न हेलिकोप्टर आयो न जहाज, रगत बगेर टलकुमारीको ज्यान गयो
खोटाङ : अस्पतालमा गर्भपतन गराउने क्रममा ब्लिडिङ भएर खोटाङ धितुङ ६ की ३५ वर्षिय टलकुमारी राईको मृत्यु भएको छ।
सात सन्तानकी आमा टलकुमारी गर्भ पतनका लागि भदौं १५ गते अस्पतालमा भर्ना भएकी थिइन् । गर्भपतनपछि निरन्तर ब्लिडिङ भए पनि उनलाई उपचारका लागि काठमाडौं ल्याउन हेलिकोप्टर र जहाज दुवै उपलब्ध नभएपछि आइतबार उनको ज्यान गभएको हो ।
श्रीमान् चन्द्र किराँत तथा आफन्तरुले अस्पतालका चिकित्सकको लापरवाहीका कारण श्रीमतिको ज्यान गएको भन्दै छानबिनका लागि माग गरेका छन् । आइतबार बेलुकासम्म पनि शव बुझेका छैनन् ।
धेरै सन्तान पाल्न सकस हुने भन्दै श्रीमान्ले नै उनलाई अस्प्तालमा ल्याएका थिए । उनको गर्भपतन गराउने काममा चिकित्स सन्तोष शाह संलग्न थिए । गर्भपतनपछि विल्डिङ सुरु भयो र उनको पेट अत्याधिकमात्रमा फुलेको छ । उनको स्वासप्रश्वासमा पनि समस्या रहेको र उनको शरिरमा रगत सकिएकाले ब्लडसमेत समयमा नदिइएको श्रीमान् चन्द्रले बताए। चन्द्रले रुँदै भने, सद्दे श्रीमती अस्पतालमा ल्याए, अहिले शब बोकेर जानुपर्ने अवस्था हो ।
सुरुमा ल्याउँदा डाक्टरहरुले यो सामान्य कुरा हो, केही हुँदैन भन्नुभयो तर जब गर्भपतनपछि ब्लिडिङ सुरु भयो। छिटो काठमाडौं लैजा, हामी सक्दैनौं भन्नुभयो , चन्द्रले भने, गोजीमा पैशा थिएन । त्यही पनि बचाउन सकिन्छ कि भनेर जहाज र हेलिकोप्टरका लागि धेरै प्रयास गर्यौं तर न हेलिकोप्टर आयो न जहाज ।
आइतबार बिहान अवस्था थप चिन्ताजनक भएपछि हेलिकोप्टर चार्टरका लागि प्रयास भएको थियो । तर मौसम खराब भएकोले हेलिकोप्टर पुग्न सक्ने अवस्था भएन । खाँनीडाडा एयरपोर्टमा जहाज आउँदैछ भनेर लैजाने क्रममा आइतबार मध्यान्ह उनको बाटोमै मृत्यु भएको हो । अहिले पनि उनको शव अस्प्तालको गाडीमै राखिएको छ ।
टलकुमारीलाई काठमाडौं ल्याउन शनिबार पनि खाँनीडाँडा एयरपोर्टमा लगिएको थियो । तर जहाज नआएपछि उनलाई फेरि अस्प्ताल फर्काइएको थियो । खोटाङ जिल्ला अस्प्तालका प्रमुख रामबहादुर केसीले यो घटनाको बारेमा छानबिन हुने र दोषीलाई कारबाही हुने बताए । उनले भने, अस्पतालबाट कमजोरी वा लाहपरवाही भएको छ भने त्यसमा हामी छानबिन गरेर कारबाही गर्छौ।
प्रतिक्रिया दिनुहोस !
