जाजरकोटमा आगलागी एकको मृत्यु, चार गम्भीर घाइते
जाजरकोटः जाजरकोटको भेरीमालिका नगरपालिका–४ स्थित शान्तिचौतारा बसर्पाकमा एउटा पेट्रोल डिलरमा आगलागी हुँदा एक जनाको मृत्यु भएको छ। आगलागीमा परी नायकबाडा-२ कि १९ बर्षीया संगीता खत्री बोहराको ज्यान गएको छ । त्यस्तै आगलागीमा परेर ४ जना गम्भीर घाइते भएका छन् ।
पेट्रोल डिलर नजिकैको अर्को कोठामा संगीताका माइतीले होटल सञ्चालन गरेका थिए। डिलरमा लागेको आगो होटेलमा समेत सल्किएपछि उनको ज्यान गएको हो ।
आगोमा परेर उनका बाबु कार्कीगाउँ-७ का मानसिंह खत्री, डिलर संचालन गर्ने रुकुम चौरजहारी ७ का प्रेमबहादुर राना, स्थानीय गोकर्ण चन्द र खलंगामा कार्यरत प्रहरी जवान रमेश शाह गम्भीर घाइते भएका हुन् । घाइते हुने प्रहरी जवानको घर सल्यान डाडागाउँ हो ।
पेट्रोलको गन्ध आएपछि थाहा पाउन घरभित्र छिरेको घाइते प्रहरी जवान शाहले बताए। शाह घरभित्रको छिरको केही समयमै आगो सल्किएपछि घरको तेस्रो तलाबाट हाम फालेर ज्यान जोगाएको शाहको भनाइ छ । घाइते चारै जनाले तेस्रो तलाबाट हाम फालेका थिए । संगिता भाग्न नसक्दा आगोले डढेर ज्यान गएको प्रहरीले जनाएको छ ।
घाइते चारै जनाको जिल्ला स्वास्थ्य कार्यालय, जाजरकोटमा प्राथमिक उपचार गरेपछि थप उपचारका लागि नेपालगञ्ज पठाइएको निमित्त प्रहरी प्रमुख हिक्मत बोहराले जानकारी दिए ।
ड्रमबाट जर्किनमा तेल खन्याउदै गर्दा भरिएर तेल अगेनामा पुगेपछि आगो लागेको हुनसक्ने प्रहरी अनुसन्धानबाट खुलेको छ । १२ वटा पेट्रोलिय पदार्थका ड्रममा ४ वटा जलेर नष्ट भएका छन् ।
स्थानीय लोकेन्द्र शाहीको घर भाडा लिएर एउटा कोठामा प्रेमबहादुर राना पेट्रोल डिलर सञ्चालन गरेका थिए भने अर्को कोठामा मानसिंहले होटल खोलेका थिए । बिहान ११ बजे लागेको आगो स्थानीय, प्रहरी, सेना, रेडक्रसको सहयोगमा ४५ मिनेटपछि नियन्त्रणमा आएको थियो ।
आगोमा परि दुई वटा मोटरसाइकल र घर जेलको निमित्त प्रहरी प्रमुख बोहराले बताए। आगलागीले ३५ लाखसम्मको सम्पत्ति नष्ट भएको हुनसक्ने प्रहरीको प्रारम्भिक अनुमान छ ।
प्रतिक्रिया दिनुहोस !
