तखत किर्ते मुद्दा दर्ता गरी अनुसन्धान थालेको छ ।